Ako 12: Koho Ui Faka'Otua

Saame 71:1-6; Selem.1:1-10; I Kol.14:12-20; Lk.4:20-32;Matiu 18:20; Hepelu 10:24-25

KO E UI 'O SELEMAIA

Ko e Tohi 'a Selemaia na'e fai ia 'i he konga kimui 'o e senituli fitu mo e konga kimu'a 'o e senituli ono, 'i he taimi kuo faka'au ke hoholo hifo 'a e mafi 'o e fu'u pule'anga 'Asilia kae 'alu hake ki 'olunga 'a e pule 'a e kau Papilone.  Ko e tohi loloa 'eni (vahe 52) 'oku fakamatala ki he ngaahi me'a na'e hoko 'i he mo'ui 'a e palofita pea pehe ki he ngaahi fekau 'a e 'Otua ki he Pule'anga Siuta.

Pea ko 'eni ha ngaahi me'a mahu'inga 'i he ui 'o e palofita 'a ia 'oku totonu ke tau hanga 'o fakatokanga'i:

1.      Na'e mu'aki 'afio'i pe 'e he 'Otua ia 'a Selemaia kimu'a te'eki ke fatu ia 'i manava.  Pea fakatapu'i te'eki fanau'i mai ia ki mamani.

2.      Na'e fakanofo 'e he 'Otua 'a Selemaia ke ne hoko ko e Palofita ki he ngaahi Pule'anga, 'o 'ikai pe ko Siuta pe mo 'Isileli 'o hange ko e anga maheni.

3.      Na'e 'afio'i pe 'e he 'Otua ia ko Selemaia ko e talavou pe pea 'oku 'ikai ke poto he lea, ka ko e 'Otua te ne 'iate ia 'o 'oange 'a e lea ke ne ngaue'aki.

4.      Pea na'e tomu'a 'afio'i pe foki 'e he 'Otua ia 'a e ngaahi fakafepaki 'oku fetaulaki mo e palofita ka na'e tala'ofa pe 'a e 'Otua te Ne tokoni mo fakahaofi ia.

5.      'I he a'u mai ko ia 'a e 'Otua kia Selemaia na'a ne fakamafai'i ke ne a'u ki he ngaahi fonua kotoa pe mo e ngaahi pule'anga kotoa pe.

'Oku mahino 'aupito 'i he talanoa mo e ui 'o Selemaia 'oku 'ikai fakafalala 'a e 'Otua ki he poto, taukei, ivi pe taleniti 'o e tangata.  'Oku tu'u pe 'iate Ia mo 'Ene Folofola 'a hotau ui mo 'etau ngaue.  Ko e vaivai kitautolu.  Ko Ia pe 'a e malohi.  Ko e ta'epoto kitautolu.  Ko Ia Tokotaha pe 'a e Poto mo e Maama.

---

Ako 11: 'Oua 'e mo'ui ta'e'aonga

Senesi 25:29&30; Saame 37:19-25

MO’UI FAKA’O’ONOA

Kuo fai ‘a e takai holo ‘a ‘Isoa ‘i he’ene tuli manau ‘i he’ene taka vao, pea ‘i he ‘aho ni, kuo ne a’u ki he hela’ia.  Pea ko e tu’unga totonu pe foki ia ‘o e fa’ahinga me’a ko ia ko e tulia ‘o e malie ‘o e mamani.  ‘Oku ‘ikai teitei ma’u ha me’a ia.  He na’e totonu foki ke ne ma’u mai ha me’a, pea mei he’ene tulimanu.  Ka ko ‘eni kuo a’u mai ia kuo ‘ikai ha’u ia mo ha me’a, ko e me’a pe na’a ne ma’u ‘o ne ha’u mo ia ko e ‘aungalua ‘i he fiekaia !  ‘Oku lahi ‘a ‘ene kai nge’esi ‘i he “vao”.  Pea fu’u lahi mo ‘ene mama’o mei ‘api, mama’o mei he ‘api mo e mo’ui faka-’Ootua.  Fu’u lahi ‘aupito ‘a ‘ene ‘afungi, pea mo e ta’e fiefanongo ki ha akonaki pe fale’i ‘o kau ki he’ene maumau’i ‘a e taimi.  A’u ki he ‘aho ni kuo a’u ki he ‘aungalua ‘i he fiekaia. 

Taumaia ke mahino kiate kitautolu ‘a ‘etau fa’a tali teke’i ‘o e me’a mahu’inga pe ko ia ‘e taha ‘i he mo’ui, ‘a Sisu Kalaisi.  Ko e me’a’ofa fungani pe ia ‘e taha ‘oku ‘i hevani, ko e mo’ui ‘a Sisu Kalaisi.  Pea na’e hoko ‘a e ‘Otua ke ‘auha ‘i he funga kolosi koe’uhi ke foa’i ‘a e lolo na’ati ‘o hevani, hei’ilo na’a ‘inasi ‘a e tangata mo e fefine kotoa pe ‘i hono manongi.  Pea ‘oku ongo ki he “mafu tefua” ‘o e ‘Otua ‘a hono ta’etoka’i mo hono fakasikaka’i ‘a e fu’u koloa ni.  ‘O ‘ikai pe ke pehe atu ‘e mamani ia pe koeha.  Fai pe ‘ene me’a ‘i he fakatoli’a ‘a hono loto ‘o fakatatau ki he ‘ene poto. Ko ia kotoa na’e fai ‘e ‘Isoa.  ‘Osi ange kiai ‘a e mo’ui mo e taleniti mo e tapuaki.  Pea ko e ‘uhinga ke ne toloveka’aki, ka na’e ‘uhinga ke tataki mamalie ia ki he ‘Otua, ‘o faka’ai’ai ‘ene mo’ui ke fehumalie’aki mo e tapuaki mo e kelesi fakakalaisi.  Ka ko e ha ‘a e me’a na’e hoko?  ‘Oku tatau pe ‘a e vao mo e fakakaukau ‘o e “fonua mama’o” ‘i he talanoa ‘o e foha maumau koloa (Lk. 15:11-32), pea ne foki ki ‘api kuo mole kotoa! 

‘I he’ene foki ki ‘api, ‘o ne ‘ilo hono tehina “ta’e ‘i ai  hano taleniti” ‘oku ‘i ai ‘a ‘ene me’akai.  Na’e ‘ikai ‘alu hono tehina ‘ona ia ‘o “ngaue” pe tulimanu, ka na’a ne nofo pe ia ki ‘api, pea ‘oku  ‘i ai pe ‘a ‘ene me’akai.  Me’a sai ko e nofo tonu e!  ‘e ‘ikai pe ke ‘i ai ha taimi ia ‘e hala ai.  ‘E ‘ikai pe ke tuenoa pe fiekaia.  Masiva pe li’ekina.  Pea ‘oku mo’oni ‘a e lau ‘a e Saame.  Na’a ku talavou pea kuo u motu’a ka kuo te’eki ke u mamata ki ha ma’oni’oni kuo li’aki, pe ko hono hako kuo kole me’akai (Saame 37:25).  ‘I he fa’a nofo ki he ‘Eiki ‘oku mohu pe ‘a ‘ete mo’ui ‘i he taimi kotoa.  Pea te te hoko kita ko e kolo hufanga pea moha “feleoko” ki he kau ‘alu noa ‘i he vaa’ihala ‘o e mo’ui.  Pea na’e pehe ‘a e tu’u ‘a Sekope kia ‘Isoa ‘i he’aho ‘o ‘ene ma’u ki he’ena tu’u, faifainoa pe ia kae anga maopo pe ‘a Sekope.  Kamata ‘i he ‘aho ni ‘a ‘ene fakatokanga’i ‘oku hala.  He ko e tesi ‘o e mo’ui ‘a e me’a ‘oku fa’o ‘i he tangata ‘i he ‘aho ‘o e faingata’a.  Pea ne kole ange leva kia Sekope ha konga ‘o e me’a ‘oku ne ma’u.  Ka ko e mo’ui foki ‘a Sekope na’e ‘ikai ko e toki tunu hake pe pea kula leva.  Pea ko e totonu kia ‘Isoa ke ‘alu hake pe ia ‘o kuki ha’ane me’akai.  He neongo ‘a ‘ene vale ‘o li’aki noa ‘a e faingamalie ‘o ne va’inga ‘aki ka na’e kei ‘ata pe kiate ia ‘a e mo’ui.  ‘Oku kei taimi pe ke fai ha’ane sepo kula ‘ana.  Ka na’e ‘ikai foki fiemo’ui mamahi ‘a ‘Isoa ia!  Na’a ne fiema’u pe ‘e ia ‘a e mo’ui, ‘a e mo’ui na’e ‘ia Sekope, ta’e fie kalusefai.  Ta’efie pupuha’ia pe fiemata vela, ‘io na’a ne fiema’u faingofua pe ia ‘a e “momona” ‘o e fononga.  Pea ko e ako ia kiate koe mo au ‘i he ‘aho ni.  Ke tuku ha’ata feinga ke ta ta ‘a Sisu ia ‘i hota sino.  Pea ‘oku ‘ikai ko ha ki’i ta pe ‘i ha ‘aho ‘e taha ka ko e ta ‘i he ‘aho kotoa pe ‘o e fononga.  Ko ia tali ‘a Sisu pea mo ‘ene tukituki ‘a e ‘oku lolotonga fai atu ki ho loto ‘i he ‘aho ko ‘eni, he ka pau ‘a e tu’u ‘i he ‘aho ni ‘e  ‘ikai teitei mole ‘a e ‘aho ‘apongipongi.

Ako 10: Fika 'Uluaki e 'Otua

Senesi  25:27-28; 27:3&5; Saame 27:4

FAI  PE  ‘A E ME’A  ‘E  TAHA

‘I he tutupu hake ‘a e ongo tama ni, kuo fakalau mai ‘a e fakautuutu ‘a hona faikehekehe. Ko ‘Isoa ia ko e tama tulimanu, pea na’e takavao, ka ko Sekope ia na’e anga maopoa, pea ‘ikai ha  faiva ‘o Sekope, ka ko ‘ene nofo fale pe. 

 ‘Oku fu’u malie ‘aupito ‘a e hoko mai ‘a e ‘Otua ‘i he lesoni ‘o e ‘aho ni. Ko ‘Isoa fu’u lahi hono manako, pea fu’u fa’ata ia ki mamani katoa.  Na’e ‘ikai ha me’a ia ke ne fakapokosi’i’i hono mamani.  Na’e  ‘ata ia kiate ia kene tulia hono loto.  Ko e tangata ia ‘o mamani lahi.  Na’e manakoa ia ‘e he kakai, pea ‘asinga ai ‘ene mo’ui fakamaheni, pea toe ‘ilo’i ‘i he feitu’u kotoa, he ko e tangata ‘alu ,ka ko Sekope ko e  tama nofo fale pe ia.  Na’e ‘ikai ke ‘i ai hano faiva ‘ona.’Oku fakalea foki ‘e he tohitapu faka-Pilitania, Ko e “Plain man”,’a ia ko hono ‘uhinga , ko e tangata  ta’e ‘i ai hano faiva pe taleniti.  Na’e taha pe ‘ene ki’i faiva, Ko e nofo pe ‘i ‘api.  Pea na’e ‘ikai ke fu’u maheni ia mo e kakai ‘o hange ko ‘ene ta’okete.Pea ‘i he ‘ene nofo ‘i honau ‘api ‘oku mahino ai ko hono ki’i mamani ko e hau he pokosi’i.  Na’e ‘ikai ke hange ko ‘Isoa ke ‘alu ki mamani ‘o fiefia, he ‘oku kei talavou, kae nofo fale pe ia, ma’u pe ‘ene fiefia ‘i he ‘ene nofo fale. ’I he fu’u faikehekehe pehe ‘a e ongo tamaiki, na’e pau ke mavaeua ‘a e ongo matu’a. Sai’ia e motu’a ‘i he tama lahi, pea ‘oku pehe ‘e he tohitapu, Ko e ‘uhinga ‘o ‘ene sai’ia, koe’uhi ko ‘ene kai “Kiki mei he ‘ene tulimanu’’.  ‘I hono fakalea ke mahino ange “ma’u ‘a ‘ene me’a mei hono faiva”, pe “kai mei hono taleniti”. Ko e me’a ki he fine’eiki na’e sai’ia pe ia ‘i he tama si’isi’i, mahalo pe ko ‘ene nofo ma’u ‘i ‘api ‘o tokoni holo ai.  Na’e ‘ikai foki ke totonu ke pehe, ka ‘oku fakangofua pe ‘e he ‘Otua ke tau ma’u akonaki mei ai. 

Ko e tama ‘uluaki, ko mamani ia.  Tangata ngaue ia, pea ko e tokotaha ia kuo fu’u femo’uekina ‘i he tuli ‘o e koloa sai hono ‘atamai, malohi pea faka’ofo’ofa hono sino.  Pea ‘i he ‘ene fu’u mohu pehee, ne fu’u to ia ‘o tokanga ki he me’a ‘o tu’a, he ko e tangata tulimanu, pea ko e tangata tuli manu ko e tangata ia ‘o tu’a.  Pea to pe ki ai ‘a ‘ene fakamamafa, lotu pe ia kae fu’u tokanga pe ia kitu’a ke “takavao”! He ko mamani ko e fu’u vao!  ‘Oku fihi tu’u ai  ‘a e palopalema mo e faingata’a, pea lahi ai mo e ngaahi manau fakatauele mo e manufekai.  Ka na’e mahalo pe ‘e ‘Isoa ia, ‘oku fe’unga pe ‘a ‘ene ngaahi “fakaafe” ‘oku fa’a kai ‘a e tangata ‘a e ‘Otua, ‘a ‘Aisake, ka haofaki ai hono laumalie, te ne toki ‘ilo pe ‘amui ko e me’a fakatu’utamaki ‘a e to ki he me’a ‘o tu’a kae puli ‘a e tefito’i me’a ko e ‘Otua. Neongo ‘a ‘ete to ke tokoni ke lahi ‘i he misinale, langa falelotu, mo e toutou fakaafe, ko e koto launoa pe ia ki he mo’ui ‘a e laumalie. 

Na’e ‘ikai ke ‘i ai ha ‘uuni faiva ia ‘o Sekope, ka na’a ne fili ‘e ia ‘a e me’a mahu’inga, ‘a e me’a ‘o fale, ko e fe ‘a e me’a ‘o fale?  ‘A e me’a ‘o LOTO.  Tokanga ‘a ‘Isoa ia ki he ngaahi me’a kehekehe ‘o tu’a, kae tokanga pe si’i Sekope ia ki loto.  Pea ‘oku mo’oni ‘a e folofola ‘a Sisu kia Ma’ata, “Ma’ata, ‘oku ke lotomo’ua mo ke fekamaaki, ki he ngaahi me’a kehekehe, ka ‘oku lahi pe ha me’a ‘e taha seuke, kuo fili ‘e Mele ‘e a ngafa ‘oku lelei, ‘a ia foki ‘e ‘ikai to’o meiate meiate ia” Luke 10:41.  Na’e pehe tofu pe ‘a e tukunga ‘o ‘Isoa mo Sekope.  ‘Eva holo pe ‘a ‘Isoa ia ‘i tu’a, mo e ‘ikai toe ha feitu’u ‘i mamani, hono faka’ali’ali holo ai hono poto mo hono ngaahi taleniti.  Ko loto ‘e ‘i ai ha taimi, ke ki’i hu ai ki fale, ki he “lilo” ‘o ki’i fakaai pe fakamalo atu kiate Ia na’a ne foaki  ‘a e tapuaki, tautautefito ki he tu’unga ‘o e lahi, ‘o e ‘ea.  ‘A ia foki ko e tu’unga lahi ‘i he koloa fakamamani.  Pea fu’u lahi pe ‘a ‘ene ‘afungi, ka ko si’i Sekope na’e ‘ikai ke ‘ai ai si’ano tufakanga ‘i he tafa’aki faka’atamai, pe koloa fakamamani, na’a ne nofo pe ki loto.  Pea te ne ‘ilo pe ‘e ia ‘a e lelei ‘o e fa’a nofo ki loto, ‘a e temipale ‘o ‘Ene ‘Afio ke tauhi pe ke ma’a.  He ‘oku mo’oni ‘a e tohi, ‘i he me’a kotoa ‘oku ke tauhi mu’omu’a lama ho loto “ Palovepi 4:23, kae’oua ‘e tokanga ke langa ‘a e fanga manu ‘o e vao - ‘a e koloa mo e fiefia ‘o mamani.

Ako 9: Ikuna lahi ma'upe 'a Laumalie

Senesi 25:24-26; 27:11; Hosea 12:4; Kal. 5:17

‘ISOA MO SEKOPE

‘I he ‘aho ni kuo fa’ele’i mai ‘a Lepeka ko e ongo mahanga, ko e ‘uluaki na’e fulufulua mo kulokula foki, pea ko hono ua, na’e pau ke lanu maama, mo ha molemole.  ‘Oku mahino pe ne na kei fefa’uhi pe ‘a e ongo mahanga hona fa’ele’i, he ko e kimui na’a ne kei pipiki atu pe ki he muiva’e ‘o e ‘uluaki, ‘ohange ha’ane feinga ke fusi’i mai kimui. 

Na’e mahino pe ‘a e fu’u ngalikehe, ‘a e ha mai ‘a e ongo mahanga, pea ‘oku mahino ia mei he anga ‘o hona hingoa.  Na’e ui ‘a e taha ko ‘Isoa, ‘a ia ko hono ‘uhinga ko e fulufulua.  ‘Oku mahino mai ko ha tamasi’i ia na’e fita’a mo kaufefeka.  Faikehekehe ia mei hono tehina, na’e ui ia ko Sekope, pea ko e ‘uhinga ‘o e Sekope, Hakiva’e, pe tama “puke muiva’e”, Ko e ‘ai mahino ange, ko e tokotaha “fa’aome’a”.  Pea neongo ‘a e ngali ha malohi mo to’a ‘a ‘Isoa, ka na’e fakaofi ‘aupito pe ‘a Sekope ia ki hono muiva’e ke ne ma’u ia ‘o ne lakasi ia, ‘i he me’a kotoa pe na’e ma’u ‘e ‘Isoa.  Pea ‘oku fakamo’oni ki ai ‘a e lau ‘a e Palofita ko Hosea, “Lolotonga na’a ne ‘i he manava, na’a ne puke ‘a e muiva’e ‘a hono tokoua, pea ‘i he’ene tangata na’a ne fai mo e ‘Otua” (Hosea 12:4). 

‘I he mo’ui ‘a e tangata, ‘a ia ‘i hono manava, ‘oku ‘i ai ‘a e natula ‘e ua.  Ko e kakano mo e laumalie, ‘a e na’a tau lave ki ai ‘aneafi, pea te tau toe fakamamafa’i ia ‘i he ‘aho ni.  Pea ‘oku ‘ikai te na felatani kinaua.  ‘Oku na feta’aki mo feteketeke’i ‘o hange pe ko ‘Isoa mo Sekope.  Pea ‘oku fakamo’oni mai pe ki ai ‘a Paula, “He ‘oku holitu’u ‘a kakano, ‘o fakafepaki ki he laumalie pea pehe mo e laumalie kia kakano: he ‘oku na feta’ofi’aki ‘a e ongo me’a ko ia, koe’uhi ka ai ha me’a ‘oku mou loto ke fai, pea ‘oua te mou fai ia’’ Kaletia 5:17.  Pea ‘oku toe lave ki ai ‘a Toketa Molitoni, ko e feta’aki ‘a “Setane mo  Satai”.  Pea ko e tau ko ia ‘oku lolotonga fai pe ia.  Na’e fai pe ia ‘i he manava ‘o Lepeka, pea ‘oku lolotonga hoko pe mo ia ‘i ho manava, ‘i ho’o mo’ui.  Ko e ongo natula ia ‘oku fefusiaki, pea ‘oku toe mo’oni pe ‘a Paula, “He ‘oku ‘ikai ko e me’a ‘oku ou fie fai ‘a ia ‘oku ou fai, ka ko e me’a ‘oku ou fehi’a ki ai, ko ia ‘oku ou fai” Loma 7:15.  Ko e me’a tatau pe mo ia na’e folofola ki ai ‘a Sisuu, “’oku loto pe ‘a laumalie ke fai, ka ‘oku vaivai pe ‘a kakano, Matiu 26:41. 

Taumaia ke tau ‘ilo ko e fakalika mai ‘e he ‘Otua ‘a e ongo natula ni kiate kitautolu ‘i he ‘aho ni, pea ‘oku ne tokanga mai pe ko e ha ha’atau lau.  Ko e fe ‘ia ‘e fai hono loto, kakano pe laumalie?  ‘E fakanatula pe foki ke tau tali atu “ko e kakano “ he ko ia ‘oku lahi, pea ‘oku ne kauakaua mo malohi, pea ko e ‘uluaki.  ‘Ikai ko ia pe ka ko hono mamani ‘eni.  Kae’oua mu’a te tau fakasikaka’i ‘a Sekope, ‘io ‘a e lauamlie, he neongo ‘a ‘ene ha ngali si’isi’i mo ha molemole, mo ngalemulemu kate ne piki atu pe.  He ‘oku mo’oni ‘a e lau ‘a e Himi 400, “ko Tonu ‘oku lusa pe, kaukaua pe ‘a loi”.  Kapau ‘e ‘oange ha faingamalie ‘o e laumalie, ‘e ‘iai pe ‘a e ‘aho ia tene lakasi ‘e ia ‘a e kakano, ‘o ne ikuna’i.  ‘Oku pehe pe ‘a e ki’i Sisu ‘oku tau tali.  ‘Oua te tau tokanga pe hoha’a tu’unga ki ha me’a ‘o e kakano, ‘oku fakafale mai he fakamanavahe kalae fakakoliate pe ia.  Ka ko ki’i Tevita ‘ena ‘e ‘aonga ki he ha?  “’Aonga ke tolomaka, ke to ha to’a, ‘o hange ko e folofola”.  Tali ‘a Sisu ‘i he ‘aho ni, pea te ne liua ‘e Ia ‘a e ngaahi hau tupu’a kotoa pe ‘o ‘eta mo’ui, he ‘oku ne folofola mai ke’oua te tau manavasi’i ki mamani, ‘a mamani ‘o ‘Isoa, he kuo Ne ‘osi ikuna’i ‘e Ia ia (Sione 16:33).

Ako 8: Pule Pe 'a Sihova

Senesi 25:23; 17:16; Malakai.1:3; Loma. 9:10-13

SEVANITI ‘A E LAHI KI HE SI’I

‘I he tangi ko ‘eni ‘a Lepeka ‘o kau ki he feteketeke’i ‘a e fanau ‘i hono manava, na’e tali mai leva ‘a e ‘Otua ‘i he fo’i veesi ‘o e ‘aho ni.  ‘E ‘ikai ngalo ‘ia Lepeka ‘a e fakahinohino ma’ongo’onga na’a ne ma’u.

Ko ha ongo mahanga ‘oku na ‘i hono manava, ‘a ia ko e ongo fonua lalahi ‘e ua pea ‘oku na fu’u feke’ike’i he ‘oku tukunga kehekehe hona natula kae’uma’a ‘ena founga.  Pea ko e na’e pehe aipe ia ‘i he hisitolia ‘o e ongo fonua. 

Ka ko hai ‘e malohi?  Na’e mahino ‘aupito ‘a e tali ‘a e ‘Eiki:  “Ko ta’okete te ne tauhi ‘a tehina”.  ‘E faka’a’au pe ‘o malohi ‘a e si’i pea te ne ikuna’i ‘a e lahi,  pea te ne to’o foki moe tapuaki ki he kovinanite faka ‘Epalahame ‘a e ‘e hoko mai ai ‘a e Misaia.  Pea kuo fakamahino pe heni ‘e he ‘Otua kia Lepeka ko ‘ene kovinanite ‘ana ‘e ‘ikai fai mo e lahi ka ko e si’i.  ‘E ma’u ‘a e tapuaki mei he Tamai, ‘e he si’i.  Tatau tofu pe mo e ma’u ‘e ‘Aisake (koe si’i ia) ‘a e tapuaki meia ‘Epalahame kae hala ‘a ‘Isime’eli ia.  Pea ‘oku hange pe ‘a e fanau ko ‘eni ‘a Lepeka ko e toe li mai ha ‘ata ‘o e fefa’uhi ‘a ‘Isime’eli mo ‘Aisake.  Na’e loto ‘a ‘Epalahame ke ‘i ai ha ‘inasi ‘o ‘Isime’eli ka ka ‘ikai ke ai ’a e ‘Otua.  Ko ‘Aisake tokotaha pe ‘oku fakamonu’ia.  Pea ko ‘eni te tau toe sio ki he me’a tatau ki he ongo mahanga ko ‘eni. 

‘I he anga foki ‘o e tu’u fakamamani, pea ‘oku tau ‘ilo lelei pe ‘i Tonga ni, ko e lahi ko ia ‘a e ‘ea.  Ko e tokotaha ia ‘oku ne ma’u ‘a e tapuaki.  ‘Oku ne falute kotoa ‘a e koloa fakafamili.  Pea ko ia pe foki ‘a e tukunga ‘i he ono’aho kilukilua, ‘i he taimi ‘o ‘Aisake.  Ka ki he ‘Otua ‘oku kehe ia.  Ko e tapuaki ‘e ma’u ia ‘e he si’i.  ‘O ‘ikai ko e ‘uhinga ia ‘e pehe, ko e si’i kotoa pe, te ne ma’u ‘a e tapuaki.  Ka ko ia ‘a e founga na’e ngaue mai ‘aki ‘e he ‘Otua.  Na’e fehangahangai ‘a ‘Ene founga ‘ana mei he founga ‘a e tangata.  Ko e’ai pe ke fakamo’oni’i ‘a e lea ‘a e palofita, “He ‘oku taha ‘eku ngaahi fakakaukau, pea taha ha’amoutolu, pea ‘oku taha homou ‘alunga, pea taha ‘o’oku - ko Sihova ia mei he “Ta’ehamai”  ‘Aisea 55:8.  Pea ‘oku totonu ai ke ‘oua te tau fa’a fakamaau’i, mo anga’i ‘a e ngaahi founga ‘a e ‘Otua, he ‘oku ‘ikai te tau maa’usia ‘a hono finangalo.  Pea ‘oku pehe pe mo e me’a ko ‘eni ‘o felave’i mo e ma’u ‘e he si’i ‘a e tapuaki. ‘Oku lava pe ke tau tokanga’i ‘a e fai pehe ‘a e ‘Otua, ‘i he ngaahi fanau lahi.  Tau sio kia Seti, ma’u ‘e ia ‘a e tapuaki kae hala ‘a Keini.  Ma’u ‘e ‘Aisake kae hala ‘a ‘Isime’eli, ma’u ‘e Sekope kae hala ‘a ‘Isoa, ma’u tapuaki ‘a Siuta kae ‘ikai ‘a Lupeni, pea mo Tevita e ko e si’i taha, na’a ne tofi’a ia kae hala ‘a ‘Eliapi.  Koe ha ‘oku fai pehe ai ‘a e ‘Otua?  Ko e tali, hei’ilo ‘a e ‘Otua. 

Ko ha fakalavelave pe ke tau a’u ki ai, ko e lahi ko e taipe ia ‘o e kakano,  pea ko e si’i, ko e taipe ia ‘o e laumalie.  Ko ia ‘a e lau ‘a Paula, “ Ka tala’ehai ‘oku fuofua hoko ‘a e fakalaumalie, kaekehe, ko e fakakakano, pea toki hoko ‘a e faka-laumalie  (I Kol. 15:46).  Ke hange pe ko e ‘uluaki ‘Atama, mo e ‘Atama hono ua, ‘a Sisu Kalaisi.  Pea ko ia ko e lahi, ‘oku ‘uluaki ha’u ia, pea ko e si’i ‘oku toki hoko fakalahi ‘oku ‘uluaki ha’u ia, pea ko e si’i ‘oku toki hoko fakamuimui mai ia.  ‘E mu’a mai ‘a e kakano, he ko e mamani matelie ‘oku tau ‘i ai, pea ‘e toki muimui ai ‘e laumalie, he ko e “mmani” ta’e’iloa ia.  Ko ia na’e pau ke tu’u pehe ‘a e anga e tu’u ‘a e lahi mo e si’i ‘i he ‘Ao ‘o e ‘Otua.  Ko e pau ke lalo’aoa ‘a e kakano ki he laumalie. 

Kaekehe ko e aofangatuku pe ko e ‘Otua, pea ‘oku Ne fai pe ‘e Ia ‘i he’Ene fa’iteliha, heko ‘Ene me’a ‘a mamani katoa.  Pea koe kakato ki he tali ‘o e fehu’i faingata’a ko ‘eni, ‘oku ma’u kakato pe ia ‘ia Loma 9:10-13.  Ko e finangalo ‘o e ‘Otua ‘oku misiteli, ‘o hange pe ko ‘Ene founga.  Pea na’e folofola pe ki ai ‘a Sisu, ko e laumalie ‘oku Ne hange ha matangi, ‘o Ne ma’ili noa pe.  ‘Oku ta’emafakatotoloa ‘a ‘ene founga, pea kilukilua ‘a ‘Ene fokotu’utu’u.  Pea ko e koto launoa ia ki he tangata te ne lava ‘o mahino’i ‘iate ia pe.  Ko e ‘Otua pe ke Ne toki tatala mai hono ‘uhinga.  Ka ‘oka ‘omi pe ha me’a, ‘o hange ko ia ko e ‘aho ni, neongo ‘a ‘ene ta’etaea ‘e hotau ‘atamai, ka tau tali pe mu’a ia.  Tali pe ‘i he tui mo e loto fiefia ‘o te fiemalie pe, ke fai’aki pe ‘a e mahino ‘oku ‘i he ‘Otua, ko e me’a kiate kita, ko e fakaongoongo pe mo e fakahoko ‘a Hono finangalo.  Pea ko e fakahoko Hono finangalo, ko e tukulolo ‘a e lahi (kakano) ki he si’i (‘a e laumalie).

Ako 7: Fakafalala ki he 'Otua

Senesi 25:22; Siop.28:20-24; Sem.1:5,6; I Pita 5:7

FEHU’I PE KI HE ‘OTUA

Kuo tali mai ‘e Sihova ‘a e lotu totoaki na’e fai ‘e ‘Aisake.  Kuo feitama ‘a Lepeka.  Ka ko ‘eni kuo toe hoko ‘a e me’a faikehe ia ‘i he tali lotu mai ‘a e ‘Otua.  Kuo feteketeke’i ‘a e fanau ia ‘i honau manava!  ‘Oku fa’a misiteli ma’u pe ‘a e tali lotu ‘a e ‘Otua.  Pea ko ‘eni kuo mo’utafu’ua ‘a Lepeka.  Ko e ha ‘a e me’a ‘oku ou pehe ai?  Ko ‘ene fehu’i ia.  Kae ‘ange’ange ‘ene fihi ‘i he fihi ‘a e kakai ‘i he ‘atakai.  ‘Ikai ke ‘ilo’i ia ‘e hono kaunga fefine, pea na’a mo ‘Aisake na’e ‘ikai pe te ne mahino’i.  Pea na’e fai ‘e Lepeka ‘a e me’a totonu.  “Na’a ne ‘alu ‘o fehu’i kia Sihova”.  Vakai ki he nounou!

Lahi hotau ngaahi mahaki mo hotau ngaahi palopalema kuo ‘ikai te tau fa’a mahino’i pea kuo ‘ikai toe ha taha hono ‘eke ki ai.  Kuo tau ‘eke ki he kau ako ‘o ‘amanaki na’a ‘i ai ha fakalavelave ‘a ‘enau ‘ilo.  Pea tau fehu’i ki he matu’a fuoloa tokua na’a ko ha fa’ahinga mahaki faka-Tonga.  Na’a ko ha akafia!!  Pea tau fehu’i ki he kau lotu, pea nau toki feinga kinautolu ke nau mohe ‘o misi pe visone ke ‘omi ha tali!  Pe a ’'oku toe pango ange ‘a e kalasi ‘oku nau o ki he kau faipele.  Ko e me’a fakatu’utamaki ‘aupito ia ‘a e o ki he kau faipele mo e kau fai tongafisi, pea ‘oku tapui ia ‘e he Tohitapu he ko e me’a fakalielia ia ‘i he ‘ao ‘o e ‘Otua (Teut.18:9-12; Lev.19:31; 20:6,27).

Ka ‘oku ‘i ai ha palopalema ‘oku fihia ai ‘a ‘ete mo’ui, ‘eke kia Sihova.  Fehu’i kihe ‘Otua he ko ia pe ‘oku ‘i ai ‘a e tali.  ‘Oi, ke tau ma’u mai ‘a e laumalie ko ee na’e ‘ia ‘Ilaisia, ‘i he ‘oatu ‘o e palopalema kilia ‘o e ‘eikitau ko Neamani, kuo loto si’i ‘a e Tu’i ‘Isileli ia, mo hae hono kofu ko ‘ene manavasi’i kae toki pehe ‘e he palofita, “Ko e ha kuo ke hae kofui ai?  Tuku ke ne ha’u kiate au, pea te ne ‘ilo ‘oku ‘i ai ha palofita ‘i ‘Isileli” (II Tu’i 5:8).  Ko e ‘uhinga ‘a ‘Ilaisa ‘oku ‘i ai ‘a e ‘Otua ke Ne veteki ‘a e palopalema.  ‘Oku ‘i ai ‘a e Sisu ‘oku ‘Afio ‘i hoto loto pea ‘oku talamai ‘e he Himi 506 ke tekaki ki ai hoto ngaahi mafasia’anga mo ‘ete kavenga.  Ko e ha ka toe hela’ia holo ai kae ‘ikai ke fakafehu’i pe ki he ‘Otua.  ‘Osiange ko ia pe na’a ne fakangofua ‘a e palopalema ke hoko mai. 

‘Oku tau malie’ia foki ‘i he ‘uhinga na’e ‘ai ‘e he ‘Otua ke fihia ‘a Lepeka.  Na’e totonu mahalo pe ke 'oua na’a fai ha fetekeaki ia ‘e he fanau ‘i hono manava, ka ko e ‘ai pe ‘e he ‘Otua.  Ko e ‘ai pe ‘e he ‘Otua hei’ilo na’a lava ke lotu ange ai ‘a Lepeka.  He ko e talu foki ‘a e kamata mai ‘o ‘ena nofo mali mo e hange pe ko ‘Aisake ‘oku ne fai ‘a e fetu’utaki mo e ‘Otua, kae feihaka pe ‘a Lepeka ia mo tauhi fale ‘o hange ‘oku ‘ikai haono laumalie !  Pea ‘i he pa’a ‘a e manava ‘o Lepeka ko ‘Aisake pe na’e fetakai ‘i he lotu hufia, kae nofo pe ‘a Lepeka ‘o fakafalala pe ki he lotu kuo fai ‘e ‘Aisake.  Ka ‘i he ‘aho ni ko ‘eni kuo ‘efihia ‘a Lepeka, pea ko ha fu’u palopalema lahi kuo ‘ikai te ne malava ‘e ia ke mamohe ‘i ha po pe ‘aho, pea ‘ikai foki ke toe ue’i ‘e he ‘Otua ‘a ‘Aisake ke fehu’i ange.  Faifai kuo ‘ikai ke toe kataki ‘a Lepeka ka ne fehu’i hangatonu hake leva!  ‘Io, ke ‘ai pe ke mahino ko e lotu mo e mo’ui fakakalisitiane ‘oku ‘ikai ko ha mo’ui fakakulupu pe fakafamili, fakafonua, fakasiasi pe fakamatakali pe fakamali ka ko e mo’ui fakafo’ituitui pe.  ‘E ‘ikai ke ‘alu hoto mali ‘ota ki langi pea ne ‘ave kita ai.  ‘Oku mo’oni pe ‘a e lau ‘a Toketa Molitoni, “’Oku takitaha fai ma’ana” (441).  Pea ko e ngeia ia ‘o e ‘Otua ‘a ‘ete ‘alu ange hangatonu, ‘o ‘ikai ke fakafou ‘i hoto mali pe ko e faifekau. 

‘Oku mahino pe ‘a e lau, “’oku ‘ikai ha mokopuna ‘o e ‘Otua!”  Ko e ngaahi foha pe, ke hange pe ko e fakalea ‘a e Tohitapu ki he ‘Otua.  “Ko e ‘Otua ‘o ‘Epalahame, mo e ‘Otua ‘o ‘Aisake pea mo e ‘Otua ‘o Sekope”  (‘Eki. 3:6).  ‘Oku ‘ikai numi’i pe nusi noa’ia ha me’a ‘i he ‘Otua.  ‘Oku tau tu’u kotoa pe ‘o ‘ata’ata mo fakafo’ituitui ‘i hono ‘ao.  Ko ia ‘a e ui ‘a e ‘Otua kiate koe ‘i he ‘aho ni ke ke tu’u pe koe ‘iate koe ‘o tau fakahangatonu ho’o uaea kiate Ia ‘o ‘oua ‘e toe fou holo.  Pea monu ko Sisu kuo Ne  hoko ‘e Ia ko hota moihu ke ta a’u totonu ai ki “loto tatau” ‘a e Taloni ‘o e Kelesi (Hep. 10:9-22).  Pea ko e ‘uhinga hono faka’ata kitaua ke ta ‘alu ange fakahangatonu ke Ai mo hota faingata’a’ia.

Ako 6: Lotu ma'a hotau famili

Senesi 25:19-21; I Sam.1:17; Hep.7:25; Lk.18:1

PEA HUFIA ‘E ‘AISAKE HONO UAIFI

Kuo tau a’u mai ‘eni kia ‘Aisake pea mo e kamata’anga ‘o e lekooti ‘o hono hako.  ‘A ia ko e ngata’anga totonu ‘eni ‘o e fakamatala ko ia na’e kamata meia Senesi 11:27.  ‘A e fakamatala ko ia kau ki he fanga kui ‘a ‘Epalahame ‘o kamata mei Ua. 

Pea ko e toe kinikini atu ‘eni ki he mo’ui ‘a ‘Aisake.  Ko ‘Aisake na’a ne mali ‘i hono ta’u 40, pea ko e fika 40 ko e fika faka-Folofola ia.  Ko e fika faka-‘Otua.  Na’e fononga takai holo ‘a e fanau ‘a ‘Isileli ‘i he toafa ‘i he ta’u ‘e fangofulu pe a nau toki hu ki Kenani, ‘a e Fonua ‘o e Tala’ofa.  Pea ko Sisu foki na’a Ne ‘aukai ‘i he ‘aho ‘e fangofulu (Mt.4:2), ko ‘ene teuteu ke fai ‘a e ngaue ko ia na’e fekau’i Ia ‘e he Tamai ke fai i he mamani matelie ni.  ‘A ia ‘oku ‘uhinga ko e fika fangofulu ko e taipe ia ‘o e fo’i vaa’ihala kuo fakangata ai ‘a e pule ‘a e lao pe ko e kakano ki he mo’ui.  Ko ha fo’i piliote ia ‘oku fakangangana ai ‘a e mo’ui fakafalala kakano ke mate koe’uhi kae tupu ‘a e me’a ‘a e Laumalie.  Pea ko ia pe ‘a e ‘uhinga ‘o e toki mali ‘a ‘Aisake ‘i hono ta’u fangofulu. 

Pea ‘i he hoko mai ko ‘eni ‘a ‘Aisake ‘i he nofo mali, ko e ‘uluaki me’a pe ‘oku tau tokanga’i ai ia heni ko ‘ene lotu.  Na’a tau fakatokanga’i pe mei mu’a ‘a e makehe atu pe ‘o ‘Aisake ia mei ha toe taha ‘o e kau Peteliake.  Na’e ‘ikai te ne teitei “fai” ‘e ia ha me’a.  Na’e ‘osi tokonaki ‘a e me’a kotoa pe ma’ana ‘e he Tamai ko ‘Epalahame.  Ko e me’a pe na’e fai ‘e ‘Aisake ko e lotu pe (24:63).  Pea ko e toe fakaava ange pe ‘eni ‘a e tohi fakamatala ki he’ene mo’ui fakahisitolia ‘a ia mo hono hako, kuo tau toe ‘ilo ia ‘oku lotu!
He mo’ui fungani mo’oni ‘a ‘Aisake.  Mo’oni ia ko e mo’ui ‘a ‘Aisake ‘oku hange ha “mo’ui ta’engaue” kae nofonofo pe, ka na’e ‘ika ke pehe.  Na’e ‘ikai te ne toe fai ‘e ia ha me’a he kuo ‘osi fai ia ‘e he Tamai, ko e me’a pe ke ne fai ‘i he taimi ni ko e kole pe ke ‘omai.  Ko ia ‘a e ‘uhinga na’e “ta’engaue” ai.  Ka na’e ‘ikai ke ta’engaue ia kae nofo noa’ia ‘o hange ko e fakatonulea’i hala’i ‘e he ni’ihi ‘a e “mo’ui fo’ou” ‘o pehe ko e mo’ui ta’efuakavenga.

Ko e me’a na’e fai lahi’i ‘e ‘Aisake ko e lotu ‘a ia ko e feohi mo e ‘Otua, ‘i he momeniti kotoa pe ‘o tekaki kiate Ia ‘a e me’a kotoa pe ‘o e fononga.  Pea ko e ‘uluaki palopalema ‘eni ‘o e nofo mali ‘a ‘Aisake ko e pa’a ‘a e manava ‘o Lepeka.  Ko ia na’a ne hufia ia ki he ‘Otua.  Tokua na’a ne hufia ‘a Lepeka ‘i he ta’u ‘e uofulu!  Vakai ange ki he fakatatali ‘a e ‘Otua pea ke toki fakangofua ke ‘omi ha tamasi’i ‘i he manava ‘o Lepeka. 

‘Oku ‘i ai pe foki ‘a e ‘uhinga ia ‘a e ‘Otua ‘i he hoko, pe ta’ehoko, ‘a e me’a kotoa pe.  Pea ki he kakai fefine ko ‘eni na’e fakahoko mai ai ‘a e Tala’ofa ‘o e Mo’ui na’e pau ke nau pa’a. Ke mate honau sino (Loma 4:19).  Ke matu’aki siva ‘a ‘ete ‘amanaki, pea ‘oua na’a toe fakafalala ha me’a kiate kita he kuo te hala kita.  Pea ‘i he toki a’u ki he tu’unga ko ia pea toki hoko mai leva ‘a e ‘Otua ke fakamahino’i ko e lava ‘a e me’a kotoa pe, ko e makatu’unga ‘iate Ia tokotaha pe.

Pea ko ha toki hoko mai foki ‘a e ‘Otua ‘i he lotu mo e hufia.  Pea ‘oku ‘uhinga heni ‘a e lotu ko e “hu”.  Ko e “ongo’i ‘apasia ma’u pe” ‘i he ‘ao ‘o e ‘Otua.  Pea ‘oku feohi ma’u pe mo Ia.  ‘Oku ‘i ai ‘a e fekau’aki mo e fetu’utaki, ko ia ‘a e fu’u tu’unga na’e sio ki ai ‘a Sekope mei Peteli.  ‘Io, ko e lotu ko ha faingamalie ma’olunga taha ia mo mahu’inga taha kuo faka’ata ‘e he ‘Otua ki he tangata.  ‘A ia ko e fakaava ‘e he tangata ‘a hono loto kae hoko mai ki ai ‘a e ‘Otua.  Pea koe finangalo pe foki ia ‘o e ‘Otua ke tau toutou lotu ange ki ai (Mt.6:11; 7:11; Filip.4:19; II Pita 1:4).  Pea ‘oku talamai ‘e he Tohitapu ko e lotu ‘a e tangata ma’oni’oni ‘oku ‘aonga lahi (Semisi 5:6).  ‘Oku ‘ikai ha me’a ‘e ta’emalava ‘e he ‘Otua.  Pea ko e ki ki ai ko e lotu.  Ka ‘i ai hao palopalema pe a ke ‘ohake ki he ‘Otua mo e loto tui.  Tatau pe pe ko e ha ho faingata’a’ia, pa’anga, mahaki, ngaue, sivi, pe folau.  ‘Ave pe ki he ‘Eiki.  Pea kuopau foki ke ke falala ki ho’o lotu na’e fai.  ‘O ‘ikai ko ho’o falala kiate koe ka ko ho’o falala ki he ‘Otua ko ee ‘oku ke fetu’utaki mo ia.  Na’e falala ‘a ‘Aisake ki he’ene lotu pea tali mai ‘i he feitama ‘a Lepeka. 

Pea ‘oku toe ‘amuange ‘a e taimi ni, ko hotau ‘Aisake ko Sisu Kalaisi.  Ko ia ‘oku Ne fai hotau hufekina, he ko kitautolu ‘a e uaifi pa’a, ke ‘i ai ha fua ‘i he’etau mo’ui.  Ko e tefito’i ngaue foki ia ‘oku ai ‘e Sisu Kalaisi ma’ataua ‘i he ‘aho ni ko ‘Ene ‘afio ‘i he to’omata’u ‘o e Tamai ‘o fai hotau hufekina (Ngaue 7:55,56).  Pea ‘oku tau fu’u fakatu’amelie ki ai.  Ko e lotu ‘a e ‘Alo ‘oku hoifua mai ki ai ‘a e Tamai.  Pea ta toe fiefia foki ‘oku ‘ikai ke ngata ‘a ‘Ene ‘afio pe ‘i he To’omata’u ‘o e Tamai ka ‘oku Ne toe ‘afio ‘i hota loto ‘o Ne fai ‘a ‘eta lotu (Loma 8:26).

Ako 5: Koe Palomesi 'a e 'Otua

Senesi  25:12-16; 17:20; I Kalo. 1:29-31; Hep. 6:16-18.

FAKAHOKO ‘O E PALOMESI

‘I he ngaahi veesi ‘o e ‘aho ni ‘oku nau fakamatala ki he ngaahi hako ‘o ‘Isime’eli.  ‘Oku fu’u faingata’a ‘aupito ke toe ‘ilo ‘a e hako kotoa ‘o ‘Isime’eli neongo ‘oku tau tui ko e ngaahi matakali ni na’a nau nofo’i kotoa pe ‘a e tokelau mo e lotoloto  ‘o ‘Alepea.  ‘Oku lava pe ke mahino’i ‘a e ni’ihi.  Ko Nepaiote, ‘a e foha lahi, ko hono hako ko kinautolu na’a nau nofo’i lahi ‘a e feitu’u ‘Iitomi.  Pea ‘oku fa’a lau fakataha kinautolu mo e kau Keta ‘a e ‘oku lavetotonu lave ki ai ‘a e Tohitapu ‘i he ngaahi potu kehekehe (‘Ais. 60:17; Sele. 49:28; ‘Isi. 27:21).  Ko Ietuli, ‘oku mahalo ko hono hako ‘ona ko e kau ‘Aitulia ‘oku ha ia ‘ia Luke 3:1.  ‘Oku ‘i ai foki ‘i he ngaahi keli fakatotolo ‘i ‘Asilia ha ngaahi hingoa hange ko e ‘Atape’eli, Masa, Nepaiote, mo Keta.  Pea ko Tuma foki ‘oku ‘asi ‘ia ‘Aisea 21:11 na’e “ui mei Seia”.  Pea ko Seia ko e ‘api nofo ‘anga i a ‘o e kau ‘Itomi.  ‘A ia ‘oku toe mahino mei ai ko e meimei kotoa ‘a e hako ‘o ‘Isime’eli na’a nau mei ma’u kotoa ‘ekinautolu ‘a e konga lahi ‘o ‘Alepea ‘i onopooni. 

Ko e konga mahu’inga ‘o ‘etau tokanga ki he ngaahi hako ‘o ‘Isime’eli koe’uhi ko e tala’ofa ko ia na’e fai ‘e he ‘Otua kia ‘Epalahame (17:20).  Manatu’i foki ‘i he mahino kia ‘Epalahame ‘e ‘ikai ke ‘ea ‘a ‘Isime’eli ka ko ‘Aisake pe, ko ia na’a ne kole ki he ‘Otua ke manatu’i pe mu’a ‘a ‘Isime’eli, ke ‘oua “na’a ngalo’’ (17:17).  Pea ko ‘eni ‘a e tali mai ‘a e ‘Otua, “Pea ko e me’a kia ‘Isime’eli, kuo ongo mai ho’o huu: ko ‘eni kuo u tapuaki’i ia, pea kuo u tu’utu’uni ke ne fanafanau, ‘o hoko ‘o lahi ‘aupito ‘aupito, pea ‘e tupu meiate ia ha pule'a‘anga lahi. 

Ako 4: Koe tukufakaholo ko Sisu

Senesi 25: 11; 24: 62; Kal. 4:28-31; Sione 8:56-58; Hep. 13:8

SEINI TA’EMOTU

‘I he malolo ko’eni ‘a ‘Epalahame kuo mahino leva ‘a e fakae’a hake ‘o ‘Aisake.  Ke mahino ko ‘Aisake pe ‘oku mahu’inga taha ‘i he fanau kotoa ‘a ‘Epalahame, he ko ‘Aisake ia ko ia ‘a e Tala’ofa ‘a e ‘Otua.  Pea ko ia pe ‘a e finangalo ‘o ‘Ene ‘afio.  Ko hono toe ‘o e fanau ‘a ‘Epalahame ko e loto pe ia ‘o ‘Epalahame. Fai pe ia ‘i hono loto fakaetangata.  Pea ‘a’asili pe ‘a e mahino mai ai ‘a e fo’i mo’oni ko ia ‘oku ta’e’aonga ki he ‘Otua ha ngaue ‘a ha tangata, neongo pe ko e ha hono lahi hono ‘aonga ‘i he lau ‘a mamani, ha’ane tokoni ‘i he kolo pe tokoni he kolosi kula, kau masiva mo e langa ‘o e ngaahi fale lotu.  Kapau na’e ‘ikai ke fakakouna’i ‘a e ngaue ia ko ia ‘e he laumalie ‘o e ‘Otua pea ko e ngaue ta’e’aonga ia mo maumau tainmi hange ko ia na’a tau lave ki ai ‘aneafi.  Mahalo pe ‘e ‘i ai ‘a e ni’ihi tenau pehe mai “’O maumau taimi ‘a e tokoni’i ‘o e masiva mo e paea na’e tu’utu’uni ‘e Sisuu’’.  ‘Io, ‘ai ke makehe ‘a e tu’utu’uni pe tataki fakalukufua (general guidelines) ‘a e folofola mei he fekau fakapatonu ‘a Sisu ‘oku lolotonga fai ‘e he laumalie, ‘a ia ko hono finangalo ia, ‘i he taimi ko ia.  Ka ’ikai ke tali ‘e he tokotaha ko ia ‘oku ne fai ‘a e tokoni’i ‘o e kau peaea ‘a Sisu, ‘o ko e toki toloveka lahi taha ia !! 

Na’e ‘i ai ‘a e tangata ma’u me’a ‘i ‘Amelika na’a ne foaki ‘a ‘ene fu’u pa’anga ‘o ne langa tokotaha ha fu’u fale lotu.  Lolotonga ia ‘oku nonofo fakasuva pe ia.  Kae fiefia foki ‘a e ki’i siasi ko ia na’e ‘onautolu ‘a e fale lotu, pea toe fakalotolahi ange pe ‘a e motu’a faifekau ki he motu’a ma’u me’a “’oku sai pe ia, ‘ou te ke tokang a koe ki ai ko e ‘atunga pe ‘o e mamani, ko e me’a mahu’inga pe kuo ‘omi ho’o pa’anga ke ngaohi ‘aki ‘a e fale ‘o e ‘Eiki!”.  Na’e taimi si’i pe mei ai, kuo mate ‘a e motu’a ma’u me’a ‘i he funga pe ‘o ‘ene kei fakasuva.  Fefe ‘a ‘ene ‘ofa na’e fai?  Na’e ‘ikai ko ha ‘of a ia ko e kakaa pe ia mo feing a ke fakamatalili ki he ‘Otua. 

Fakafeta’i ‘i he malolo ‘a ‘Epalahame kuo ‘i ai pe ha taha ke ne hoko atu ‘a e tauhi ‘Otua.  Pea ko ‘Aisake ‘a e fo’i “seini ’’ ko ia.   Kapau na’e ‘ikai ha ‘Aisake, ka ko ‘Isime’eli pe mo e fanga foha ‘e toko ono  kimui ‘a ‘Epalahame mo Ketula, ‘oiaue!  ‘e fefe ‘ala.  ‘a e hoko atu.  He ‘oku mo’oni foki ‘a e ‘aposetolo, “’e hokosi fefe ‘e he toto ‘a e me’a ‘a laumalie, ‘uma’a ha hokosi ‘e ‘auha ‘a ta’efa’a ‘auha”.  Ko e me’a ta’emalava ia!  Ko ia ko ‘Aisake pe na’a ne ma’u totonu ‘a e laumalie ‘o ‘ene Tamai.  Na’e ma’u pe ‘e hono toe ‘ona ‘a e sino ‘o ‘Epalahame, ka ko ‘Aisake pe tokotaha ‘a e fili ‘a e ‘Otua. 

Pea ko ‘Aisake, foki ko ia ‘a e taipe totonu ‘o Sisuu, ko e foha na’e tala’ofa mai mo kikite’i mei mu’a.  Pea ‘i he hoko mai pe ‘a Sisuu kuo ‘osi leva ‘a e kuonga ‘o e fuakava (kovinanite) motu’a fakataha mo ‘Epalahame.  Ko e fuakava fo’ou ‘eni ia ‘ia ‘Aisake pea na’e fakamonu’ia ia ‘e he ‘Otua.  Ko e ‘uhinga ‘o e tapuaki’i ko e “me’a kotoa pe na’e ‘ia ‘Epalahame” kuo ‘oange kotoa kia ‘Aisake,’o hange tofu pe ko e me’a kotoa pe ‘a e Tamai kuo tuku kotoa ki he ‘Alo kia Sisu Kalaisi (Sione 5:22,23).  Pea ko e Sisu ko ia na’e tapuaki’i mo fakahikihiki’i ‘e he Tamai, ko Ia ia ‘oku nofo ‘i hoto loto ‘i he ‘aho ni.  Ko e ‘Otua tatau pe pea Sisu tatau pe (Hep. 13:8).  Ko e laumalie pe ‘e taha, ‘a ia na’e ‘ia ‘Epalahame, ‘ia ‘Aisake pea ‘ia Sisuu pea ‘oku ‘iate kitaua (‘Efe. 4:4-6).  Ko ia ‘a e koloa ‘oku tau lehilehi’i mo ‘o’ofaki he ko e seini ta’emotu ‘o e mo’ui.  Pea koia ‘oku ‘i he mo’ui ko ia ‘oku nofo ma’u pe ia ‘i Pea-Lehai-lo’ai ‘ai a ko e mamata ma’u pe ki he 'Otua ‘i he ‘aho kotoa ‘o ‘ene mo’ui.

Ako 3: Ko e Mo'ui 'Aonga

Senesi 25:7-10; 35:29; 49:29; Sione 10:10

PEKIA KUO A’UA’U

Na’e mavahe ‘a ‘Epalahame mei Kalana ka ne kamata ke fononga ‘i he tui kuo ne ta’u fitungofulu ma nima (75) - Sen 12:4.  Pea fa’ele’i ‘a ‘Isime’eli kuo ne ta’u 86 (16:15,16).  Fa’ele’i ‘o ‘Aisake ‘i hono ta’u 100 (21:5).  Pea ‘i he mali ‘a hono foha ko ‘Aisake kuo ta’u 140 ‘a ‘Epalahame (25:20).  Pea ko ‘eni ‘i hono ta’u 175 kuo malolo leva (25:7).  Pea ko e ‘uhinga ‘o e fakakaukau a’ua’u, kuo ne polo’uto, kuo ne fonu pea mohu ‘i he mo’ui. 

‘Oku malie ‘i he’etau vakai na’e hili ‘a e fanau’i ‘o ‘Aisake ‘i he ta’u 100 ‘o ‘Epalahame, kuo hanga ‘e he ‘Otua ‘o toe ‘oange mo’o ‘Epalahame ha ta’u ‘e 75 kehe.  ‘A aia foki ko e ‘uhinga ‘a e ‘Otua, na’e fe’unga mo e ta’u ‘e 75 ‘a e nofo ‘a ‘Epalahame ‘i he kakano (‘a Kalana).  Pea ‘i he ma’u ko ia ‘e ‘Epalahame ‘a e tala’ofa ‘o e mo’ui ko Sisu Kalaisi ‘i hono teau’i ta’u.  Na’e toe mono faingamalie ange ‘a e ‘Otua ma’ana ‘aki ‘a e ta’u ‘e 75 kehe.  Pea ko e 75 ko ia ke fai ai ‘a e mo’ui ‘i he laumalie ‘i Kenani.  Ke holoholo’i ‘aki ‘a e ‘uluaki ta’u ‘e 75 na’e mo’ui ai ‘i he kakano ‘i Kalana.  Pea ‘oku tau malie’ia ai ‘i he ‘Otua ‘i he’ene fakatokanga me’a.  He ko kitautolu foki ia ‘oku tau mo’ui noa’ia pe. 

‘I he pekia ko ‘eni ‘a ‘Epalahame, na’e  telio ia ’'e ‘Aisake mo ‘Isime’eli.  Mahino ko ‘ena toki fakataha mai pe ‘i he pekia ‘a ‘ena tamai.  Pea ‘oku fa’a pehe pe ‘a e mo’ui.  ‘Oku toki fa’a malava pe ’e he mate ke ‘omi ha ongo tafa’aki ‘o fakalelei’i ‘o hange pe ko ia na’e fai ‘e Sisu ‘i he’ene pekia ke fakalelei’i kitautolu ki he Tamai. 

Na’e ‘ave ‘a e sino ‘o ‘Epalahame ‘o telio fakataha mo hono uaifi ko Sela ‘i he ‘ana ko Makipila ‘i he potu hahake ‘o Mamili.  Pea ‘oku toki pehe ‘e he konga kimui ‘o e veesi 8 “pea na’e ului ia ki hono kakai”.  ‘Oku ‘uhinga ia ki he ha?  Taumaia na’e toe ‘i ai ha taha kehe ia na’e tanu ‘i he fa’itoka ko Makipila, ngata pe ‘i he sino ‘o Sela.  Ka ko e ului ‘a ‘Epalahame ki he kakai fefe?  ‘Oku mahino ko e ‘uhinga ‘a e folofola ia ki he kau ma’oni’oni kuo nau hiki atu”.  Ko ia ‘a e kakai ‘o ‘Epalahame.  Ko e kakai na’a nau mo’ui fai ki he finangalo ‘o e ‘Otua.  Pea ko ha fu’u feohi’anga fakakoloa ia pea ko ia ‘a e feohi’anga totonu ‘oku hu atu ki ai ’a e kau ma’oni’oni kuo malololo.  ‘Amui ange foki ‘i he fuakava fo’ou kuo ui ‘a e fu’u feohi’anga ko ‘eni ‘a e kau pekia ‘ia Kalaisi ko e fatafata ‘o ‘Epalahame (lk. 16:32).  Ko e feitu’u ‘oku o ki ai ‘a e kakai kotoa pe na’a nau ma’u ‘a e tui, ‘o mo’ui ‘i he tui hange ko ‘Epalahame (Kal. 3:7&9). 

Pekia ‘a ‘Epalahame kuo a’ua’u.  Hange ko ‘etau lau ‘anenai, ko e pekia kuo a’ua’u ko e pekia kuo mohu mo fonu ngutungutu ‘i he mo’ui.  ‘Oku ‘ikai ha poini mahu’inga ‘o e mo’ui fuoloa ia, he na’e pekia pe ‘a Sisu ‘i hono ta’u tolungofulu tupu.  Ko e lea ‘oku ngaue’aki ‘i he Tohitapu fakapilitania ko e “full of years’’.  Ko hono ‘uhinga kuo fonu mo mohu ‘a e ngaahi ‘aho kotoa ‘o ‘ene mo’ui.  ‘O ‘uhinga tatau ia mo e fakakaukau ‘a Sisuu.  ‘ia Sione 10:10 ki he “mo’ui lahi ‘aupito” pe “mo’ui taulofu’u” (abundant life).  Ko e mo’ui ‘oku ‘uhinga (meaningful).  ‘Oku ‘ikai ke taumu’avalea mo nonoa’ia.  ‘Oku poini mo e kaveinga ‘a ‘Ene me’a kotoa.  Ka lea ‘oku poini, fakalongolongo ‘oku poini.  Ngaue ‘oku poini.  ‘Ita ‘oku poini.  ‘Oku lave ki ai ‘a Paula ko e mo’ui ‘oku ‘ikai ke “tuki matangi” ke tuki ‘ea!  Pea ko Sisu pe ‘oku poini.  Ko ia pe ‘a e taketi ‘o e mo’ui.  Ka ma’u ‘a Sisu pea ‘e ‘uhinga ‘a e me’a kotoa pe.  ‘Uhinga ‘a e ‘uho’uha, ‘uhinga ‘a e la’ala’a, ‘uhinga ‘a e ta’elava ‘a ‘ete folau ki muli, ‘uhinga ‘a e ta’ema’u ha me’a ke fai’aki ‘a e fakaafe pe kavenga.  Pea ka ne lea ‘oku ‘uhinga.  Ka ngaue ‘oku to atu hono ‘uhinga he ko e fai ‘e he ‘Otua.  Ko ia ‘a e mo’ui a’ua’u.  ‘Oku faikehekehe ia mei he mo’ui toloveka.  ‘Oku ‘i ai ‘a e ni’ihi ia ‘oku nau mo’ui loloa mo fuoloa ‘o onongofulu tupu ka ko e toloveka ‘ata’ata.  ‘O ‘uhinga, mo’ui maumau’i ‘a e taimi, he ka toki ‘ia Sisu pe ‘a e taimi pea ko ‘ene toki ‘aonga ia.  ‘Io na'e faka’aonga’i ‘e ‘Epalahame hono ki’i miniti kotoa ma’a e ‘Otua pea fielau ‘a e mohe mo a’ua’u hono ngaahi ta’u.

Ako 2: Sisu ko e Monu'ia'anga

Senesi 25:1-6; I Kalo.1:32,33; ‘Emosi 3:2; Loma 9:15-18; 9:6-8

KOLOA KOTOA KIA ‘AISAKE

Ko ‘Epalahame ‘eni kuo toe ma’u uaifi, ko e fefine ko Ketula pea ko Ketula ‘i he fakamatala ‘a e Tohi Kalonikali tokua ko e sinifu pe ‘a ‘Epalahame, ‘o hange pe ko Heka’aa.  ‘Oku pehe tokua ‘e he ni’ihi ko Ketula na’e nonofo pe ia mo ‘Epalahame lolotonga ‘a e kei mo’ui ‘a Sela, ka ‘oku ‘ikai ke ngali ko e totonu ia ‘i he anga ‘o e tu’u ‘o e fakamatala ‘o e ngaahi veesi ‘oku tau lau ‘i he pongipongi ni.  ‘Oku mahino ‘aupito pe na’e ‘ofa ‘aupito ‘a ‘Epalahame ‘ia Sela pea nofo taha pe ki ai.  Pea ‘i he toki malolo pe ‘a Sela pea toki to’o ‘e ‘Epalahame ‘a Ketula mo’o hono uaifi. Pea na’e ma’u ha fanau ‘a Ketula kia ‘Epalahame ko e toko ono.  ‘Oku ‘ikai ke loko mahino ‘a e ‘uhinga na’e toe mali ai ‘a ‘Epalahame.  Ka ‘oku mahino pe na’e ta’elata hili ‘a e pekia ‘a Sela, pea kau pe ki ai mo e palomesi ko ia na’e fai ‘ia Senesi 17:4, “pea te ke hoko ko e tupu’anga ‘o ha fuifui pule’anga”.  ‘O ‘ikai pe ‘uhinga ko e fanau pe ‘i he tui ‘o hange ko ia ‘ia ‘Aisake, ka ko ha toe fanau kehe foki ‘i he kakano.  Pea ‘oku mahino ‘a e mofele mo e va’ava’a ‘a ‘ene fanau mo hono ngaahi hako mei he ngaahi hingoa pe ko ia ‘ene fanau ‘e toko ono. 

‘I he fanau ko ‘eni ‘e toko ono ‘a ‘Epalahame, ko Similani, ‘Isapaka, Metani mo Suaa ‘oku ‘ikai ke mafakatotoloa’i kinautolu.  ‘Oku ‘ikai pe ke ‘ilo pe ko fe honau hako.  Ka ko Siokatame ‘oku malava ia ke ‘ilo koe’uhi ko hono ongo foha ko Sipa mo Tetani.  Ko e ongo tama ia ‘oku toutou ‘asi hona hingoa, mo hona ongo hako, ‘i he ‘u potu tohi lahi ‘i he Tohitapu.  Pea ko e tama ‘e taha ‘a Ketula ko Mitiani, ko e tokotaha ia ‘oku toutou takua ‘i he Tohitapu fakataha mo hono ngaahi hako.  ‘Oku mahino ‘aupito mei he Folofola ‘a e fa’a faaitaha ‘a Mitiani mo e kau ‘Isime’eli (Sen.37:25) ha’a Moape (Nom.25:1,6-15), pea mo e ha’a ‘Amaleki (Fkmaau 6:3). 

Ka neongo foki ‘a e fanau ko ‘eni ‘e toko ono ‘a ‘Epalahame na’e ‘ikai pe ke toe veiveiua ‘a e hu’ufataha ‘a e me’a kotoa pe ia kia ‘Aisake.  Na’e ‘alu kotoa mo e tapuaki mo e mo’ui kia ‘Aisake taha pe.  Pea ‘oku tau fakamo’oni ai pe ‘a e neongo ‘a e lahi ‘o e kakai ‘o mamani, ko e fakatupu ‘a e ‘Otua,  ka ‘e ‘ikai te nau to’o ‘ekinautolu ‘a e tu’unga ‘ea ‘o Sisuu mo hono hako ki he ‘Otua.  ‘Oku fu’u munoa foki ‘a e tokolahi ‘o pehe tokua ko e fanau kinautolu ‘a e 'Otua.  ‘Oku taha pe ‘a e ‘Alo ‘o e '’Otua ko Sisu Kalaisi.  Pea ko kinautolu pe te nau tali ‘a Sisuu ko kinautolu pe ‘e ui ko e fanau ‘a e ‘Otua (Sione 1:12).  Kapau ‘e ‘ikai te ke tali ‘e koe ‘a Sisu, neongo ha’o poto mo ha’o ma’u mata’itohi toketa Tohitapu, pe ‘oku ke ma’u ha lakanga ma’olunga he pule’anga pe siasi, pe hou’eiki pe nopele, ko e “me’a fakatupu’’ pe koe ia ‘o tatau mo e fu’u mango, mei, kosi, moa mo e ha fua.  Pea ‘oku tauhi fakame’a fakatupu pe koe ia ‘e he ‘Otua, ‘o hange ko ‘Ene tauhi ki he fanau ko ‘eni ‘e toko ono ‘a ‘Epalahame mo Tetula.  Ko ho’o toki tali pe ‘a Sisuu pea ke toki hoko ko e taha ‘o e ngaahi fanau pele ‘a e ‘Otua pea ‘e tauhi faka-‘Aisake koe.  ‘E tokanga’i koe ‘e he ‘Otua ho’o tu’u hake mo ho’o nofo hifo.  Te Ne tauhi ho’o laka mo fokotu’utu’u ho ‘alunga.  Pea te ke monu’ia ‘i ho kotoa koe’uhi pe ko Sisu ‘oku ‘iate koe. ‘Oku ke tokanga’i foki mo e me’a ko’eni.  Neongo ko e fanau kotoa ‘a ‘Epalahame, ‘a ‘Iseme’eli, ‘Aisake mo e toko ono ko’eni ‘a Tetula.  Ko ‘Aisake pe na’e monu’i, he ko e me’a ia ‘a e ‘Otua.  Ko ia ‘ou a ’'e fai ha futa ia ‘o pehe te te monu’ia ko e foha kita ‘o ha feifekau, pe ko ha ma’oni’oni.  Ko ‘Isime’eli tele ‘e ko ‘ene tamai ko ‘Epalahame ko e taki ‘o e kau ma’oni’oni mo e tamai ‘a e kakai Tui, ka na’e ‘ikai malava ai ke fakahaofi ‘a ‘Isime’eli ia mo e toko ono kimui mei he mala’ia ta’engata.  Ko ia tali ‘e koe ‘a Sisu tukuange ‘e koe ho’o tamai, faifekau, na’a mo ia pe ‘oku lava ai pe ‘ikai!  Lau ‘a Matiu 3:9 pea ke sio ai ki he pakupaku ‘a e me’a ko e fuataki.  Ka ‘i ai ha polepole ko ‘ete viki pe ki he ‘Eiki.  (I Kol.1:31) 

Ke tokoni atu ‘a e laumalie ‘o e ‘Otua kiate koe ke ke mahino’i ‘aupito ‘a e mahu’inga ho’o ‘ia Sisuu koe’uhi ke’iai ha pauni mo mafamafa ho’o mo’ui kiate Ia.  Tau sio pe ki he Fuakava Motu’a ‘a e lehilehi’i pe ‘e Sihova ‘a e fanau ‘a ‘Isileli (hako ‘o ‘Aisake) kae ‘ai’ainoa’ia pe ‘a e kakai kehe.  Malaki atu ’a Seliko, tanu atu ‘a Mitiani, faka’auha atu mo Filisitia, pea laiki atu mo ‘Asilia hange ha ‘ai ha me’a mate (ka toe ha?  Koe me’a fakatupu foki!).  Ko e fai kotoa ke fakahaofi ‘a ‘Ene fanau ‘a e ‘oku nau tu’u ‘ia Sisu Kalaisi (Loma 8:1).  ‘Oku ke kau ai ?  Fakatauange pe ‘oku pehe.