Thursday, September 9, 2010

Ako 1: Pule 'a Sisu he mo'ui



Senesi.24:64-67; II Kolinito. 11:2; ‘Efeso. 5:25-27; I Tesalonaika. 14:17

KO E ‘AHO TA’ANE
‘Oku mahino na’e tangaki hake ‘a Lepeka ‘o na fesiofaki pe mo ‘Aisake, mei he mama’o, ‘i he taimi pe ‘e taha.  He ko e laumalie pe ‘e taha na’a ne ha’i kinaua, pea kuopau ke tatau ‘ena me’a kotoa pe.  Pea tatau ai pe ‘a ‘ena taimi.  ‘Ilonga ‘akinautolu ‘oku nau ma’u ‘a e laumalie ‘o Kalaisi, ‘oku nau fefakamo’oni’aki pea feongoongoi honau laumalie ‘i he me’a kotoa pe.  Pea ‘oku nau fe’ilongaki.  Na’e pehe pe hono ‘ilo ‘e Sione Papitaiso ‘a Sisuu, na’e te’eki ke na fetaulaki kimu’a, ka na’ea tala pe ‘e he laumalie.
 
‘Oku pehe ‘e he veesi 64, ‘i he sio pe ‘a Lepeka kia ‘Aisake, na’a ne hopo leva ki lalo.  Ko hono fakalea totonu na’a ne to ki lalo mei he kameli.  Na’e pehe pe ‘a e ngaue hono loto ‘i he momofi mai ‘a e fotu ‘a ‘Aisake.  ‘Oku pehe pe ‘a e ongo’i ‘a e tangata angahala ‘i he taimi ‘oku fetaulaki ai ‘a ‘ene mo’ui mo e Mo’ui ‘a e ‘Eiki.  Ko e vave ‘aupito ‘a ‘ete to ki lalo ‘i he momofi ‘o ‘Ene ha mai.  ‘O mo’onii ‘a e lea ‘a e punake, “Sisu fotu ‘i he toko mano’’.  ‘Oku mahiki hake pe ‘a Sisu mei he toko mano ‘o fotu makehe.  Toe fakalea tatau pe ‘e he punake ‘a e fo’i fakaukau mei he tafa’aki ia ‘e taha. "Sisu ko ho’o ha mai e, Ko e ‘u masani pe." Ko ia tofu pe ‘a e fa’ahinga ongo na’e ‘i he loto ‘o Lepeka ‘i he’ene mamata kia ‘Aisake.


Pea ‘i hono fakapapu’i ange ko ‘Aisake ia, na’a ne ‘ai leva ‘a e pulou ‘o ‘ai ‘i hono mata.  Ko e ‘ai ‘a e pulou pe veili ‘i he mata ‘o e kakai fefine, ko ia ‘a e tu’unga faka’apa’apa totonu ‘oku fai ‘e he fefine ‘oku te’eki ke mali.  Pea tautautefito ‘o ka ‘oku ‘oatu i a ke fakafe’iloaki kiate ia ‘e ta’ane mo ia.  Ko e faka’ilonga ‘o ‘ene kei taupo’ou, ‘o ‘ikai ko ha fefine kuo “alafia’’.  ‘Aia ko hono pulou ko hono langilangi'ia ‘o hange pe ko e lau ‘a Paula ki he totonu ke ‘ufi’ufi pe ‘ai veili ‘a e ‘ulu ‘o e kakai fefine ‘i he falelotu (I Kolinito 11:5,6)


Pea ko ha toki momeniti mahu’inga mo’oni ‘eni ‘a e fononga ange ‘a Lepeka kia ‘Aisake, ko hono ‘Eiki ta’ane, kuo ‘osi ‘ai veili.  Ko e ‘aho ta’ane!  Koe taipe totonu ‘eni ‘o e '’oatu ‘o e Siasi ko e fefine kia Sisu Kalaisi ko e ‘Eiki Ta’ane.  Pea ko Lepeka ko ia ‘a e Siasi, ko e “ ta’ahine molumalu’’ (II Kol. 11:2), ‘oku ne hoko atu ke fakafetaulaki ki hono ‘Eiki (Sione 3:29; Loma 7:4).  Pea ko e Siasi ko kitaua pe ia.  Ko kitaua ‘a e Lepeka.  Ko koe ‘a e Lepeka.  Na’e fakamelomelo ‘i koe, ho tu’unga ‘ia Kalaisi, ‘e Lepeka mei ono’aho.  Ko Lepeka:


  1. Ko ‘ene mali na’e toka tu’utu’uni (‘Efe. 1:3,4); 
  2. Ko e  fakakakato’anga ia ‘o e palani mo e kaveinga ‘a e ‘Otua (‘Efe. 1:23);  
  3. Na’e teu’i pe ke fe’inasi ‘aki mo e ‘Alo hono naunau (Sione 17:22,23);  
  4. Na’a ne toki ‘ilo’i pe ‘a e ‘Alo fou ‘i he “tamaio’eiki’’, ‘a e laumalie Ma’oni’oni ko e Taukapo, 
  5. ‘I he’ene ‘ilo’i pe ko ‘ene mali kuo ‘osi teu, na’a ne nima mo e va’e ke fononga leva ki he ‘Eiki Ta’ane.  (I Pita 1:8);  
  6. Na’a ne fononga fou atu he toafa, ‘o tataki pe ia ‘e he sevaniti (I Pita 1:3-9); 
  7. Na’e ‘ofa’i ia ‘e he ‘Alo, pea ne tauhi ia ‘o feohi ta’engata mo ia (‘Efe. 5:26,27; Fkh. 19:7; I Tes. 4:17). 
Ko e ‘aho fakafiefia ia ‘a e ‘aho kuo kakato ‘a e pule ‘a Sisu ‘i he’ete mo’ui.  Kuo Ne ma’u kita ma’ana, pea kuo te ma’u Ia ma’ata (Sione 15:4), he ko ia ‘a e “mali’’, ko Ia ‘iate kita, mo kita ‘iate Ia.  Ke tau fenofo’aki.  Pea ‘e ‘i ai ‘a e’aho te tau lau fakataha mo Paula, ko e mo’ui ‘oku fai, “’oku ‘ikai kei ko au, ka ko e mo’ui ‘oku fai ‘e Kalaisi ‘iate au” (Kal. 2:20).  Pea ko ia ‘a e  ‘Aho Ta’ane.  Ko e ‘aho kuo papau ‘a e pule ‘a Sisu ki he’ete mo’ui.  Pea ‘e ‘ikai pe ke fiemalie ‘a Sisu ia kae’oua pe ke ma’u kakato ki He’ene pule.