Senesi 25:29&30; Saame 37:19-25
MO’UI FAKA’O’ONOA
Kuo fai ‘a e takai holo ‘a ‘Isoa ‘i he’ene tuli manau ‘i he’ene taka vao, pea ‘i he ‘aho ni, kuo ne a’u ki he hela’ia. Pea ko e tu’unga totonu pe foki ia ‘o e fa’ahinga me’a ko ia ko e tulia ‘o e malie ‘o e mamani. ‘Oku ‘ikai teitei ma’u ha me’a ia. He na’e totonu foki ke ne ma’u mai ha me’a, pea mei he’ene tulimanu. Ka ko ‘eni kuo a’u mai ia kuo ‘ikai ha’u ia mo ha me’a, ko e me’a pe na’a ne ma’u ‘o ne ha’u mo ia ko e ‘aungalua ‘i he fiekaia ! ‘Oku lahi ‘a ‘ene kai nge’esi ‘i he “vao”. Pea fu’u lahi mo ‘ene mama’o mei ‘api, mama’o mei he ‘api mo e mo’ui faka-’Ootua. Fu’u lahi ‘aupito ‘a ‘ene ‘afungi, pea mo e ta’e fiefanongo ki ha akonaki pe fale’i ‘o kau ki he’ene maumau’i ‘a e taimi. A’u ki he ‘aho ni kuo a’u ki he ‘aungalua ‘i he fiekaia.
Taumaia ke mahino kiate kitautolu ‘a ‘etau fa’a tali teke’i ‘o e me’a mahu’inga pe ko ia ‘e taha ‘i he mo’ui, ‘a Sisu Kalaisi. Ko e me’a’ofa fungani pe ia ‘e taha ‘oku ‘i hevani, ko e mo’ui ‘a Sisu Kalaisi. Pea na’e hoko ‘a e ‘Otua ke ‘auha ‘i he funga kolosi koe’uhi ke foa’i ‘a e lolo na’ati ‘o hevani, hei’ilo na’a ‘inasi ‘a e tangata mo e fefine kotoa pe ‘i hono manongi. Pea ‘oku ongo ki he “mafu tefua” ‘o e ‘Otua ‘a hono ta’etoka’i mo hono fakasikaka’i ‘a e fu’u koloa ni. ‘O ‘ikai pe ke pehe atu ‘e mamani ia pe koeha. Fai pe ‘ene me’a ‘i he fakatoli’a ‘a hono loto ‘o fakatatau ki he ‘ene poto. Ko ia kotoa na’e fai ‘e ‘Isoa. ‘Osi ange kiai ‘a e mo’ui mo e taleniti mo e tapuaki. Pea ko e ‘uhinga ke ne toloveka’aki, ka na’e ‘uhinga ke tataki mamalie ia ki he ‘Otua, ‘o faka’ai’ai ‘ene mo’ui ke fehumalie’aki mo e tapuaki mo e kelesi fakakalaisi. Ka ko e ha ‘a e me’a na’e hoko? ‘Oku tatau pe ‘a e vao mo e fakakaukau ‘o e “fonua mama’o” ‘i he talanoa ‘o e foha maumau koloa (Lk. 15:11-32), pea ne foki ki ‘api kuo mole kotoa!
‘I he’ene foki ki ‘api, ‘o ne ‘ilo hono tehina “ta’e ‘i ai hano taleniti” ‘oku ‘i ai ‘a ‘ene me’akai. Na’e ‘ikai ‘alu hono tehina ‘ona ia ‘o “ngaue” pe tulimanu, ka na’a ne nofo pe ia ki ‘api, pea ‘oku ‘i ai pe ‘a ‘ene me’akai. Me’a sai ko e nofo tonu e! ‘e ‘ikai pe ke ‘i ai ha taimi ia ‘e hala ai. ‘E ‘ikai pe ke tuenoa pe fiekaia. Masiva pe li’ekina. Pea ‘oku mo’oni ‘a e lau ‘a e Saame. Na’a ku talavou pea kuo u motu’a ka kuo te’eki ke u mamata ki ha ma’oni’oni kuo li’aki, pe ko hono hako kuo kole me’akai (Saame 37:25). ‘I he fa’a nofo ki he ‘Eiki ‘oku mohu pe ‘a ‘ete mo’ui ‘i he taimi kotoa. Pea te te hoko kita ko e kolo hufanga pea moha “feleoko” ki he kau ‘alu noa ‘i he vaa’ihala ‘o e mo’ui. Pea na’e pehe ‘a e tu’u ‘a Sekope kia ‘Isoa ‘i he’aho ‘o ‘ene ma’u ki he’ena tu’u, faifainoa pe ia kae anga maopo pe ‘a Sekope. Kamata ‘i he ‘aho ni ‘a ‘ene fakatokanga’i ‘oku hala. He ko e tesi ‘o e mo’ui ‘a e me’a ‘oku fa’o ‘i he tangata ‘i he ‘aho ‘o e faingata’a. Pea ne kole ange leva kia Sekope ha konga ‘o e me’a ‘oku ne ma’u. Ka ko e mo’ui foki ‘a Sekope na’e ‘ikai ko e toki tunu hake pe pea kula leva. Pea ko e totonu kia ‘Isoa ke ‘alu hake pe ia ‘o kuki ha’ane me’akai. He neongo ‘a ‘ene vale ‘o li’aki noa ‘a e faingamalie ‘o ne va’inga ‘aki ka na’e kei ‘ata pe kiate ia ‘a e mo’ui. ‘Oku kei taimi pe ke fai ha’ane sepo kula ‘ana. Ka na’e ‘ikai foki fiemo’ui mamahi ‘a ‘Isoa ia! Na’a ne fiema’u pe ‘e ia ‘a e mo’ui, ‘a e mo’ui na’e ‘ia Sekope, ta’e fie kalusefai. Ta’efie pupuha’ia pe fiemata vela, ‘io na’a ne fiema’u faingofua pe ia ‘a e “momona” ‘o e fononga. Pea ko e ako ia kiate koe mo au ‘i he ‘aho ni. Ke tuku ha’ata feinga ke ta ta ‘a Sisu ia ‘i hota sino. Pea ‘oku ‘ikai ko ha ki’i ta pe ‘i ha ‘aho ‘e taha ka ko e ta ‘i he ‘aho kotoa pe ‘o e fononga. Ko ia tali ‘a Sisu pea mo ‘ene tukituki ‘a e ‘oku lolotonga fai atu ki ho loto ‘i he ‘aho ko ‘eni, he ka pau ‘a e tu’u ‘i he ‘aho ni ‘e ‘ikai teitei mole ‘a e ‘aho ‘apongipongi.
No comments:
Post a Comment