Sen. 29:21-24; Saa. 89:14; ‘Emo. 5:23-24
FAI HALA ‘A LEPANI
Kuo 'osi 'eni 'a e ta'u 'e fitu 'o e ngaue 'a Sekope kia Lepani koe'uhi ko Lesieli. Pea hange kuo 'ikai ke manatu'i 'e Lepani ia 'a e alea na'e fai. Ka 'oku mahio foki na'e to atu hono fai 'e Sekope ia e ngaue ki hono lelei taha. Pea mahalo na'e ki'i ongo'i 'e Lepani ia 'e 'osi 'a e ngaue 'a Sekope, ka kuo lahi 'a 'ene 'u me'a 'ana kuo malavalava. Pea ko e pehe ke 'ikai ke kei malavalava hono 'ikai na'e ngaue pe 'a Sekope mo e fakatu'amelie lahi kia Lesieli, pea ko e hulu 'a 'ene 'ofa kia Lesieli, ko e me'a ia na'e fu'u lahi pehe fai ai 'a 'ene ngaue.
Ko ia na'e pau ke fakamanatu ange 'e Sekope kia Lepani ke tuku mai a hono uaifi ke na mali. Na'e fai leva 'e Lepani ha katoanga. Ko e anga maheni 'o e feitu'u ko 'eni ka fai ha mali, kuopau ke fai ha katoanga fe'unga mo e uike 'e taha hili 'a e po 'oku fai ai 'a e mali, 'a e po 'oku foaki ange ai 'e he tamai hono 'ofefine ki he tangata kuo na teu mali. Pea 'oku tau tui ko ia kotoa pe na'e fai 'e Lepani 'i he mali ko 'eni. Ka 'i he po 'o e mali na'e fai 'e Lepani ha me'a kehe. Na'e 'ikai te ne foaki ange 'e ia kia Sekope 'a Lesieli, hono 'ofefine si'i, 'a ee na'e fai ki ai 'a e alea, kae 'oange 'e ia hono 'ofefine lahi 'a Lia!
'Oku tau tokanga'i leva kuo kamata ke mamamio 'a Lepani. 'Uluaki kamata pe mei he'ene fakaongotuli 'i he 'osi 'a e taimi 'o e ngaue 'a Sekope, pea ko 'eni kuo ne 'oange 'e ia ha ta'ahine kehe. 'Oku lahi ha ngaahi 'uhinga 'oku ngali ke tau fakatonulea ki ai 'a e fai pehe 'a Lepani, ka tau ki'i sio pe ki he ngaahi fakakaukau ko 'eni. 'Uluaki tau tui pe na'e fu'u fiema'u 'aupito pe 'e Lepani ia 'a Sekope ke ne ngaue'aki. Mahino pe na'e fu'u falala'anga. Toe sai foki mo 'ene 'ilo'i 'a e 'Otua pea mo'ui 'apasia 'aupito ki ai. Fai kehekehe ia mo e kakai 'o Kalana, ngaue lahi pe ka 'oku toe lahi ange 'enau kakaa, 'a e fa'ahinga mamio pe ko 'eni 'oku fai mai 'e Lepani kia Sekope. Pea 'oku mahino pe foki na'e fakamatala ange 'e Sekope hono tapuaki'i ia 'e 'Aisake kae'uma'a 'ene misi 'i Peteli. 'O fakamahino mai te ne matu'aki tu'umalie, pea na'e kau mo e me'a ko ia 'i he'ene ta'efie tukuange hono 'ilamutu. Pea mahalo ko e konga ia 'e taha na'a ne tuku ta'ofi ai pe 'a Lesieli kae tuku mai 'a Lia. He 'oku 'ilo'i pe 'e Lepani 'a e 'ofa mo'oni 'a Sekope 'ia Lesieli, pea 'e 'ikai te ne ta'ekikivi pe ia ke na mali.
Kaekehe pe ko e ha 'a e 'uhinga 'a Lepani 'i he fakamono 'o Lia ka 'oku mahino mai pe kuo ne fai kakaa. Kuo ne fai ta'etotonu mei he alea na'e fai. Pea ke tau sio foki ki ai, 'a e fa'a hoko ko e 'ahi'ahi kiate kitautolu 'a e kakai 'oku ma'u ai 'etau me'a. Koe'uhi ko 'etau kai mei ai pea 'oku 'ikai ke tau fa'a lava ke tukuange. Kuo 'i ai pe ha ki'i tangata ia kuo nofo mai ki hotua 'api, pea 'oku pa ngofua mo fa'a ngaue kuo tau loto kitautolu ia ke ta'ofi ma'atautolu koe'uhi ko e malavalava 'etau ngaahi ngaue. Pe ko ha taha 'oku ma'u ha'ane ki'i ngaue pea 'oku poto 'i he anga, toutou 'omi pe e seniti 'a e tangata'eiki pe fine'eiki 'i he'ene ngaahi vahe. Pea 'oku loto kitautolu ia ke 'oua 'e toe hiki, 'io, 'o a'u ai pe ki ha'ane pehe mai, kuo ne ongo'i mei he 'Eiki ke hiki. Pea tau toki nofo hifo kitautolu 'o faka'eke 'ene ongo'i mo talaange 'oku tau fa'a ongo'i pehe pe ka 'oku 'ikai ko e finangalo ia 'o e 'Otua, pea tokanga'i pe ke 'oua 'e fai ha falala ia ki he'ete "ongo'i"! Tonu ke tau tokanga he ko hotau 'ahi'ahi pea telia na'a tau hange ko Lepani.
Ko e toe hala 'e taha 'a Lepani, pe ako e hala tatau ia 'atautolu, ko 'ene fakamono 'a Lia kia Sekope. 'Oku tapu 'aupito 'a e fakamono ia 'i he mo'ui faka-Sisu Kalaisi. Na'e 'ilo pe 'e Lia 'a 'ene mo'ui faingata'a'ia 'i he 'ikai ke teitei 'ofa ai 'a Sekope, pea ko e meimei kotoa 'o 'ene fanau ko e fakahingoa pe 'o makatu'unga 'i he'ene "hahanu vavale" 'a e ta'e'ofa ange ki ai 'a Sekope. Ko ia tau fakaongoongo ki he finangalo 'o e 'Otua kae 'oua 'e fai'aki ho'o sio fakakakano mo fakatevolo he 'e toe lahi ai 'a e palopalema. Tau fai ia 'i he 'aho ni. Falala ki Ai 'i he ngaahi me'a iiki 'o e mo'ui he ka hoko mai 'a e ngaahi me'a lalahi hange ko e mali, 'oku 'ikai pe ke te ongo'i faingata'a'ia ai.
No comments:
Post a Comment