SEN.29:25; 37:32-36; Saa.139
KO E HA 'ENI KUO KE FAI?
'Ikai ke fakamatala 'a e Tohitapu, pea na'e 'i fe'ia 'a Lesieli lolotonga 'a e hoko 'a e 'u me'a ko 'eni. 'Oku mahino pe na'a ne nofo pe 'i honau 'api, ka 'oku 'ikai ke mahino pe na'e kau 'i he kai 'o e uike katoanga mali 'a hono ta'okete pe 'ikai. Ko e me'a pe 'oku mahino, ko ha uike faingata'a 'eni kiate ia. Mahalo pe na'a ne nofo pe 'i hono loki mo e loto mamahi. Ka 'oku tau fakatumutumu 'i he fa'ahinga mo'ulaloa ko ia mo e talangofua na'e fai 'e he ongo fefine ni. Tuku hona loto kae fai pe 'a ia 'oku loto ki ai 'a 'ena tamai. 'Oku lahi foki 'a 'etau fa'a sio 'a kitautolu ki he loto mamahi 'a Sekope, kae ngalo 'iate kitautolu 'a e kavenga tatau pe he loto 'o Lesieli. Ka na'e 'ikai pe ha lea 'e 'asi mai. Fakalongo pe, 'o tatali pe kiate Ia 'oku pule.
Kaekehe 'i he ma'a hake 'a e 'aho ni, kuo 'ilo 'e Sekope 'a e me'a kuo fai 'e Lepani. Ko ia na'a ne fakatovave atu kia Lepani mo e tekelili lahi 'aupito, "Ko e ha 'a e me'a ni kuo ke fai kiate au?.... ko e ha kuo ke kakaa'i ai au?" Loto mamahi lahi 'a Sekope. 'Osi e 'a e ta'u 'e fitu mo 'ene ngaue fakamaatoato kia Lepani koe'uhi ko Lesieli. Pea na'a ne fu'u fakana'una'u 'aupito ki ha'ana mali. Fai 'a e mali, loi 'a Lepani! Kuo kakaa'i ia 'e Lepani! Ko 'ene lau ia 'i he pongipongi ni, "Kuo kakaa'i au 'e Lepani ... kuo kakaa'i au 'e Lepani". "Ka ko e ha nai hono 'uhinga? Kovi 'eku ngaue? 'Ikai ke ne fie homo mai 'a Lesieli? Ko e ha nai 'a e 'uhinga?" Lolotonga 'a 'ene laulau pehee, mokomoko hono 'atamai, "ko e ha nai?" Mo e fakalau mai 'a e mata 'o 'Isoa. Pea foki mai mo 'ene manatu ki he me'a ko ia na'e hoko 'i he pongipongi ko ia 'i Peasipa 'i he ta'u 'e fitu kuo hili. Kuo ne manatu'i kakato 'a e fa'ufa'u na'e fai, 'a 'ene kakaa'i 'a e tama lahi. Pea ko ia 'eni, ko e lahi 'ia Lesieli, na'a na toko ua pe, hange pe ko ia mo 'Isoa. Ko e ha'u nai 'a Lia 'o sauni 'a 'Isoa? 'Ikai ko ia pe ka kuo ne sio loto ki he tangata'eiki, 'a 'Aisake, na'e nenefu 'ene sio. Ko 'eni nai ia 'oku hoko 'i he fakakuikui 'o Lia? Pea ko Lepani .... 'ikai ko e tuonga'ane 'eni 'o 'ene fa'ee! 'a Lepeka! 'a Lepeka ko 'eni na'a ne 'atamai'i 'a e fo'i kakaa na'e hoko. Pea ko e fo'i "'atamai" nai 'eni kuo ha'u ki Kalana? Fifili ka ko ha fifili na'e fai 'e Sekope. Mamalie pe 'a e 'a hake hono mata. Matuku atu hono kita he kuo ne tui ki he lau, "Ko e tenga te te too te te utu pe ko ia 'o ka hoko mai 'a e poo". Ko ia 'a e fekau ki he 'aho ko 'eni.
'Oku 'i ai 'a e ngaahi me' akovi kuo hoko mai ki he'ete mo'ui. Pea 'oku te fa'a 'ita mo lotomamahi, 'o 'ikai toe ha taha 'ete 'ita ki ai, pea te lau 'a 'enau kakaa mo 'enau faihala. Ka 'oku totonu ke te ki'i tu'u si'i hifo 'o fehu'i "ko e ha 'eni kuo fai mai?" 'Eke hifo pe kiate kita. Kuo u tui te te ma'u ai pe 'a e tali. 'Oku 'ikai 'aupito ha teitei faihala 'a e 'Otua ia 'i he mo'ui ni. 'Oku tonu 'a e me'a kotoa pe ka ko kita pe ia 'oku hala. Pea ko e faingata'a 'oku hoko mai ko e hoko mai pe ia ko hoto fakakoloa. Ki'i tu'u si'i hifo pe 'o talaange ki he 'Otua ke Ne fakaha atu pe ko e ha 'a e me'a 'oku fehalaaki 'i ho'o mo'ui? Neongo ko ha me'a na'e fai 'i he 1951, 'e 'ikai pe ke mole ia pe ngalo. Kae'oua pe ke 'o hake kia Sisu Kalaisi. Fakalave ki Hono ta'ata'a pea 'e 'ufi'ufi kotoa 'a 'etau ngaahi angahala. Tau tali ia 'i he 'aho ni, he 'oku ne ha'u mo ia ha MA'A ke tafi'aki hotau ngaahi mousa'a.
No comments:
Post a Comment