Ako 57: Ngaue koe'uhi ko Sisu pea 'e ma'ama'a 'a e me'a kotoa pe.

Sen. 29:20; Kol. 3:22-24; Kal. 5:6

HANGE PE HA NGAAHI ‘AHO SI’I

Na’e fakangofua leva ‘e Lepani ‘a Sekope ke ne ngaue leva kiate ia ‘i heta’u ‘e fitu ‘o fakatatau ki he’ene kole.  Hange ko ‘etau lau ‘aneafi na’e mei lava pe ke foaki ange ‘a Lesieli ta’engaue’i kae vilitaki pe ‘a Sekope ke ne ngaue’i.  Mahalo pe ‘oku ne ongo’i ‘oku fu’u ta’efe’unga ‘a e faka’ofo’ofa ‘o Lesieli ke foaki fua mai pe.  ‘Aonga pe ke ngaue’i ke mahino ko e fefine mahu’inga!  Pea ‘ikai foki ke toe veiveiua ‘a Sekope ko ‘eni pe ‘a e fili ‘a e ‘Otua ma’ana pea ‘oku fiefia pe ia ke ngaue’i.  Na’e ‘ikai ko ha me’a loloa ‘a e ta’u ‘e fitu kia Sekope, na’a ne ngaue’i ‘a e ngaahi ta’u ko ia ‘o ‘osi kae hange pe ha ngaahi “’aho si’i pe”, koe’uhi ko “’ene ‘ofa kiate ia”.  ‘Io ‘oku ‘ikai pe mo hame’a ngaue lelei ia ‘i he mo’ui ka ko ‘ofa.  Ka fai ha’ate ngaue ka ‘oku nofo ‘a ‘ofa ‘i hoto loto, ko e ngaholo ‘a ‘ete fai ‘a e ki’i ngaue ko ia.  Hanga ‘e he ‘ofa ‘o huuki kita ki he ngaue ‘o te fai ‘osikiavelenga ai.  ‘Ikai ha ngaue faka’api kehe.  Ngaue malohi mo ngaue lelei ‘i he ‘aho kotoa pe.  ‘Ohovale pe kuo ‘osi ‘a e taimi ia. ‘Oku mahino foki ai ko ‘ete ngaue tu’u ‘i he ‘ofa ‘oku ‘ikai lau ha’ate hela ka ko e fiefia pe. 

‘Oku pehe pe ‘a e totonu ke te ngaue mo fanongo pe ‘i he mo’ui ni mo tukuloto’i pe ‘a Sisu.  ‘I he’ete fa’a manatu ma’u pe ki he fofonga ‘o Sisu ‘oku ne hanga ‘o tafi ‘a e kanongatamaki ‘o e fononga.  Kamata ke te loto fo’i ka ‘oku te manatu ki he ‘Eiki mo hono fofonga tuaiekemo ‘a ‘ete toe loto lahi!  ‘Oku langalanga’i ma’u pe ‘i he’ete ‘ofa kia Sisu ‘ a e kataki ‘o e mamahi mo e kona ‘o e mo’ui. 

Ko ia ‘oku tuki mo nonofo ‘e Paula ke tau ngaue ‘o sio ki he ‘Eiki, ‘oua ‘e sio ki he tangata pe fefine, pule ngaue he te te toe loto mamahi kita.  Koe’uhi foki ‘e ‘iai ‘a e taimi ia ‘e ‘ikai te nau fakahounga’i ‘ekitautolu ‘a ‘ete hela kuo fai.  Ko Sisu pe ‘e hounga’ia pea te ngaue pe ‘a kita ki Ai.  ‘Oua ‘e toe sio ki he Palesiteni, Sekelitali pe kohai.  Sio pe kita kia Sisu pea te ‘OFA ai, ‘o hange ko e ‘ofa ‘a Sekope ‘ia Lesieli, pea ‘e matangi ‘aupito ‘a e ngaue ‘oku te fai.  Ko e tokotaha fai me’a lava ‘a ‘ofa, pea lava lelei. Ko ‘OFA pe te ne teke oma taha.  Ko e tali pe ‘o Sisu.  Pea ‘i he ‘ete ngaue ‘ia Sisu, ‘oku ma’a - ma’a ‘a e kavenga pea hoko ko e va’inga ‘a e fatongia.