Ako 78: ‘Oku tau mo’ui pe ‘i he kelesi

PALO. 29:10; HEPELU 7:23-25; FILIP. 1:6;1 TIM. 2:5; II TIM. 1:12

KO E TAULA’EIKI ‘OKU NE MAFAI KE FAKAMO’UI OPEOPE

Na’e ‘ikai ha taula’eiki ‘i he Fuakava Motu’a ‘e lava ke ngaue tu’uma’u, ke ngaue hokohoko ma’u pe, ma’u pe koe’uhi ko e mate. He na’e pau ke mate ‘a e taula’eiki kotoa pe. Pea ko honau faikehekehe ia mo e Taula’eiki ‘a Sisu. Ko e Taula’eiki ia ‘i he ivi ‘a e Mo’ui Ta’engata. ‘Oku ‘ikai ke toe liua pe toe fetongi ‘a e Taula’eiki ko ‘eni. ‘Oku ‘ikai a’u ki ai ‘a e mate. Ka ‘oku Ne ‘i ai ma’u pe ‘o ta’engata. Pea ‘i he’ene pehe leva pea:
1. ‘Oku Ne mafai ke fai ‘a e fakamo’ui. Pea ‘oku ‘ikai ha fa’ahinga tukunga ia ‘e ala ta’ofi ai ‘Ene fakamo’ui ki he kakai ‘oku ha’u ki he ‘Otua. ‘Oku fai pe kae’oua ke lava kakato (Filipai 1:6). Pea ko hono ‘uhinga foki he “ko ‘Ene mo’ui ma’u ai pe ke hufekina kinautolu”. Ko e tefito’i ngaue ia ‘a e Taula’eiki Ta’engata. Pea ‘oku mahu’inga ke tau fakamama’u kia Sisu ‘i he momeniti kotoa pe, ‘i he tui koe’uhi ‘e ‘ikai te Ne li’aki kitautolu ‘i ha momeniti. Te Ne mo’ui ma’u pe ma’a kitautolu ‘i he loto fiefia, ma’a , ‘ofa kataki ma’u pe – fai ‘e ia ma’a kitautolu ‘iate kitautolu.

Tefito’i Fakakaukau: ‘Oku tau mo’ui pe ‘i he kelesi