Ako 77: ‘Oku mo’ui hotau ‘Eiki ‘oku ‘ikai ke mate ia.

PALO. 29:9; HEPELU 7:20-22; SELEM. 31:31-33; SA. 110:4

SISU KO E TALIFAKI ‘O E KOVINANITE ‘OKU LELEI ANGE

‘Oku toe fakamamafa’i ai pe ‘i he lesoni ‘o e ‘aho ni ‘a e toe lelei ange mo lakaange ‘a e Taula’eiki ‘o Melekiseteki (Kalaisi) ‘ia ‘Elone. Pea ko e taha ‘eni hono makehe’anga ‘o e taula’eiki ‘o Melekiseteki ko e ‘i ai ’a e lea tuki (Fuakava). Na’e ‘ikai ke ‘i ai ha lea tuki” (Fuakava) ia ‘i he tu’unga taula’eiki ‘o ‘Elone. He ko e taula’eiki fakataimi pe. Ko e ‘ata’i taula’eiki pe ‘o ‘ikai ko e me’a mo’oni. Ko e me’a Mo’oni ‘eni ‘a Kalaisi. Ko ia ‘a e Taula’eiki Lahi mo Mo’oni. Pea ‘oku mahino ‘a e mo’oni ‘o e Taula’eiki ko ‘eni ‘a Kalaisi (Fuakava). Ko e kovinanite Fo’ou. Ko e kovinanite Motu’a na’e fai mo ‘Isileli tu’u ‘i he lao na’e ta’e’aonga he na’e toutou maumau’i. He na’a nau feinga pe ke tauhi ‘aki honau malohi mo e ivi fakaetangata ‘a e ‘oku vaivai mo tonounou. Ka ko e Kovinanite Fo’ou na’e fai ‘ia (Sisu ‘a e lea tuki) pea hoko pe ‘a Sisu ‘iate ia ‘a e kovinanite. Pea ‘oku Ne foaki mo e ivi ke fai’aki ‘a e talangofua ki he Kovinanite Fo’ou ko ia. ‘Oku Ne mo’ui ‘i loto ‘i he kakai ‘oku fai kovinanite mo e ‘Otua. (Selemaia 31:31-33). ‘Oku ne mo’ui ‘iate koe?

Tefito’i Fakakaukau: ‘Oku mo’ui hotau ‘Eiki ‘oku ‘ikai ke mate ia.