Ako 79: Ke tau hokosi ‘a e ‘Imisi ‘o Sisu Kalaisi.

PALO. 29:11; HEPELU 7:26-28; II KOL. 5:21; HEP. 5:8-9

KO E TAULA’EIKI LAHI, KO E ‘ALO KUO ‘OSI FAKAHAOHAOA TA’ENGATA

Ko e Taula’eiki Lahi ko ‘eni ko Sisu Kalaisi ko e ‘Alo ia ‘o e ‘Otua. Ko e ‘Alo ia kuo ‘osi fakahaohaoa ‘i he me’a kotoa pe. Pea ko e tokotaha totonu ia ma’a kitautolu.

1. Tau vakai ki he ‘ene Mo’ui mo Hono ‘ulungaanga: ‘Oku “ma’oni’oni, mo ‘ata’ata mei he kovi mo ta’emele”, pea ‘oku ‘ata mei he “kakai angahala” pea “motu atu ‘i he ngaahi langi”. Ko Sisu ‘oku ma’oni’oni he ‘oku Ne feohi mo taha mo e ‘Otua. ‘Oku “ ‘ata mei he kovi”. He ‘oku ‘ikai ha ‘uli ‘e taha ‘i he tapa kotoa ‘o ‘Ene mo’ui. ‘Oku “ta’emele”, he kuo Ne ikuna’i ‘a e ‘ahi’ahi kotoa pe ‘a e Fili. ‘Oku mavahe mei he kakai angahala, he neongo ko e tangata mo’oni ia, ka na’e ‘ikai ke ‘i ai ha’ane angahala (II Kol. 5:21). Pea na’e motu atu ‘i he ngaahi langi. Ko ia ‘etau tangata ‘oku ‘i he langi. ‘Oku Ne ‘afio ‘i he kololia pea ‘oku Ne fakatafe mai ‘a e Mo’ui mo e ngaahi Tapuaki fakalangi ki he ‘ene kakai ‘i mamani.
2.  Ko e kau taula’eiki faka-Livai (‘Elone) na’e pau ke nau fai feilaulau ‘i he ‘aho kotoa pe koe’uhi ko ‘enau ngaahi angahala (na’a nau fa’a to ma’u pe ‘i he angahala) pea kuopau ke toutou fai ‘a e feilaulau kole fakamolemole ki he ‘Otua. Ka ‘oku kehe ia mo Kalaisi. ‘Uluaki, na’e ‘ikai ha’ane angahala. Ka na’a Ne foaki pe ‘Ene mo’ui (ko e Lami) ke fai ‘a e feilaulau fakamolemole ma’a e kakai kotoa pe ta tu’o TAHA pe ‘oku mahino ai ‘a e kakato ‘o ‘Ene feilaulau. 
3.  Ko e lao ko e me’a teuteu pe ki he me’a Mo’ui. Ko e Lao ‘oku ma’a e tangata me’a vaivai pea ‘oku ta’ekakato. ‘Oku ‘ikai te ne lava ke fakamo’ui ‘a e tangata. Ka na’e hoko mai ‘a e Folofola ‘o e “lea tuki” (kovinanite Fo’ou) mo Sisu Kalaisi kuo ‘osi fakahaohaoa’i ‘i he’ene ngaahi mamahi (Hep. 5:8-9). Pea ne fai hotau fakamo’ui haohaoa.

Tefito’i Fakakaukau: Ke tau hokosi ‘a e ‘Imisi ‘o Sisu Kalaisi.