Ako 74: ‘Oku mahu’inga ‘a ‘etau tali ‘a Sisu Kalaisi.

PALO. 29:7; HEPELU 7:15-17; SA. 110:4; KALET. 2:20; KOLOS. 3:4

KO E TAULA’EIKI ‘I HE IVI ‘O E MO’UI TA’ENGATA

‘Oku talanoa malohi ‘a e lesoni ‘o e ‘aho ni, ki he Taula’eiki Lahi ‘a Sisu Kalaisi. Ko e Taula’eiki Ta’engata ‘i he ‘alunga ‘o Melekiseteki, pea ko e Taula’eiki foki ‘o e Mo’ui Ta’engata. Kapau te tau toe fehu’i, pea ko e ha nai hono ‘uhinga ‘o e totonu ‘o e Taula’eiki faka-Livai ‘i he ‘alunga ‘o ‘Elone kuo ‘ikai ke toe fiema’u ai kae ‘ai pe ‘a e Taula’eiki faka-Melekiseteki? Ko hono ‘uhinga he ko e Taula’eiki ‘a ‘Elone na’a ne fakatataa’i mo fakafofonga’i pe ‘a e ngaue kalusefai na’e fai ‘e Kalaisi ‘i mamani ‘i he kolosi. ‘Ikai ke lava ‘e he Taula’eiki ‘a ‘Elone ‘o a’usia ‘a e ngaue taula’eiki ta’engata ‘oku fai ko ia ‘i he Potutapu ‘o e Langi. ‘Oku fiema’u ‘a e tokotaha kehe ia. Ko e taula’eiki faka-Melekiseteki.

1.   Ko e Taula’eiki faka-Livai (‘Elone) ko e fokotu’utu’u pe ia ‘e he Lao fakaetangata ‘i mamani. Ko e Lao ia ma’a e tangata ‘oku fakangatangata ‘ene me’a kotoa pe, ‘io, ‘o a’u ai pe ki he fakangata ‘e he Mate. Pea ‘oku ‘ikai ke ‘aonga ia ki he ngaahi me’a fakalangi mo ta’engata.

2.      Ko e Taula’eiki ia ‘o e akenga fo’ou (faka-Melekiseteki) ‘oku ‘ikai fa’u pe fokotu’utu’u ia ‘e ha Lao. Ko e Taula’eiki Ta’engata ia. Ko e ha’a Taula’eiki ia ‘ikai ke toe ngata pe toe fetongi. ‘E ‘ikai ke toe mate ‘a e Taula’eiki ia ko ia. Ko e Taula’eiki haohaoa ia. Ko e Taula’eiki ‘e ‘ikai toe motu’a ‘i ha taimi ka ‘e fo’ou ma’u pe.

3.      .Ka ko e Taula’eiki kuo fakaivia ia ‘e he ivi ‘o e Mo’ui Ta’engata he ‘oku ‘ikai ke makatu’unga ia ki he Lao fakaekakano? ka ‘oku tu’u mo fai aka ia ki he Mo’ui mo e Ivi ‘o e ‘Otua. Ko e ivi ‘o e mo’ui ‘oku ’ikai ke toe ngata ka ‘oku ngaue ma’u pe, ma’u pe ‘o a’u mai ki he taimi ni, pea ‘e pehe pehe ai pe ‘o ta’engata pea ta’engata. Ko e Taula’eiki Lahi ia ‘i he ‘alunga ‘o Melekiseteki.

4.      Pea ko e ngaue ‘a e Taula’eiki Lahi ko ia ‘oku ‘ikai ke fai ia mei tafa’aki pe mei tu’a, ka ‘oku fai ia mei loto. Fai ‘i Laumalie mo mo’oni. Ko Ia ‘a e Mo’ui ‘oku mo’ui ‘iate kitautolu.

Tefito’i Fakakaukau: ‘Oku mahu’inga ‘a ‘etau tali ‘a Sisu Kalaisi.