Ako 73: ‘Oku ‘ia Kalaisi ‘a e katokatoa ‘o e ‘Otua.

PALO. 29:6; HEPELU 7:11-14; SA. 110:4; II KOL. 13:4; HEP. 10:19,20

‘OKU MA’OLUNGA ANGE ‘A KALAISI ‘IA ‘ELONE

1.      ‘Oku fakamatala ‘a e lesoni ‘o e ‘aho ni ki he ma’olunga mo lahi ange ‘o Kalaisi (‘alunga taula’eiki ‘o Melekiseteki) ‘ia ‘Elone mo hono ‘alunga (ha’a taula’eiki faka-Livai).
‘Oku ‘ikai ke lava ‘e he taula’eiki faka-Livai ‘o fai ‘a e fakahaohaoa mo e fakamo’ui. Pea ko e ‘uhinga ia ‘o e toe hoko mai ‘a e taula’eiki faka-Melekiseteki ‘ia Sisu Kalaisi. Ko e ngaue fakataula’eiki ia ‘oku ma’a mo haohaoa ange. Ko e founga Taula’eiki Lahi ia ‘e fai’aki ‘a e fakamo’ui ‘o e mamani.

2.      Pea ‘i he’ene pehe, ko ia ai kuopau ke toe liliu mo fetongi ‘a e Lao. ‘A e lao ‘a Mosese. ‘Oku ‘ikai ‘aonga ‘a e Lao ‘a Mosese ki he fai fakamo’ui. ‘Oku fu’u tonounou ‘aupito ‘a e Lao ia, pea ko ia ai kuopau ke fetongi mo tukuange.

3.      Ko e tokotaha ko ‘eni ‘i he ‘alunga taula’eiki fo’ou ‘o Melekiseteki ko Sisu Kalaisi ko e ha’u ia ‘i he hako ‘o e matakali Siuta. Pea ‘oku ‘ikai ha lau ia ‘a e Lao ki he matakali ‘o Siuta. Ko e taula’eiki ‘o e ha’a ‘Elone (faka-Livai) ‘oku ne fakafofonga’i ‘e ia ‘a e ngaue ‘a Kalaisi ‘i he kolosi ‘i mamani (ngaue fakalelei) – ki he ‘Otua. Pea neongo na’e hu ‘a ‘Elone ki he potu Toputapu ka na’e tu’u pe ia ‘o ‘ikai nofo ki lalo.

4.      Ka ko Kalaisi ia (taula’eiki faka-Melekiseteki na’e hu ki loto tatau ‘i he langi) pea na’e nofo ia ki he lao ‘i he to’omata’u ‘o e Tamai. Ko e potu ia ‘o e mafai mo e malohi.

5.      Ko ia ai ‘oku ‘omi ‘e ‘Elone ‘a e fakamolemole angahala. Ka e ‘omi ‘e Melekiseteki (Kalaisi) ‘a e ivi ‘o e ikuna’i ‘a e angahala.

Tefito’i Fakakaukau: ‘Oku ‘ia Kalaisi ‘a e katokatoa ‘o e ‘Otua.