Ako 75: Ko Sisu ‘a e tapuaki lahi taha ‘o e tangata.

PALO. 29:8; HEPELU 7:18-19; SIONE 14:6

KO HA FALALA’ANGA ‘OKU LELEI HAKE PEA TAU FAKAOFIOFI AI KI HE ‘OTUA

‘Oku tau hoko atu pe ‘i he ‘aho ni ‘o e ngata ‘a e tu’unga Taula’eiki ‘a ‘ Elone ‘a ia na’e tu’unga he lao he koe’uhi ko hono ngaahi lao ‘oku ‘ikai ke fe’unga mo e akenga fo’ou ‘o loto tatau. Pea ‘i he ‘ene pehe ko ia ai na’e:

 

1. Tamate’i ‘a e tu’utu’uni ko ia he ‘oku ‘ikai te ne lava ‘e ia ‘a e fakakakato mo e fakahaohaoa. Ko ia ai kuopau ke tukuange ‘a e akenga ko ia, ‘a e tu’unga taula’eiki ‘o ‘Elone mo hono ngaahi tu’utu’uni he koe’uhi? ‘e ‘ikai te nau lava ha fakama’a angahala pe ha fakamo’ui. Pea ko e ‘uhinga ia ‘o e hoko mai ‘a Sisu Kalaisi ke Ne fakahoko ‘a e me’a na’e ‘ikai ke lava’i ‘e he Lao kae’uma’a ‘a e ngaue fakataula’eiki faka-Livai ‘ia ‘Elone.
2.  Pea ‘i hono tamate’i ko ia ‘o e tu’utu’uni mo e lao na’e pau ke fakahoko mai ha “falala’anga pe ‘amanaki’anga ‘oku lelei hake, ‘a ia ‘oku tau fakaofiofi ai ki he ‘Otua”. Ko e ‘ave ko ia ‘o e tangata ke ofi ki he ‘Otua ko e taumu’a ia ‘a e ngaue ‘a e taula’eiki kotoa pe. Ka na’e ‘ikai lava ia ‘e ‘Elone, ka na’e fai ia ‘e Sisu Kalaisi. Pea ko e Langilangi lahi ia ‘o e akenga fo’ou mo e Fuakava Fo’ou, ko ‘ene malava ke ‘omi ha falala’anga pe ‘amanaki’anga ‘oku lelei hake pea ko e me’a tepu ‘oku tau fakaofiofi ai ki he ‘Otua Mo’ui ‘o feohi mo Ia ‘i Hono Laumalie Ma’oni’oni. Ko e ngaue ma’ongo’onga ia na’e fai ‘e Sisu Kalaisi ma’a kitautolu ke tau a’u ki he ‘Otua ‘o nofo ma’u ai. He ko Kalaisi ‘a e Hala ki he ‘Otua ko e Tamai (Sione 14:6). Ko e ‘uhinga ‘o e ha’u ‘a Sisu ki mamani ke ‘ave kitautolu ki he Tamai ke tau Mo’ui Ta’engata ‘iate Ia.  

Tefito’i Fakakaukau: Ko Sisu ‘a e tapuaki lahi taha ‘o e tangata.