Ako 72: Ko Sisu Kalaisi ‘a e Huafa ma’olunga taha.

PALO. 29:5; HEPELU 7:4-10        

 KO MELEKISETEKI MO ‘EPALAHAME

‘Oku fakahoa ‘e he lesoni ‘o e ‘aho ni ‘a Melekiseteki mo ‘Epalahame. Ko ‘Epalahame ko e taki ia ‘o e kakai tui – kau Hepelu. Ko e ‘ulu? ia. Ka ‘i hono fakahoa atu ‘o ‘Epalahame mo Melekiseteki ‘oku makehe atu pe ‘a Melekiseteki ia. Pea ko e taipe ia ‘o Kalaisi mo e makehe ‘o Hono Tu’unga Taula’eiki.
Ko e ha ‘a e makehe’anga ‘o Melekiseteki meia ‘Epalahame? Ko ‘Epalahame? na’a ne totongi vahe hongofulu kia Melekiseteki (Senesi 14:20). Pea na’a mo e ha’a Taula’eiki Livai ne nau ‘ave vahe hongofulu kia Melekiseteki ‘ia ‘Epalahame. (Hepelu 7:5). Ko e lahi? ‘oku ne tuku tapuaki ki he si’i hifo ai. Ko e mahino ia ‘oku lahi ange ‘a Melekiseteki ‘ia ‘Epalahame. Na’e tapuaki’i ‘e he ‘Otua ‘a ‘Epalahame (Senesi 12:2). Pea ko ‘eni kuo toe tapuaki’i ‘e Melekiseteki. ‘Oku fakafofonga’i ‘e Melekiseteki ‘a e tu’unga taula’eiki ‘o Kalaisi. ‘A ia ‘oku ma’olunga ange ia ‘i he ha’a ‘Elone. He ko Kalaisi ko ia ‘oku Ne tapuaki’i kitautolu. Pea ko ia foki te tau ‘ave vahe hongofulu ki ai. Pea ko Sisu Kalaisi ‘oku tau ma’u mei ai ‘i Hono tu’unga taula’eiki ta’engata ‘a e ngaahi tapuaki fakalaumalie kehekehe. Pea tuku mai ia ma’atautolu ‘i he Laumalie Ma’oni’oni. Pea ‘oku ‘atautolu ia ke tau tali ‘i he tui.

Tefito’i Fakakaukau: Ko Sisu Kalaisi ‘a e Huafa ma’olunga taha.