Ako 71: Ke tau hoko ko e kakai ‘oku mo’ui ma’oni’oni

PALO. 29:4; HEPELU 7:1-3; SEN. 14:18-20; SA. 110:4

KO E TU’UNGA TAULA’EIKI FO’OU ‘I HE ‘ALUNGA ‘O MELEKISETEKI

‘Oku ua ‘a e tu’unga Taula’eiki Lahi ‘o e Fuakava Motu’a? ko ‘Elone mo Melekiseteki. Ko ‘Elone ‘oku tukufakaholo. Ka ‘oku ’ikai ke pehe ‘a Melekiseteki . Pea hange na’e ‘ikai ha ‘ane tamai pe fa’e. Na’e ‘ikai ha tokotaha pehe ia ‘i he Fuakava Motu’a. Pea ko e taipe ia ‘o Sisu Kalaisi ko e ‘Alo ‘o e ‘Otua. Ko e ‘uhinga ‘o e hingoa Melekiseteki ko “Tu’i ‘o e Ma’oni’oni”. Pea ko e Tu’i ‘o ‘Salema’, ‘a ia ko Melekiseteki ko e Tu’i pea toe Taula’eiki. Ko e tokotaha ‘o e Ma’oni’oni mo e Melino. Na’a ne tapuaki’i ‘a ‘Epalahame, pea na’e ‘ave vahe hongofulu ki ai ‘a ‘Epalahame (Senesi 14). Pea ko e Taula’eiki ta’engata (Same 110:4). ‘Oku lahi ‘aupito ‘a e fakakikihi ‘ia Melekiseteki pe ko hai ia. ‘Oku lau ‘e he ni’ihi ko e tangata na’e ‘i ai pe ‘ene matu’a. Pea tala ‘e he ni’ihi ko e ‘angelo. Pea tui ‘a e ni’ihi ko e ‘angelo. Pea tui ‘a e ni’ihi ko Sisu Kalaisi ia ‘i mu’a. ‘Oku ‘ikai ha loto taha. Ka ko e me’a pe ‘oku mahino ko e taula’eiki ‘o e ‘alunga ‘o Melekiseteki ko e ‘ata ia ‘o e taula’eiki ‘o Sisu Kalaisi ‘i mu’a. ‘Oku ma’oni’oni, melino pea ko e taula’eiki ta’engata. ‘Io, ko Sisu Kalaisi ko hotau Taula’eiki Lahi ta’engata ia. ‘Oku ’ikai ke ngata Hono ivi pe mafai, pea ‘ikai ngata ‘Ene Mo’ui pe fai fakamo’ui. Pea ‘oku ‘ikai ke tuku ‘Ene hufia kitautolu mo ‘Ene taukapo’i. ‘Oku ‘ikai ‘osi. ‘Ikai hange ko ha’a ‘Elone.