SEN. 31:14-16; Mt. 17:15&16.
NOFO 'I MAMANI KAE 'IKAI 'O MAMANI
Kuo toki hanga 'e Lesieli mo Lia 'o tatala ange hona loto kia Sekope. Ta na'e fuoloa pe, 'a 'ena loto mamahi ki he'ena tamai 'i he ngaahi me'a lahi. 'Uluaki 'a hona fakatau atu - ke na mali mo ia - ko e ta'u 'e 14, 'oku fu'u to atu ia! 'Ikai ko ia pe ka ko e fu'u pa'anga 'i he koloa 'o e mali mo e ngaue 'a Sekope, na'e totonu ke tuku tauhi ia mo'o naua ki hona kaha'u. Ka kuo 'ikai! Kuo ne kaikai tokotaha pe ia 'e ia. Pea ko ia ai 'oku na ongo'i pe 'ekinaua kapau 'oku 'i ai ha koloa kuo to'o 'e he 'Otua mei he'ene tamai 'o 'oange kia Sekope, pea ko e koloa ia 'anautolu he kuo fai kaka 'a Lepani 'i he 'u koloa lahi. Pea ko e me'a kiate kinaua te na fakaongoongo kinaua ki he 'Otua.
Mahino lahi mai 'aupito 'a Lepani 'i he ngaahi potalanoa ko 'eni. Ta ko e tokotaha kaka mo'oni. Pea sio ange ki he fa'ahinga 'eni na'e 'oange 'e he 'Otua ke teu'i 'aki 'a Sekope. Ko e tangata kaka mo'oni. Ka na'e finangalo 'a e 'Otua ia ke 'ai pe ia ke na fe'auhi mo Lepani. He ko Sekope foki ko e tokotaha 'atamai lahi pea na'a ne kakaa'i hono ta'okete mo 'ene tamai. Pea ko ia na'e 'omai ai 'a Sekope ki Kalana, hei'ilo 'e fetaulaki 'a Sekope mo e tama 'oku toe kaka lahi ange ia! Pea ko e 'uhinga 'a e 'Otua 'e hanga 'e Lepani 'o laiki 'a Sekope. 'Isa, 'o fakangingila 'a Sekope 'a hono fakangingila. He kapau na'e 'ikai te ne tali, 'e mate ia, pea 'e kovi ange 'a 'ene kaka 'ana 'ia Lepani. He 'oku tau 'ilo pe ka feohi ha taha kapekape mo ha ta'ekapekape, 'e faai atu pe pea 'e toe kapekape mo e tokotaha ko 'e. 'E pehe pe me'a ko e kaka. Ka te feohi mo ha kau kaka te te iku 'o fu'u kaka lahi 'aupito. Kae fakaofo 'a e hao 'a Sekope. 'I he 'osi ange 'a 'ena feohi kuo fakautuutu ange 'a e kaka 'a Lepani, kae koloto ke 'ilonga ha me'a 'e taha 'ia Sekope (31:7).
'Io. ko e fielau 'a e loto 'a e ongo uaifi, Lia mo Lesieli, ke na fakaongo ki he 'Otua 'o Sekope, he ko e 'Otua mo'oni pe ia. Ko e 'Otua pe ia 'oku Ne malu'i kita mei he faiangahala. Ko Sisu ia ko hotau hao'anga. He kapau 'e 'ikai te te hange ko Lia mo Lesieli. Te na fu'u loto mamahi pea te na feinga ke sauni 'a e kovi 'a 'ena taimi, 'io 'o a'u ai pe ki he'ena fakakaukau ke kakaa'i ia. Ka ko e tu'unga ia 'o e ta'e ma'u 'a e 'Otua 'o Peteli, 'a e 'Otua 'o Sekope, 'io 'a Sisu Kalaisi 'a e 'Otua 'o Peteli, 'a e 'Otua 'o Sekope, 'io 'a Sisu Kalaisi 'a 'e 'oku Ne fakamelemo'i 'a 'etau ngaahi angahala fakataha mo e kovi 'a e kakai kehe kiate kitautolu 'i Hono ta'ata'a.
No comments:
Post a Comment