Ako 65: 'Oku mafeia 'e he 'Otua 'a e me'a kotoa pe.

Sen. 31:10-13; 48:16; 28:13,18&20; 29:15&27

KO E 'OTUA 'O PETELI

Fai atu 'a e fakamatala 'a Sekope ki hono ongo uaifi, kia Lia mo Lesieli, pea ne talanoa ange kau ki he'ene misi 'i ha 'aho 'e taha.  Kuo ne sio ki he fangamanu kuo nau tau, pea lolotonga 'a 'ene mamata ki ai kuo folofola mai 'a e 'Otua ke tokanga'i ko e me'a koee na'e sio kia i ko e kaka ia 'a Lepani 'oku malumu mai kiate ia.  Pea 'oku hanga leva 'ehe 'Otua 'i he founga fakaivi faka-'otua pe 'o liliu holo 'a e 'u me'a 'i he koloa 'a Lepani, kau ai 'e feliuliuaki 'o e lanu 'o e fanga manu, koe'uhi ko e kaka 'a Lepani.  Ko e fakafeliuliuaki 'o lanu 'o e fanga manu ko e ivi 'ata'ata pe ia 'a e 'Otua.  'Oku ne fakaha'ai 'i he 'api 'o Lepani 'a hono .  Ka na'e 'ikai foki ke 'ilo'i ia 'e Lepani, pea 'oku lahi mo e 'u me'a lahi ia 'oku lolotonga hoko 'i he taimi ni, ko e fokotu'utu'u pe ia 'a e 'Otua, pea 'oku faka'amu pe 'a e 'Otua ka tau ka fakatokanga'i leva 'a e ngaahi me'a ko ia, pea tau 'ilo ko e fakatokanga ia meiate Ia kau ki he'etau ngaue, lelei pe kovi. 

Pea 'i he mo'utafu'ua foki 'a Sekope, kuo fakamanatu mei 'e he 'Otua ko ia 'a e 'Otua 'o Peteli.  Ko eme'a mahu'inga foki 'a 'ete 'ilo'i pe ko e laumalie 'oku lea mai ke 'ilo pe ko e laumalie ia 'o hai?  Pea 'i he taimi foki ko ia 'oku fele 'a 'otua pea kuo pau ke feinga 'a e 'Otua ke Ne fakama'ala'ala mai ia.  Hange pe ko e totonu ke tau 'ilo'i he taimi ni 'a e Laumalie 'o Sisu mo e 'o e fa'ahikehe.  I he taimi ni ko e 'Otua 'oku tau 'ilo mo tui ki ai 'a e 'Otua ko 'eni 'oku fakahaa'i mai 'ia Sisu Kalaisi.  'I he kuonga 'o Sekope, ko e toe ha ange 'a e 'Otua kiate ia, pea fakafe'iloaki mai ai 'a e 'Otua kiate ia.  Ko ia 'a e 'Otua 'o Peteli.  Ko Peteli ko e "Fale 'o e 'Otua".  'A e 'Otua ko 'eni na'a ne mamata ki ai 'oku 'i ai 'a e fu'u tu'unga 'oku 'alu hifo mo 'alu hake ai 'a e kau 'angelo.  (28:12).  Ko ia 'a e 'Otua 'oku hoko mai 'i he taimi ni .  'Oku lave mai pe kiate kita 'i he 'aho mo e momeniti kotoa pe.  'Oku lave mai 'a e tu'unga ki hoto laumalie, pea ko hoto loto mo hoto laumalie ko ia 'a e Matapa 'o Langi.  Pea 'oku fakafanongo mai 'a Langi ki he palopalema 'oku te faingata'a'ia ai.  'Io fakafeta'i ko Peteli ko ia,  "Fale 'o e 'Otua" kuo hoko mai ia 'ia Sisu Kalaisi.  He ko e talateu mai ia 'ia 'Imanuela ko hotau fakamo'ui.  Tali 'a Sisu, ko Ia ke Ne tu'u 'i he 'aho 'o e faingata'a.  Pea ko e 'aho 'o e faingata'a ko e 'aho ni.  Ke hoko 'a Sisu ko hoto pa mo hoto 'u mei he ngaahi kovi kehekehe 'o e 'aho ko 'eni.