Ako 64: 'Oku ikuna'i ma'u pe 'a e kovi 'e he lelei.

Sen. 31:4-9; 48:15; Siope 19:3; Same. 37:28; 105:14

KA 'E 'IKAI PE HA KOVI

Na'e ui leva 'e Sekope hono ongo uaifi ke fakaha ki ai 'a e me'a 'oku hoko pea moe tu'utu'uni kuo fai 'e he 'Otua, ke nau hiki a mei Kalana.  'Oku mahino pe ko e fe'iloaki fakapulipuli 'a Lesieli mo Lia mo Sekope he na'a nau fe'iloaki ki he 'utu.  'A ia ko'enau a'ufa'u ke nau hola meia Lepani .  Na'e kamata 'aki 'e Sekope 'a 'ene fakamatala kuo kakaa'i ia 'e he 'ene tamai.  Kuo tu'o hongofulu hake pe 'eni 'a e liliu 'o 'ene totonu !  Kuo mahino kia Lepani kuo tapuaki'i ia 'e he 'Otua 'o fakato'ulu 'a e tukumisi, ko ia na'a ne toe ui 'a Sekope 'o talaange 'e ma'u 'e ia 'a e tukumisi kae 'oange kia Sekope ha me'a 'e taha.  Na'e feliuliuaki tu'o hongofulu, pea ko hono fakaiku kuo to'o kotoa 'e he 'Otua 'a e fanga manu 'o 'oange kia Sekope. 

'Oku tau fakamo'oni ki he mo'ui faka-'Otua 'i he ngaahi me'a ko'eni.  Koe  tangata 'a e 'Otua 'oku 'ikai te ne teitei 'ai 'e ia 'o kumi ha koloa, kumi pe 'e ia 'a e me'a pe 'e taha, ko e 'Otua pe , pea 'oku toki tulimui mai 'a e koloa 'i hono tu'a (Mt. 6:33).  'Ikai ko ia pe ka 'oku tau faka'ofa'ia 'i he tafa'aki 'a e faka-'otua mate, ko e tuli holo 'a e koloa.  'Alu atu ki he lavatea, hu 'a e koloa ia 'i he tukumisi, 'alu atu ki he tukumisi hu ia 'i he pulepule !  Fiu ia hono tuli fakanga 'a e me'a ko e koloa kae 'ikai pe ma'u ia.  Ko hono iku'anga pe ko e 'auha.  Foaki 'a e koloa ia ma'a e kakai kehe.  Pea 'oku tau malie'ia foki 'i he lolotonga 'o e hoko 'a e 'u faingata'a ko'eni kia Sekope meia Lepani, kuo talamai 'e Sekope ia "ta kuo 'iate au 'a e 'Otua 'o 'eku Tamai".  Pea ko hono faingamalie 'anga ia 'o e hoko kotoa 'a e 'u me'a ni, kuo 'i ai 'i Sekope 'a e 'Otua.  Ko 'ete hanu 'oka 'oku 'ikai ke 'iate kiata 'a e 'Otua.  'Oua teke loto mamahi kita 'i he faingata'a hanu pe kita 'i he 'ikai ke 'i ai hato ivi ke teke'i 'aki 'a e faingata'a ko ia.  'I hono fakalea 'e taha, hanu pe kita koe 'ikai ke te ma'u 'a e 'Otua.  He 'oku mo'oni 'a Paula ia "Ai kapau pe kau 'a e 'Otua ma'atautolu pe a kohai tu 'e ta'ofi mai?"  (Loma 8:31). 

Pea 'oku 'ikai foki ke fa'a fakangofua 'e he 'Otua mo e kovi ke ha'u kae'oua kuo mateuteu 'a 'ete tu'u 'iate Ia.  Toe pehe 'e Sekope "Ta na'e 'ikai tuku 'ehe 'Otua ke lava ha'ane kovi kiate au".  'Io neongo 'e kapu kita 'e ha fili laui teau , 'e 'ikai pe ke to ha kovi ia kiate kita, he 'oku te fononga fakataha mo Ia ma'u pe.  (Same 23:4).