Sen. 29:16-19; Hosea 12:13; Kal. 2:16&21
KE NGAUE’I ‘A LESIELI
Fiema’u ‘e Lepani pe koeha ‘a e totongi ‘o e ngaue lahi mo fakamatoato ‘a Sekope ‘i hono ‘api? Ko e totongi ko Lesieli. Ko e ngaue ta’u ‘e fitu ki ai. ‘Oku mahino pe na’e tokia ‘a e loto ‘o Sekope ‘ia Lesieli ‘i he’uluaki ‘aho pe. ‘A ‘ene hopo ki tu’a ‘o ngaue hange ha tangata ko ‘ene ‘ofa mo’oni ‘i hono ki’i famili. Pea mahalo foki na’e ‘ikai teitei fakaofiofi mai ‘a e loto ia ‘o Lesieli ke fakakaukau ki ha tangata neongo pe ‘a ‘ene talavou. Na’a ne tokanga pe ia ki he ngaue ‘e ha’u pe ‘a e mali ia ‘o kumi mai ia. Mahalo pe foki na’e manatu ‘a Sekope ki ‘api ‘a e meimei fai pe ‘e he kau tamaio’eiki ‘a e ongo matu’a ‘a engaue. Nofonofo loto ‘api pe ia ‘o tokoni holo pe ‘i fale ki he’ene fa’ee. ‘Ohovale ia ‘i he sio ki he hopo ki tu’a ‘a Lesieli ‘o ngaue ai. Pea ‘oku tau tui na’e kau ‘a e me’a ko ia hono fakakouna’i ‘a Sekope ke ngaue malohi.
‘Oku ‘ikai ko ha toki tupukoso ‘a e fakakaukau mali ‘a Sekope. Koe tefito’i taumu’a pe ia ‘o ‘ene ha’u ki he famili ‘o ‘ene fa’ee, ‘io mo ‘ene tamai pe foki ke ha’u ‘o kumi ange hano mali. Pea na’a ne fakamo’oni’i pe ‘a e totonu hono fale’i. Ta ko e feitu’u totonu pe ia ‘o e kumi uaifi ki ai. Pea ko ‘ene fokotu’u ia kia Lepani ke ne ngaue’i ‘a Lesieli.
Na’e toko ua ‘a e ongo ‘ofefine ‘o Lepani, ko Lia mo Lesieli. Lahi ‘a Lia kae si’isi’i ‘a Lesieli. Ka ‘oku talavou ange ‘a Lesieli ‘ia Lia. ‘Oku pehe ‘e he tohitapu na’e “matakuikui ‘a Lia”, mahalo na’e hange ‘oku mata’i Siaina pe Siapani! Ka ko Lesieli ia na’e “hoihoifua mo matamata lelei”. Pea na’e loto pe ki ai ‘a Lepani. ‘Osi ange mahalo na’e mahino pe kia Lepani kuopau pe ke mali ha taha ia ‘o ‘ene ongo tamaiki mo Sekope he ko hono kainga.
Manatu’i ko Sekope na’a ne fokotu’u ange te ne ngaue’i ‘a Lesieli ‘i he ta’u ‘e fitu. ‘Oku ha pe mei heni ‘a e natula ‘o Sekope. Ko e me’a kotoa pe kuopau ke ne feinga’i mo ngaue’i. Hange pe ko ‘ene ngaue’i ‘a e tu’unga hoko, mo ‘ene toe feinga’i ‘a e tapuaki ‘o ‘Isoa, pea ko ‘eni kuo ne pole pe ke ngaue’i hono mali. Tokanga’i ange, ‘e lava pe ke ma’u ‘a Lesieli ia ta’engaue’i. ‘Oku ‘i ai pe ‘a ‘ene totonu ‘ana ki ai koe’uhi ko hono kainga, hange pe ko e ‘i ai ‘a e totonu ‘a ‘Aisake kia Lepeka. Ka na’e pole ‘aki pe ‘e Sekope ia ‘a ‘ene ngaue, pea mahalo ko e ki’i faingata’a ia ‘o e kau tama ivi lahi ‘i tu’a ko e fiu’afeinga’i ke tuku pe honau ivi ki tu’a kae ‘uluaki tali ‘a Sisu pea toki ha’u ‘ene ngaue.
Talaange ‘e Sekope te ne ngaue’i ‘i he ta’u ‘e fitu. Ko e fika fitu ko e fika haohaoa ia ‘a e kakai Siu pea ko e fika foki ia ‘oe ‘Otua. Pea mahalo ko ‘ene ‘uhinga te ne lava ke ngaue haohaoa mo’o Lesieli. Na’a ne tui ki he fakahaohaoa tu’u ‘i he ngaue. Pea ko e vaivai’anga ia ‘o ha’a Sekope, ko e ‘ikai ke nau tali kuo ‘osi tokonaki ‘e he ‘Otua ‘a ‘etau ta’ane mo Ia. Tau pehe ‘e kitautolu ‘oku totonu pe ke tau kei faipe ‘etautolu ha me’a. Te tau lava pe ke fai ha ngaue ‘o haohaoa ‘i he ‘ao ‘o e ‘Otua pea te tau toki fiemalie leva ke fai ‘a e ta’ane. Tokua ko e ngaue te tau fai ‘e ma’a tatau pe ia pea toe haohaoa tatau pe mo e ngaue kuo ‘osi fai ‘e Kalaisi ma’a tautolu. Kae taumaia ke tau’ilo ‘e ‘ikai lava ha tangata ‘iate ia pe ke fai ha ngaahi me’a ke haohaoa. Ka tau tali mu’a ‘a e palani mo e fokotu’utu’u ‘a e ‘Otua ku Ne ‘osi fai ma’a tautolu ‘ia Sisu Kalaisi, ko e nounou pe ia mo e lelei taha.
No comments:
Post a Comment