Ako 55: 'Oku tau ngaue ko e fai ki he 'Eiki 'o 'ikai ki he tangata.

Sen. 29:15; ‘Efe. 6:5-9

FAI MA’ONI’ONI

Mahino foki ko e mahina ‘e taha na’e nofo ai ‘a Sekope mo Lepani na’ e fai ‘e Sekope ia ha ngaahi ngaue lahi ‘i hono ‘api.  Mahalo na’e kau ai ‘a e tokanga’i ‘a e  fanga sipi pea mo honau fakainu ka ko e mahina foki ko ia ‘e taha, ko e  fakaafe pe ‘e Lepani ke nau nofo.  ‘I he anga ‘o e nofo ‘a e kakai tauhi sipi ‘o ono’aho, ka ha’u ha taha ‘o nofo ‘i honau ‘api, te nau lau pe ‘a e ‘aho ‘e tolu ko honau ‘aho ‘eve’eva ia.  Pea ko e ‘aho leva ia ‘o hono faa kuopau ke ‘alu ia pe ‘e kumi ‘a ha’ane ngaue ke totongi ‘aki ‘a ‘ene nofo ai .  ‘A ia ‘oku mahino ko e me’a ngaue ke totongi ‘aki ‘a ‘ene nofo ai ‘a Sekope, ‘i he ‘osi pe ‘a e ‘aho ‘e tolu ‘o Sekope ‘i he ‘api na’a ne feinga leva ‘i he ‘aho hono faa ke ngaue pe ‘i he ‘api ke totongi’aki ‘a ‘ene nofo mo ‘ene kai.  Ka ‘oku mahino foki na’e fu’u to atu ‘a e ngaue ia ‘a Sekope ‘o matu’aki laka ia ‘i he kakai na’e ngaue totongi kia Lepani ‘i he ‘aho ko ia.  Pea mahalo na’e tupu ia ‘a e ongo’i halaia ‘ia Lepani ‘o ne fakalea ange kia Sekope ke ‘ai pe mu’a ke totongi ‘a ‘ene ngaue ‘i hono ‘api.  Pea ke ne talaange pe ‘e ia ko e ha ‘a ‘ene totongi. 

Mei he tafa’aki foki ‘a Lepani, na’e ‘ikai te ne feinga ke fakakuikui ko e pehe ke tuku ai leva ‘a Sekope ke ne ngaue’aki.  Neongo na’e te’eki ke ne ma’u ‘a e ‘Otua mo’ui, ka na’a ne ma’u pe ‘a e maama fe’unga ke ‘ilo’i ‘oku ‘ikai ke totonu ke ne ngaue ta’e totongi ‘aki ha taha koe’uhi pe kuo ne paea ‘aunofo mai ki hoto ‘api.  Sai ange ‘a Lepani ia  ‘i he fu’u kau lotu tokolahi.  Ka ‘i ai ha taha kuo unga atu ki honau ‘api koe’uhi kuo tuli mei he famili ko ‘ene kau ‘i he mo’ui, kuo lau ‘e he ‘api ia ko ia ko honau faingamalie ke ma’u ‘enau ki’i fefine ngaue pe tangata ngaue.  Fai atu ‘a e si’i kumi hufanga kuo ke toki hanga mai koe mo ho’o fakapikopiko ‘o hilifaki mai ki he ki’i sipi kuo ui ‘e he ‘Eiki ke mo’ui hono laumalie.  Tokanga!  He ko e tokotaha ‘oku ke ‘amanaki ke ke toho ‘i homou ‘api ‘aki ‘a e fo, ngoue, tauhi tamaiki mo e ha fua, ko e ‘Otua i.  Na’a faifai ho’o toho ‘a e ‘Otua (tapu mo Ia) pea houhau ‘a e ‘Otua ‘o toho koe ki luo. 

Ko e ui ia ‘o e ‘aho ni ke tau konisenisi mo’ui mo tau fai ma’oni’oni ‘o tatau ai pe pe ko e tokotaha ‘aunofo koe hange ko Sekope, pe ko koe ‘oku ou ‘a e ‘api hange ko Lepani.  Tau feinga ke tau fai ma’oni’oni he ‘oku ‘afio ‘a e ‘Otua ‘i he potu kotoa pe.  ‘Ikai ko ia pe ka ko e mahino pe ia ‘oku ‘iate kita ‘a e ‘Otua ‘o ka ‘oku fai ‘a hoto lelei taha ki he kakai kotoa pe.  Koe’uhi pe ko Sisu.