Senesi 26:20-22; 17:6; II Kolinito 4:8-12; Loma 8:35-39.
MOLOKIA 'A MO'OSIPO
Ko e me'a faka'ulia ko Setane mo e fili 'a e 'ikai ke tukua 'a 'ene tuli mai ke fakafe'atungia'i 'a e ngaue 'a e kakai 'a e 'Otua, 'io 'oku mo'oni pe 'a e lau 'a e punake, "Ko e fili fiungata'a, 'I he tau'i 'o e tangata". Ka neongo ia 'oku tau matu'aki malie'ia 'i he Laumalie 'o e 'Otua na'e 'ia 'Aisake - 'a e anga 'o e me'a na'e 'oange 'e he 'Otua ma'ana.
Na'e 'ikai ke ngata 'i he hanga 'e 'Aisake mo 'ene kakai 'o ta'aki 'a e ngaahi pupuni 'o e 'u matavai 'o 'Epalahame, ka na'a nau toe feinga pe foki mo kinautolu ke keli ha ngaahi matavai fo'ou, ke mahino pe foki 'oku 'ikai ke fai ha fakangatangata 'i he ngaahi kelesi na'e ngata ai 'a e fanga tamai 'o e kuohili. Ka kuopau ke fai ha toe taha atu ai. Pea ko e sipinga lelei ia ke tau matu'aki tokanga ki ai. Ke tau toe taha atu kitautolu mei he kelesi na'e ma'u 'e he kakai 'o e kuohili. Ke 'oua na'a tau mo'ui "kai fakafana"! 'Oku 'ikai ke 'uhinga ia ke pehe ke tau fakata'e'aonga'i 'a e kelesi na'e 'omai kitautolu mei 'Isipite, he na'e tomu'a toe fou atu pe 'a 'Aisake 'o toe keli 'a e ngaahi matavai na'e keli 'e 'Epalahame pea toki manga atu ki tu'a 'o keli 'a e 'u vai pe 'a'ana.
'A ia ko hono totonu pe ia. Tau 'uluaki faka'aonga'i 'a e 'u kelesi na'e fakafou mai mei he kakai kehe, he 'oku 'ikai ke fai ha fepakipaki 'i he ngaahi Laumalie 'o e 'Eiki he ko e Laumalie pe 'e taha, pea tau toki hoko atu 'o fai 'a 'ete kumi 'Otua 'iate kita pe. Ke te 'ilo'i ai 'e kita 'a e 'Otua 'i He'ene ha'u fakahangatonu kiate kita.
'Oku mahino foki ko e ta o'o ki he fili. 'A e 'ikai ke ngata pe 'a e hoko mai 'a 'Aisake 'o fakama'a 'a e ngaahi matavai tupu'a kae toe keli mo e ngaahi vai fo'ou! Ka ko hono ngaohi totonu pe ia 'o Setane. Ka 'oku ne hanga 'o maumau'i ha ngaue faka-'Otua ko e me'a pe ke fai ko ha fu'u laiki faka'aufuli 'a hono ki'i pule'anga. 'O fefe? 'O 'ikai ke ngata pe 'i he me'a na'a te 'i ai 'i he kuohili ka kuo te toe 'unu atu kita ke toe ofi ange ki he 'Otua. Ke toe lahi ange hoto taimi mo e 'Otua, lahi ange 'ete tui, toe lahi ange 'a 'ete 'ofa mo 'ete kataki. Pea 'i he fai pehe pea 'oku tu'u ngaungaue leva 'a e pule'anga 'o e fakapo'uli. Sio pe kia 'Aisake. Na'e 'amanaki 'e he fili ia kuo tuli ki he tele'a 'e 'alu 'o ngaue pe mo e loto mamahi pe loto fo'i, kae mole ke mama'o! Hange 'oku toe lahi ange 'a e ivi ia 'o 'Aisake pea toe lomatolu mai mo 'ene kataki mo 'ene falala tui pikitai ki he 'Otua.
Pea 'oku malie foki 'a e 'osi hono keli 'o e 'uluaki vai kae fakafekiki ai 'a e fili. Li'aki ia toe keli 'a e vai hono ua, toe fakafekiki pe, toe li'aki atu mo ia. 'Amanaki 'a e fili ia 'e fo'i pe holoa, kae mei fe? Toe 'alu atu 'a 'Aisake ia 'o toe keli 'a e vai hono tolu! Pea 'oku pehe 'e he talanoa, "pea na'e 'ikai te nau kee ai!" He 'ikai toe muimui mai 'a e fili, 'a e kau Filisitia. Ko e ha kuo toe tuku ai 'a e feinga fakafekiki? 'Ilo 'e he fili ko e lahi 'ene ha'u ko e lahi ange ia 'a e vai, pea ko e vai foki ko e taipe pe ia 'o e Laumalie 'o e 'Otua. Toki 'ilo 'e he fili 'e 'ikai te ne lava'i 'e ia 'a e fu'u "tangai" tui moe tangai ivi mo kataki o 'Aisake! 'Oku tau pehe foki ko e "fili fiungata'a", ka 'oku toe fiungata'a ange 'a e tangata ia 'a e 'Otua. 'E fiu ia hono laiki mo have'i 'e 'ikai kei hoko atu pe ia.
Pea ko ia foki 'a e Laumalie 'o e Toetu'u. 'E tamate'i pe ia 'o hange 'oku mate, ka 'e hili mai pe 'a e ngaahi taimi si'i 'e toe tu'u mai pe ia. 'io, 'e toe ha'aki ki lalo 'o moloki, ka ko e 'osi mai pe ha ngaahi taimi, kuo "toetu'u" pe ia 'o hoko atu. 'E faifai pea 'e ongo'i 'e he fili ia 'oku fu'u fakahela pea 'e mole taimi mo mole silini hono feinga ke pupuni mo tamoloki 'a e mo'ui faka-'Otua ka 'e "toetu'u" mai pe ia. Na'e a'u 'a Sisa mo e pule'anga Loma ki he "eluelu" 'i he fiu'afeinga ke ta'aki mo tamate'i 'a e "mo'ui faka-Kalisitiane". Tutu 'a e tutu, tautau 'a e tautau, fakahee'i 'a e fakahee'i, kae kei tutupu fo'ou hake pe 'a e Laumalie ia 'o e "Molokia 'a Mo'osipo". 'E moloki pe ia 'i he 'aho ni ka ko e hoko mai pe 'apongipongi ia kuo toe malanga hake pe ia. Pea oku totonu ke pehe 'a e Laumalie 'o Sisu 'oku 'iate koe. 'Ai ke fiungata'a mo ta'emanonga 'a 'ene hohoi ki he mo'ui, 'o 'oua 'e fo'i ngofua mo faka'ita vave 'i he hoko mai pe 'a e fanga ki'i fili "'inisekite" 'o e mo'ui! Pea 'oku talamai 'e 'Aisake 'oku "fu'u 'ata" pe 'a e me'a ia ke fai ai 'a e mo'ui faka-Kalisitiane (26:22).
No comments:
Post a Comment