Senesi 26:17-19; 21:31; Filipai 4:11,12; Sione 4:13-14.
KO E UI MEI HE TELE'A
Mahalo pe na'e mei lava pe 'e 'Aisake ia ke talangata'a ki he tu'utu'uni atu 'a e tu'i ke hiki, 'uluaki pe, he na'e 'osi hanga 'e he tu'i 'Apimeleki kimu'a ange 'o faka'ata 'a 'Epalahame ke ne nofo mo hono hako 'i ha feitu'u pe 'o hono kelekele (Sen.20:15). Ua, na'e 'osi tokolahi fe'unga pe 'a e kau sevaniti ia 'a 'Aisake ke nau tau'i 'a Tu'i 'Apimeleki mo 'ene fa'ahi (26:16).
Ka neongo ia na'e 'ikai te ne loto ke fai ha fu'u fakafekiki pea na'a iku ai 'o fai ha fe'ite'itani mo e kau Filisitia. Ko ia na'a ne hiki atu leva mei loto kolo 'o ne faai atu ki hahake ki he tele'a 'o Kela. 'I he tele'a ko 'eni na'e 'osi 'i ai ha ngaahi vaikeli ne 'osi keli 'e 'Epalahame ai, pea 'i he pekia pe 'a 'Epalahame ia kuo ha'u 'a e kau Filisitia ia 'o tanu ke pupuni'i ke 'oua 'e toe mapunopuna hake ai ha vai.
'Oku tau ako 'aupito ha ngaahi me'a lahi mei he lesoni 'o e 'aho ni. 'Uluaki, ko e loto 'a 'Aisake ke hiki. Kuo 'osi tu'u 'a 'ene langa pea kuo mole ai 'ene pa'anga mo hono ivi. Ka na'e 'ikai te ne teitei sio ki ai. 'Oku mahino pe na'e 'ilo'i pe 'e 'Aisake 'oku 'ikai ko 'Epimeleki 'oku ne tuli ia ka ko e 'Otua pe. Pea ko e me'a lahi taha pe ia na'a ne fiemalie ai. 'Io, kapau te tau 'ilo 'etautolu ko e me'a kotoa pe 'oku hoko ki he'etau mo'ui, 'i he funga 'o 'etau fai lelei mo 'etau mo'ui mateaki mo fai ma'oni'oni 'i he 'ao 'o e 'Otua, ko e ha'u kotoa pe ia meia Sisu. Pea te tau loto fiemalie pe mo loto fiefia ki ai. He ko e 'uhinga foki ia 'o e fo'i lea ko e "tali 'a e me'a 'o e 'aho" ko e "loto lelei" pe "loto fiefia mo fiemalie" ki he me'a kuo hoko mai. Ko ia 'a e loto na'e 'ia 'Aisake.
'Ikai ko ia pe ka na'e mahino foki kia 'Aisake 'oku 'i ai 'a e me'a 'oku 'uhinga mai 'a e 'Otua ke fai. Pea kuo ne 'ilo ta na'e 'uhinga ke 'alu ki he tele'a 'o toe keli hake 'a e ngaahi matavai ko ia na'e keli 'e he'ene tamai ko 'Epalahame, ka kuo toe pupunu 'e he kau Filisitia. Pea 'oku mahino ai foki 'oku 'ikai ko e kavenga 'o e mo'ui ko e "mo'umo'ua" mo e "tu'umalie" ka ko e fai 'o e finangalo 'o e 'Otua. Na'e 'ikai 'aupito teitei puli 'a e 'Otua meia 'Aisake koe'uhi ko 'ene tu'umalie. Na'e kei ma'a pe 'a hono langi 'o fu'u tafitonga 'o kei ha ma'u pe 'a e 'Otua kiate ia 'i he taimi kotoa.
Na'e 'uhinga ange kia 'Aisake ke 'alu 'o nofo 'i he tele'a 'i he'ene nofo 'o mo'umo'ua 'i he loto kolomu'a. He ko e nofo mo'umo'ua 'i he loto kolomu'a ia ko ia pe mo hono ki'i famili 'e 'aonga ki ai. Ka ko e 'alu ki he tele'a te ne lava ke mo'ui ai ma'a ha kakai kehe. He ko e tele'a ko e potu makamaka mo faingata'a pea 'oku lahi 'a e ngaahi mo'ui kuo mole ai. Ko 'enau mate koe'uhi ko e 'ikai ke 'i ai ha vai. Pea ko ia 'a e 'uhinga na'e keli vai ai 'a 'Epalahame ke ma'u mo'ui ai 'a e kau fononga 'i he vaa'ihala 'o e mo'ui. Ka kuo ha'u 'a e tevolo ia 'o tanu mo feinga ke pupunu telia na'a ma'u 'e ha taha ha mo'ui, 'a e mo'ui faka-'Otua. Ko ia 'a e taumu'a 'a e 'Otua kia 'Aisake 'i he taimi ko 'eni. Pea ko e 'alu 'a 'Aisake ko e to'o pe 'o e 'uli kuo ne pupunu 'a e matavai. 'Ikai 'oku tau sio ai ki he mo'oni fakalaumalie ko ia, kuo 'osi fai 'e he 'Otua ia 'ia Sisu Kalaisi 'a e keli mo e ta 'o e matavai mapunopuna (Sione 4:14). Na'e keli ia 'i Kalevale 'i he tu'a kolo koe'uhi ke 'ilonga ha pilikimi 'e fou ange ai pea ke nau ma'u mo'ui ai hono laumalie.
'Oku lolotonga lelepa ni 'a e "matavai mo'ui" ko ia. Ka 'oku punusia 'ene tafe 'i he angahala. 'Oku feinga ma'u pe 'a e tevolo ke tanu 'a e ngutuvai ke 'oua na'a inu ai 'a mamani pea 'ikai te nau toe fieinua ki he holi 'a angahala. Ko kitaua 'a e 'Aisake kuo ui 'e he 'Otua ke tukuange 'a hota tu'unga tu'umalie mo fakafiefiemalie 'i he kakano koe'uhi ka ta tokoni ki he Laumalie 'i hono to'o mo tafi 'a e matavai mo'ui ke toe tafe mai 'i hotau kuonga ke tau toe inu mei ai 'o mo'ui.
No comments:
Post a Comment