Senesi 27:39-40; 25:23; II Tu'i 8:20-22; Kal.6:7,8
TETE UTU PE KO IA 'O KA HOKO MAI 'A E PO
'Ikai pe ke tuku 'a e kole 'a 'Isoa. 'A 'ene kole kia 'Aisake ke tapuaki'i pe mu'a ia. Kae hange ko 'etau lau 'aneafi, ke kole atu kia 'Aisake, kae taumaia ko ha me'a 'a 'Aisake. Ko e me'a 'a e 'Otua. Pea na'e totonu ke ne kole ki he 'Otua. Ka ekole ia ki he'ene tamai! He 'oku 'i ai ha "tapuaki" 'a 'ene tamai 'a e me'a 'a e 'Otua. Kaekehe kuo he holo pe si'i 'Isoa. 'A 'Isoa kaukaua mo fakahiehia, ka ko 'eni kuo ne tangi hange ha ki'i pepee. Pea lahi 'o 'ene tangi mo e kole ki hano tapuaki. Sio ange ki he 'ene faka'amu pe 'oku 'ikai pe ke 'i ai ha ki'i me'i tapuaki, "'alaa 'a au foki". Pehe 'e ia ko e tapuaki 'Otua 'oku hange ha kole me'a momoko! Pe 'oku kei toe ha ki'i me'i Mei pe ki'i konga Kape pe aa! 'Ikai 'oku tau manatu ai kia Taivasi 'a 'ene kole kia Lasalosi "ha ki'i me'i vai pe". Kae faingata'a ko e fu'u vanu, ka ko e vanu 'a e 'Otua. Kapau na'a ko ha vanu pe ia 'a ha tangata 'e lava pe. Ka ko e me'a ki he 'Otua, fakahela ha toe tangi. Nofo a kita ia 'o tali 'a e nunu'a he ko e me'a pe na'a te kole'i.
'I he fu'u vili lahi 'a 'Isoa, ke 'omi hano tapuaki, ko ia na'e 'oange leva 'e he 'Otua 'ia 'Aisake, 'a hono tuha. Pea ko e fe'iloaki ia 'a 'Isoa pea mo hono 'Aho Fakamaau. He kuo lea mai 'a 'Aisake, ka na'e 'ikai ko 'Aisake ia ko 'ene tamai. Ko 'Aisake kehe 'eni ia. Kuo 'ikai toe ufi pe toe pikopiko holo 'a 'ene fakahoko mai 'a e finangalo 'o e 'Otua ki he'ene mo'ui: "'E he mama'o ho nofo'anga he kelekele lelei, mo e kaha'u 'oku hifo mei langi". 'A ia 'oku 'uhinga 'e 'ikai 'aupito ke mamata 'a 'ene mo'ui 'ana 'i he me'a ko ia ko e mahutafea. Kae fetakai pe ia mo e pakuka, masiva mo e faingata'a. 'E mo'ui fusimo'omo mo lotomamahi. 'E tatau pe 'a 'ene "he mama'o" mei he tu'umalie mo e mo'umo'ua fakamatelie, pea mo 'ene "he mama'o" mei he 'Otua mo e 'u tapuaki fakalaumalie. 'E hala 'anoa 'a 'ene mo'ui mo ha kelesi pea te ne mo'ui ta'e'aonga mo masiva 'i he fiemalie 'a e 'Otua. Te ne ta'etopono mo mo'ui hoha'a tu'u 'i hono ngaahi 'aho kotoa. Ko ha fa'ahinga tukunga mo'ui faka'ofa. "Ta'eifo 'a e mo'ui kae manavahe ki he mate"! Ko ia 'a e me'a 'oku tau fa' alau ko e "mala'ia mo'ui", pe ko e "heli 'i mamani".
Toe kanoni'aki mo e tu'utu'uni, kia 'Isoa, te ne mo'ui pe 'i he'ene heletaa. Ko 'ene mo'ui 'e 'i hono nima pe. He 'e ala kiate ia e tangata kotoa pe. Ka malohi 'e mo'ui, ka 'o ka vaivai 'e mate. Ko e tufakanga tatau 'eni na'e 'oange kia 'Isime'eli (16:12). Pea ko e toki me'a fakamamahi ia ko e 'ai ke tokanga'i pe 'e kita 'a 'ete mo'ui. He 'oku te 'ilo'i nai 'a e fai 'o e mo'ui 'i he fu'u 'univeesi ko 'eni. Ko kita ko e me'a vaivai pe he ko e efu mo e kutufisi! Ko e ha 'a 'ata 'e lava. Kapau na'e fakafoa pe 'a 'Isoa 'i he te'eki ke hoko atu ha me'a, ngata pe 'i he mole 'a e tapuaki, huanoa 'o ka fakangofua 'a e ha'aha'a 'o e mo'ui ke fakafa'afa'aki kiate ia. Ko e me'a foki ia na'a ne holi ki ai ke mo'ui fa'iteliha! Ke fai pe ia ki hono loto. Pea ko 'eni kuo faka'ata kakato ia 'e he 'Otua ke ne fai leva ia (Sione 13:27,30). 'Oku pehe foki 'e he Tohitapu, na'a ne mo'ui fe'auaki (Hep.12:16). Mo'ui fe'auaki 'a e tokotaha na'e teu mo'ona 'a e tapuaki faka-'Otua! Pea te ne pehe nai 'e nofo'i 'e ha kakai fe'auaki 'a e Pule'anga 'o e 'Otua (Kal.5:19,21)? Tapu 'aupito! Pea ko 'eni kuo faka'ata ke 'alu a 'o fa'iteliha pea hoko atu aa hono loto ke fai ke kakato 'a 'ene fe'auaki, he ka kakato 'a e angahala ko hono fua pe ko e mate.
Na'e 'ikai ke ngata ai 'a e mala'ia 'o 'Isoa, ka na'e fekau'i kuopau ke ne "tamaio'eiki" ki hono tehina, 'a e me'a ko ia na'e toka 'afio'i 'e he Ta'ehamai 'o talu pe mei mu'a (25:23). Ko e hako 'o 'Isoa 'a 'Itomi, pea ko 'Itomi na'e tupu pe 'o hoko ko e fu'u matakali mo e pule'anga kaukaua. Na'a nau tu'u tau'ataina pe kae toki hoko mai ki he kuonga 'o TEvita ne nau hopoate ai ki 'Isileli, ki he hako 'o Sekope. Pea fai pehe mai ai pe 'o iku pe ki he'enau pulia mei mamani.
Ko e tukunga 'a 'Isoa, 'oku lolotonga hoko ia 'i he kakai tokolahi 'i he taimi ni. Nau tutupu hake 'i he ngaahi matu'a lotu pea nau fakata'eta'etokanga koe'uhi pe ko e pehe 'oku lotu 'a e ongo matu'a. Pea faifainoa'i pe. Pea kovi, tukuange 'e he ongo matu'a ke fai pe ki hono loto. 'Io, pea ne hoko ai pe 'o fakafepaki fakahangatonu ki he 'Otua. Pea telia na'a kapui 'ene mo'ui 'e he kakano. Pea ka 'i ai ha me'a 'e fai 'i he kakano te te utu pe 'e kita 'a e 'auha (Kal.6:8). Tau tali mu'a 'a Sisu pea 'oange kiate Ia 'a 'etau mo'ui, he 'oku Ne folofola mai ko ia 'oku ne kalofaki 'ene mo'ui, ke fai pe hono loto kae tuku 'a e finangalo 'o e 'Otua, ko 'ene tuku ia ke mole (Mt.10:39). Pea 'oku totonu foki ke o'i kei si'i 'etau fanau pea akonaki'i kinautolu 'i he ngaahi hala 'o e mo'ui ('Efes.6:4), pea mo e sipinga 'a e Laumalie ke 'oua na'a 'i ai ha taha 'e mole kae ma'u kotoa pe 'a e Mo'ui Ta'engata.
No comments:
Post a Comment