Senesi 27:41; 32:3-11.
KO E "HE MAMA'O"
Kuo ta'utu hifo 'eni 'a 'Isoa 'o feinga ke folo 'a e ngaahi fo'i kona 'o e 'aho 'aneafi. Kuo fakalau mamalie mai 'a e mole hono tapuaki, kae'uma'a 'a e nunu'a kuo ne hoko ki ai pea kanoni'aki 'a 'ene mamahi 'i he sio atu kuopau ke ne tamaio'eiki kia Sekope, 'a hono tehina. Koe'uhi foki ko ia na'e mohu taleniti'ia pea tokangaekina mo manakoa. Pea ko ia pe foki na'e faitu'utu'uni mo fa'ifa'iteliha. Na'e 'alu takai holo pe ia. Toki foki pe ki 'api ki he kai. Ka ko Sekope pe ia na'e nofo 'i 'api mo fai 'a e 'u pu'i. Pea 'oku folo ngata'a kiate ia 'a e fakakaukau'i atu 'a e mafuli 'o e fo'i me'a. Ha'u 'a Sekope ki he Sea, kae tu'u holo ia 'o tali angi ki ai!
'Oku 'omi 'e he fo'i veesi 'o e 'aho ni ha ngaahi fo'i fekau mahu'inga pea 'oku totonu ke tau tokanga ki ai. Pea 'oku ne fakamahino'i foki 'a e "he mama'o" 'a 'Isoa mei he 'alunga 'o e Mo'ui.
1. 'Uluaki, na'e 'ikai 'aupito ke 'i ai ha teki 'a 'Isoa ki hono ako'i kuo fai. Na'a ne 'amanaki 'e 'i ai ha ki'i meo hifo 'a 'Isoa koe'uhi kuo to hala 'a 'ene mo'ui pea ne feinga ke aafe aa ke fai ha me'a fo'ou. Mei fe! Hange 'oku hanga 'e he fo'i me'a ni ia 'o toe fakafefeka'i 'a e loto 'o 'Isoa. Na'e totonu ke fakatomala, ka kuo 'ita ia. Pea na'e totonu a ke ki'i maama, ka kuo toe lolo mai 'a e po'uli ia. Pea 'oku 'ikai ke toe faikehekehe ia mo Siutasi. 'I he 'ilo'i ko ee 'e Siutasi kuo 'afio'i 'e he 'Eiki ko ia te ne fai 'a e lavaki, na'e totonu aa ke ne veteange kuo hala 'a e laka kae toe fai mu'a aa ha kamata fo'ou pe atuku 'a e me'a kuo hoko ke fai ha situ'a faka'aufuli ki ai. Ka e hala'ata! Hu fakavavevave ki tu'a 'a Siutasi ia pea pehe 'e he Folofola pea "kuo po'uli ia" (Sione 13:30). Pea ko e mo'oni ia 'ilonga ha taha 'e 'ikai te ne tali a 'a e maama kae kei kikivi pe ia ki hono loto ko e tokotaha ia kuo fononga ki he "po'uli loloo". Ko ia kotoa pe na'e 'ia 'Isoa. 'Ikai ha liliu, pea 'ikai ha fakatomala, ka ko e 'ita pe mo e lotomamahi pe atupu fakautuutu 'a e taufehi'a. 'A'asili ai pe 'a 'ene "he mama'o".
2. Ko e hala 'e taha 'a 'Isoa, ko 'ene ta'e tukuaki'i ia. Na'e 'ikai pe te ne teitei pehe 'e ia 'oku 'i ai ha'ane me'a ne hala. Sio pe ia ki he kakai kehe 'o tala kuo nau fa'ufa'u kovi kiate ia. 'Oku nau nofo pe ke hamu 'a 'ene ngaahi me'a lelei. Pea ko e kakai kotoa pe 'oku nau fakatanga'i ia. 'Oku 'ikai ha taha ia 'e 'ofa ai. Pea ko e mo'oni foki ko e me'a ia kuo tu'ulu atu ki ai. Ka 'oku 'alu atu foki he ko ia pe na'a ne kamata. Pea 'ikai ha'ane maninia 'e taha kae 'a'asili ai 'a 'ene sio kovi takai, pea ne'ine'i ne 'oange ki ai 'a 'ene "heleta ke falala" ki ai, he 'e ala ki ai 'a e kakai, ka ne ta'e'oua 'a 'ene ala holo. He ko e fua 'oku te li atu ki he kakai ko ia kotoa pe te nau toe 'ai mai (Mt.7:2). Ka te 'oatu ha me'afua ko e 'ofa, pea ko e 'ofa pe 'e toe 'omai. Ka 'okapau 'oku te li atu 'a e fehi'a, pea 'e fai ha ofo 'i ha'ana toe totongi mai ha fehi'a tatau pe! Toe "he mama'o" ai pe 'a 'Isoa.
3. Tolu, ko e toe hala 'e taha na'e fai 'e 'Isoa, hanga 'e ia 'o tukuaki'i 'a Sekope. Tokua ko Sekope na'a ne kaiha'asi hono tapuaki. Pea nofo ia 'o sio kovi kiate ia pea ne lama ke fakapoongi ia 'i ha pekia 'a 'Aisake. Na'e 'ikai pe ke teitei misi 'a 'Isoa ia, 'oku 'ikai ko Sekope na'e fa'ufa'u ke hamu hono tapuaki, ka ko e 'Otua pe ia. Ko e 'Otua pe ia na'a Ne tu'utu'uni 'e sevaniti 'a 'Isoa kia Sekope, (25:23), na'e 'ikai 'aupito ko ha si'i loto 'o Sekope. Na'e fai 'ata'ata pe 'e Sekope ia 'a e mo'ui faka-'Otua. Na'e 'ikai ha'ane fa'ufa'u 'ana ki he tapuaki 'o 'Isoa.
4. Pea 'i he 'ikai te ne 'ilo'i ko e 'Otua ia, ko ia na'e fakautuutu ai pe 'a e fakapo'uli 'o hono loto. 'Io, ka 'ikai te te 'ilo ko e me'a kotoa pe 'oku hoko kiate kita 'i he 'aho takitaha, 'o tatau ai pe pe ko e puke, mate, folau ki muli, lohiaki'i, pa'usi'i, lau'i, tuli mei 'api, taa'i mo e ha fua, ko e ha'u kotoa mei he 'Otua, te te matalili kita. Pea ko hono totonu ke mate a' e me'a kotoa pe ki he 'Otua. Ko e 'uhinga ia 'o Kalevale, ka 'i ai ha kovi pe mamahi, pe tukuaki'i, ke 'ave kotoa pe 'o tutuki ki Kalevale ki he Kolosi 'o Sisu, he ko e mate'anga ia 'o e fo'i pulu. Pea ko e 'uhinga foki ia 'a e lea malie ko ia na'e fai 'e Paula ki he ki'i Siasi fetukuaki 'o Kolinito, "He na'e 'ikai te u tu'utu'uni mo ha me'a ke u 'ilo ki ai 'i homou lotolotonga, Sisu Kalaisi pe, pea na'a mo ia ko hono kalusefai pe" I Kol.2:2. Ke 'oua 'e toe mate ha me'a ia ki ha taha, kia Mele, Tevita, Sione, 'Ana pe Sekope, he 'e toe loloa ai 'a e fetakai ia. Koe'uhi pe foki ko e tangata kotoa pe 'oku fakatupu 'ita pea 'oua na'a teitei mate ha me'a ki ai. Ko e 'ave pe ia ki he 'Otua pea 'oku fiemalie 'a e loto kotoa pe. Ko ia ka 'i ai ha me'a 'oku hoko, 'ai pe ke te 'ilo ko e 'Otua ia, pea 'osi. Pea te fiemalie leva. Ko e me'a ko ha'o toe manatu'i hake 'a e tangata pe fefine na'e fou mai 'a e langa'i ho'o 'ita. 'Ofa mai aa ke tau mate kotoa kia Sisu mo hono Kolosi Ko e 'auti (out) 'anga ia 'o e fo'i pulu. Pea 'e toe kamata fo'ou leva 'a 'etau va'inga. Ka 'o ka toe fai ha sio ki ha taha kehe hange ko e sio 'a 'Isoa ko e toe "he mama'o" ai pe ia mei he poini, pea mo e 'Otua.
No comments:
Post a Comment