Senesi 27:14-17; 28:20; Matiu 24:4-5; Maake 13:5-6
KO E FAI TEUTEU
Ko e 'aho 'eni 'o e teuteu 'a Sekope ke 'alu kia 'Aisake ke ma'u mai 'a e tapuaki na'e tuku tauhi mo'o hono ta'okete ko 'Isoa. Kuo ngaohi ha ongo ki'i kosi 'o fai'aki 'e he fa'ee ha ngaohi lo'imanu ma'ae tangata'eiki. Pea 'i he 'osi 'o e ngaohi me'akai na'e 'omi leva 'e Lepeka mo e ngaahi kofu mahu'inga 'o 'Isoa 'o 'ai 'ia Sekope. Ko e ngaahi kofu mahu'inga ko ia ko e ngaahi kofu fakataula'eiki ia 'o e tama hoko ('a e 'ea), pea 'oku taitai taha pe hano tui. 'Asinga foki ko e toe tulimanu 'a 'Isoa, lahi nofo vao pe ia pea 'ikai ai pe ke loko faka'aonga'i 'a e ki'i teunga mahu'inga ni kae tuku fale'i pe. Pea 'oku fu'u mahu'inga ia ke tau tokanga'i 'a e tui 'a Sekope 'a e 'u kofu ni ka 'oku mahino mai ko e kofu pe ia 'o Sekope, 'o fakatatau ki he tokatu'utu'uni 'a e 'Otua. Pea 'oku toe e'ee'a hono mahu'inga 'o e ki'i teunga ni ko e 'amanaki ke tali'aki 'a e tapuaki fakafamili. Pea ko ia 'i he 'ai 'e Lepeka 'a e teung a'o 'Isoa 'ia Sekope kuo hanga pe 'e Lepeka ia 'o fakanofo 'a Sekope. Kuo to'o 'e Lepeka ia 'a e teunga meia 'Isoa. Toki kimui mai ai pe 'a e tapuaki'i ia 'e 'Aisake 'a Sekope kuo loa 'a e fakahoko ia 'e Lepeka kia Sekope 'a e tu'unga hoko. Pea ko e me'a ia na'e fai 'e 'Aisake ko e toki "angimui" mai pe ia ki he me'a kuo fai 'e Lepeka. Pea hange ko 'etau lau 'aneafi, hange nai kuo fa'ao 'e Lepeka ia 'a e tu'unga taki 'o e famili. Kae fefe, kuo "kui" 'a 'Aisake, ka ko e kui ki he finangalo 'o e 'Otua, ko e me'a leva 'oku hoko ko e feinga ke fakatoli'a hono loto.
Pea ko e fai teuteu 'oku 'ai ko e fo'i feinga 'ata'ata pe ke fakahu malie ki he loto 'o 'Aisake. Kuo 'ai 'a e 'u kofu 'o 'Isoa, mo e kili'i kosi koe'uhi ke fulufulua 'o hange ko 'Isoa, pea toe 'ai mo e lo'imanu ke tatau tofu pe mo e lo'imanu 'a 'Isoa he "ko hono manako". Me'a fakahela e! Ko e fai ni 'o e 'ume'a kotoa pe ke fakatoli'a'i 'a e loto 'o e tangata, 'a e tangata kuo ne tukunoa'i 'a e finangalo 'o e 'Otua. Pea toki me'a fakamamani ia. Ko e fo'i loto 'o 'Aisake ko "'Isoa" pea kuo pau ke kati faka-'Isoa 'a e pele! Ke feinga'i 'a e me'a kotoa pe ke fotu 'Isoa koe'uhi pe ke tali 'e 'Aisake. Faka'ulia ia ko e faingata'a ke fakatoli'a 'a e loto 'o e tangata. Pea vakai foki ki he hela'ia 'a e kakai kehe 'i he feinga'i ke lava 'a hoto loto. Kovi pe lelei kaekehe pe ke lava. Kuo tokolahi 'a e kakai kuo nau mali ki honau "loto". Ka 'i he fuoloa mai 'eni 'a e nofo kuo ne toe fakame'apango'ia 'i he tokotaha ko ia na'a ne fili ko hono manako. Ka ko hono loto foki! Mo'oni pe 'a e palofita, "Ko e fungani 'i he me'a kakaa ka ko e loto, pea 'oku hilio hono kovi". (Selem.17:9).
Pea 'oku poto foki 'a e tevolo 'i he vilo mai 'o e ngaahi fo'i "vai" ke fe'unga mo hoto loto, kae hiliange ko e mate pea mo e 'auha. Pea 'oku tau toe sio ai pe foki 'i he tapa 'e taha 'o e tevolo 'i he fai teunga ko 'eni ke kakaa'i 'a 'Aisake. 'I he 'ilo ko ee 'e he tevolo 'a hotau loto pea 'oku ne toki feinga leva ke 'omai 'a e me'a pe ko ee 'oku te loto ki ai. 'Oku ne 'omi 'a e "kofu" hotau manako 'uma'a 'a e "me'akai" 'oku tau vovo'ia ai. Pea tau fiefia foki ai 'o tau to ai. Tau toki kalokalo 'i ha taimi 'i he'etau 'ilo'i kuo fehalaaki ka kuo 'alu 'a e tevolo ia kuo ne 'osi lava'i 'a hoto loto. 'Io, 'oku pehe tofu pe mo e me'a 'oku tokanga ki ai 'a e Laumalie 'i he lesoni 'o e 'aho ni. Tau tali 'a Sisu, koe'uhi ke tau feinga ma'u pe ke tuku hotau loto kae fai Hono finangalo.
No comments:
Post a Comment