Ako 69: Fakatomala

‘AISEA 1:1-20; ‘AISEA 41:10, II PITA 3:9-13; MT. 3:1-12

KO E UI KE FAKATOMALA

Ko ‘Aisea na’e ui ‘e he ‘Otua ke palofita ki Siuta ‘i he senituli valu K.M (kimu’a he Misaia). ‘Oku ‘i ai ‘a e fakamahalo ngalingali ko ‘Aisea na’e ha’u ia mei he famili hou’eiki ko e me’a ia ‘oku tau mahu’inga ‘ia ai ‘ia ‘Aisea. ‘Oku ‘ikai te tau fu’u tokanga ki he tukunga fakamatelie ‘o e palofita. He ‘oku tu’u ‘a e mahu’inga ia ‘o ‘Aisea ‘i he fekau ko ia na’e fakahoko ‘e he ‘Otua ‘iate ia lolotonga ‘a e ngaahi taimi faingata’a ‘o e Pule’anga Siuta.

KO E VAHEVAHE LALAHI ‘O ‘AISEA 1:1-20

1. Ko e Valoki ‘o e Faihala (1:1-9)
i. Ko e talatalaaki’i kovi hono kakai (1-3)
ii. Ko e toenga fakaili ‘e he ‘Otua (4-9)

II. Ko e lea’i ‘o e Malualoi (1:10-15)
i. Ko e kakai na’e lea’i (10)
ii. Teke’i ‘e he ‘Otua ‘a e Malualoi (11-15)

III. Ko e Tala’ofa ‘o e Fakamolemole (1:16-20)
i. Ko e tu’utu’uni felave’i mo e Fakamo’ui (1:16-20)
ii. Ko e Tala’ofa ‘a e ‘Otua (18-19)

‘Oku ha mei he ngaahi veesi ko ‘eni ‘a e ‘ulungaanga lalahi ‘e ua ‘o e ‘Otua.

1.      Ko e ‘Otua ‘oku ma’oni’oni. Pea ‘oku Ne houhau ‘i he angahala. Ko e me’a pe ia ‘e taha ‘oku ne malava ke vahe’i ‘a e ‘Otua mei he tangata ko e faiangahala. Pea ‘oku ‘i ai ‘a e tautea ‘o e faiangahala.

2.      Ko e ‘Otua ko e ‘ofa. Neongo ko e ‘Otua Ma’oni’oni, pea ‘oku Ne tautea ‘a e angahala, ka ko e ‘Otua fai manava’ofa foki. ‘Oku Ne ui mai ke tau ‘alu ange kiate Ia he neongo ‘e lanu fefe ‘a ‘etau angahala ka ‘oku Ne malava noa pe ke fakama’a. Ko e ui ia ‘o e ‘aho ni. Ke tau ha’u kiate Ia ke ma’u mo’ui.