SEN.29:7,8; Ng.20:28-31; Sione 10:11.
TOKANGA'I 'A E FANGASIPI
Mahalo foki na'e 'ohovale 'a Sekope 'i he fu'u fuoloa 'a e nofo 'a e kau tauhisipi mo e fanga sipi 'i he ve'e vai. Mahalo pe foki ko e tokolahi ko e tamaiki pe. Ka 'oku sio 'a Sekope kuo totonu ke fai mo fakainu 'a e fanga sipi koe'uhi kae fakafoki ke nau o 'o kaikai 'i he malu efiafi. 'Ikai ko ia pe kae tokanga'i 'e Sekope 'oku fu'u kei ho'ata fau ki he fakainu 'o e fanga manu. He ko e fanga manu na'e pau ke fakainu tu'o taha pe 'i he 'aho. Pea ko e fakainu pe 'i he houa efiafi mahalo nai ki he taimi fa pe nima efiafi. Ka k 'eni, mahalo ko e toki 'osi nai pe ia 'a e taha pe ua efiafi. Ko ia 'a e 'uhinga 'o e mo'utafu'ua 'a Sekope. Pea ko 'enau tali, kuopau ke toki omi kotoa 'e fanga sipi kehe, koe'uhi ke tokolahi mai ke nau teka'i 'a e fu'u maka, pea 'e toki fakainu fakataha 'a e fanga manu. Nau fieinua pea 'oku nau toe fiekaia. Ka 'oku 'ikai ke tokanga ki ai 'a e kau tauhi, lahi ange 'a 'enau tokanga ke nau toki 'ai fakataha.
'I he ngaahi 'aho ni 'oku lahi 'a e fanga sipi 'a e 'Otua 'oku nau fieinua mo fiekaia koe'uhi ko e ta'etokanga 'a e kau tauhi. Tokolahi 'a e kau tauhi ia 'oku nau fu'u fakapikopiko 'aupito. Ko e koloa pe kiate kinautolu kuo fili'i pe fakanofo ko e kau taki pe kau faifekau. Na'e lahi ange pe 'a 'enau tokanga ke ma'u 'a e fo'i lakanga, 'i he'enau tokanga ke fafanga'i mo tauhi lelei'i 'a e fanga sipi 'a e 'Otua. 'Oku totonu foki ke tau 'ilo'i 'a e kakai 'oku tau tauhi ko e kakai 'a e 'Otua, pea ko e kakai na'e 'ikai ke ma'u ngofua ka na'e fakatau kinautolu. Na'e 'ikai ke fakatau pa'anga, siliva pe koula - ngaahi me'a 'auha - ka na'e fakatau kinautolu 'aki 'a e ta'ata'a 'o Hono 'Alo ko Sisu Kalaisi. Pea ko e kakai k ia ko e "siasi ia 'o e 'Otua". Kae pehe 'e he kalasi ia 'e ni'ihi ko e siasi 'oku nau tauhi k honau siasi, pe siasi 'o 'enau tamai mo 'enau kui. 'Ikai! Siasi 'o e 'Otua, na'a Ne fakatau (Ngaue 20:28). Pea kapau ko e siasi 'o e 'Otua pea me'a 'a e 'Otua pea ta 'oku totonu 'aupito 'aupito ke tau fai fakaalaala, ko e fakahaa'i 'a 'etau 'apasia mo'oni kiate Ia 'a ia 'oku 'a'ana.
Ko e fanga sipi 'oku mo'ui, tautautefito ko e sipi 'a e 'Otua pea 'oku toe 'i ai honau laumalie. 'O fafanga fefee'i? Fanongo ki he lau 'a Sisuu, "Ko au ko e Tauhi Lelei. Ko e anga 'o e Tauhi Lelei ke 'atu 'ene mo'ui koe'uhi ko e fanga sipi" (Sione 10:11). Pea ko e 'atu 'o e mo'ui ko e 'oange hoto laumalie ki he me'a kotoa 'oku te fai. 'Oku te 'a fuoloa 'i he hakule 'o e folofola ke fai 'aki 'a e fafanga, 'okku te mohe tuai 'i he lahi 'o 'ete lotu lilo koe'uhi ko e ngaahi laumalie 'oku te tauhi. 'Oku te fa'a 'aukai 'iate kita pe koe'uhi ko e tuai 'a e tupu 'a e mo'ui 'a e fanga sipi. 'Oku te tu'usi 'a e ngaahi me'a lahi 'o e mo'ui kakano koe'uhi ke lava lelei 'a hoto fatongia tauhi.
'Io, ko e me'a tatau pe mo ia 'a 'etau tauhi fanau. Pea kuopau ke foaki 'etau mo'ui, hotau taimi mo hotau ivi ki he ui ma'olunga kuo Ne tuku mai. Pea 'oku mo'oni 'a e lau 'a e punake, "ko e tonu pe 'o e ngaue ko ia, ke totoivi hono fai".
Konga kovi foki 'o e ngaue 'e taha 'oku tau fa'a mo'ua ai, ko 'etau fetauhivaha'a 'aki mo e kau tauhi kehe. Ka 'oku fu'u to atu ia 'o tau fema'aki kitautolu fakaetangata kae mate 'a e fanga sipi ia. Talaatu 'e Sekope ke fai mo fakainu 'a e fanga manu, talamai 'enautolu ko e me'a maheni, pea kuo hange pe ia ha lao, kuo pau ke nau toki ha'u kotoa, na'a ha'u ha taha ia 'o mamahi. Fakatauange ki he 'Eiki ke Ne tokoni'i kitautolu ke tau hoko ko e kau tauhi vaha'a ki he 'Eiki.
No comments:
Post a Comment