SEN.29:4-6; 24:29; 43:27; Hep.1:1,2.
FAI 'A E FEMAHINO'AKI
Na'e fakafe'iloaki loto mafana 'a Sekope ki he kau tauhi sipi 'i he funga vai. Mahino pe ko e kakai anga fakakaume'a, pea ongo'i foki 'e Sekope 'a 'ene fu'u tau'ataina 'i he talanoa mo kinautolu. Pea fakautuutu ai pe 'a e ongo'i 'e Sekope 'oku 'iate ia 'a e 'Otua, he 'ilonga ha feitu'u 'oku 'i ai 'a e Laumalie 'o e 'Otua ko e potu tau'ataina ia (II Kol.3:17). 'Ikai ko ia pe ka kuo hanga 'e he 'Otua 'o fakamafana'i 'a e loto 'o e kau tauhi sipi ke nau lea lelei kia Sekope, pea 'oku tau tui na'e 'a'asili ai pe 'a e ongo'i 'e Sekope "'oku 'ikai ko ha potu kehe 'eni". Me'a fakalata e! Ko 'ete ongo'i 'oku 'ikai 'aupito ko ha sola kita 'i ha fa'ahinga feitu'u pe 'i mamani. 'O te ongo'i 'oku te ala anga mo e kakai kotoa pe (II Kol.9:20).
Fakafiefia foki kia Sekope, 'a e fehu'i kotoa pe na'a ne fai, kuo nau faka'io mai ki ai. Kakai mei fe? Kalana. 'Ilo'i 'a Lepani? 'Io. 'Oku ne mo'ui lelei pe? 'Io. 'Aho matangi lelei! Me'a kotoa pe 'oku ke loto ki ai kuo hoko pehe mai pe ia. Ngaahi 'aho ia 'oku ui 'e he ni'ihi ko e ngaahi "'aho tu'utai". Hoko a' e me'a kotoa pe 'o fakatatau ki hoto loto. Ka 'oku 'uhinga ia ki he ha? 'Oku 'uhinga ia ki he me'a ko 'eni. 'I he taimi 'oku te kamakamata fo'ou ai 'i he mo'ui, 'oku fa'a feinga 'a e 'Otua ke fakalotolahi'i kita pea 'oku Ne fa'a fakangofua 'a e ngaahi me'a kuo hoko ke 'alu tatau pe mo hoto loto. Ka 'oku 'ikai foki ko hoto loto, ka ko e finangalo ia 'o e 'Otua 'ia Sisu 'iate kita. Pea mo e faka'ai'ai pe ia 'e he 'Eiki 'i he ngaahi 'aho matangi lelei ke te 'alu malohi ai leva ki he mo'ui. Ka 'oku 'ikai teitei 'uhinga ia 'o pehe, ko e hokohoko lelei 'a e 'u me'a ko e sai 'a 'ete mo'ui. Mole-ke-mama'o! Faifai pea te 'afungi ai 'o te to 'o ta'e'aonga. Ko 'ete sai 'oku makatu'unga pe ia 'i he 'Eiki. Ka 'i he 'alu atu pe 'a e fononga pea feinga 'a e 'Otua ke fakahaohaoa'i kita, te Ne tukuange mai leva 'a e faingata'a ke ne 'au'au 'a e ngaahi fakatoetoe 'a e kakano 'i he'ete mo'ui.
Ko e taha 'o e me'a fakafiefia 'o e fetu'utaki 'a Sekope pea mo e kainga ni ko 'enau lea taha. Ko e la 'a e kau Kalana, ko e lea faka-Alamea, 'a ia ko e lea faka-Hepelu motu'a. Ko e lea ia na'e ngaue'aki 'e 'Epalahame neongo pe 'a 'ene nofo 'o laui ta'u 'i Kenani. Pea mahino pe ko hono ki'i famili na'e fakamo'ui ai pe 'a e lea ni. 'O 'ilo 'e 'Aisake, pea toe tupu hake pe 'a Sekope 'o lea 'aki. 'I he taimi tatau pe, 'oku tau tui na'a nau lava pe 'o lea 'i he ngaahi lea 'a e kakai nofo 'i Kenani. Ka 'i he 'aho ni kuo fetu'utaki 'a Sekope mo hono kainga, 'i he'enau lea, 'a e faka-Alamea. Pea ko e konga lahi ia 'a 'enau feha'itaki mo e mafana 'o 'enau feohi, 'uma'a 'enau fie talanoa mai kia Sekope. 'Io, 'oku pehe pe 'a Sisu Kalaisi, kimu'a te'eki ke Ne hoko mai ki mamani, te'eki fu'u mahino'i 'e he kakai ia 'a e 'Otua mo 'Ene mo'ui. 'Ohovale pe kuo lea mai 'a e 'Otua 'ia Kalaisi (Hep.1:1). Ko Kalaisi, ko ia 'a e Folofola (Lea) 'a e 'Otua, na'e 'i he Kamata'anga pea kuo Ne hoko mai 'eni 'a e Folofola ('a Sisu Kalaisi) 'o kakano (Sione 1:1,14). Pea 'oku lava 'a e fetu'utaki mo e femahino'aki 'ia Sisuu. 'Oku folofola mai 'a e 'Otua kiate kitautolu 'ia Sisu, pea 'oku tau lea kitautolu 'ia Sisu kiate Ia. Ko Sisu hotau fakafehokotaki'anga, he ko e me'a ia 'a e lea 'oku fai. 'Oku Ne fakahoko kitautolu ki he tangata. Pea neongo ko ha palangi, 'uli'uli pe Tonga, 'oku tau taha pe 'ia Kalaisi. Ko ia 'i he 'aho ni, manatu'i ia ko Sisu ho fakafehokotaki'anga, tukuange Ia ke Ne fakahoko koe ki eh 'aho ni 'uma'a 'a e palopalema mo e ngaahi kakai te mou fetaulaki mo ia. Pea 'i he'ete lea 'ia Sisuu 'oku vave leva 'a e femahino'aki mo e fetaulaki. Ka 'o ka te toe lea 'i he me'a kehe, pea 'oku lahi leva 'a e fihi mo e lotomamahi.
No comments:
Post a Comment