Ako 39: Mou hoko ko e Kau Sevaniti

Same 71:1-6; Selemaia 1:4-10; I Kolinito 13:1-13; Luke 4:21-30

'IKAI TALI 'A E KOSIPELI 'A E 'EIKI 'I NASALETI
Luke 4:21-30

'I he fai ko 'eni 'a e lea 'a Sisu 'i he falelotu 'i Nasaleti na'e ofoofo mo 'ohovale 'a e kakai (v.22).  Ka 'i he toe hoko atu pe 'e Sisu 'a e fakahoko 'o e 'uhinga 'o e fekau pea liliu leva honau loto 'o nau fu'u 'ita lahi 'aupito (v.28).

Ko e ha 'a e me'a 'oku tau ako mei heni?
Ko e ngaahi me'a ko ia 'oku kau lelei kiate kitautolu 'oku tau fa'a vave ke tali (v.21-23).
Ka ko e me'a ko ia 'e 'ikai ke kau lelei kiate kitautolu te tau teke'i 'ekitautolu ki tu'a (v.24-30).

Ko e ha ne nau fu'u 'ita pehe ai?

Koe'uhi ko e pehe 'e Sisu kuo 'ikai tali ia 'e he kau Siu 'e 'alu ia 'o fakamo'ui 'a e kau senitaile 'o hange ko e fai kia Neamani (v.27).  'Ita lahi ai 'a e kau Siu he 'oku nau lolotonga fehi'a 'i he kau senitaile 'a ia 'oku nau lolotonga nofo hopoate ki ai.  'Oku tui 'a e kau Siu ko kinautolu pe 'a e kakai fili 'a e 'Otua.  Pea 'oku 'ikai tonu ke 'ofa'i pe fakamolemole'i 'a e kau senitaile.  Ka ko 'eni kuo talamai 'e Sisu ia 'e 'alu ia ki ai (ki he kau senitaile - ko koe ia mo au).

(Mou Hoko koe Kau Sevaniti Matiu 20:26;   Sione 13:14-15)