Ako 91: Koe Fekau 'o e Toetu'u

 

SAME 150:1-6; LK. 10:22; MT. 28:16-20; 18:20;1 PITA 3:21-22; LK. 24:47; NG. 1:8;

KO E FEKAU MEI HE ‘EIKI TOETU’U

Hili ‘a e ha holo ‘a Sisu Kalaisi ki he’ene kau ako ‘i Selusalema na’a Ne tu’utu’uni leva ke nau fakataha ki Kaleli. Pea ko e talanoa ‘o e ‘aho ni ko e ha ‘a Sisu ki he kau ako ‘i Kaleli ‘i he funga mo’unga. ‘Oku tau mahalo pe ko e Mo’unga ni ko e Mo’unga ia na’a Ne fai ai ‘ene malanga (Mt. 5-7). Pea ka ‘ikai, pea mahalo ko e Mo’unga ‘eni ‘o e Fakakehe. Pea na’a nau hu kiate Ia, neongo na’e tala’a, ‘a e ni’ihi ‘i he kaunga fononga ‘i Kaleli. Mahalo pe na’e te’eki ke nau fu’u pau’ia ‘i he’enau ‘uluaki sio kia Sisu. Pea ‘oku mahu’inga ke tau tokanga ki he ngaahi me’a ‘oku folofola ki ai ‘a Sisu.

1.  Kuo tuku ‘a e Pule kotoa pe ‘o Langi mo mamani kia Sisu Kalaisi: ‘I he hili ko ia ‘o e Pekia pea mo e Toetu’u ‘a Sisu Kalaisi na’e foaki leva ‘e he Tamai ‘a e Pule mo e mafai (authorities) kotoa pe kiate Ia. Mafai ‘i Langi mo Mamani. Tuku ki lalo ‘a e me’a kotoa pe ki Hono lalo va’e (Sa. 110:1,2). Ko ia ai ‘oku ‘ikai ha Pule ‘e toe mahu’inga ange ‘ia Sisu Kalaisi. Pea ‘oku lalo’aoa ‘a e mafai kotoa pe kiate Ia. ‘Oku pau ke ma’u ngofua ‘a e me’a kotoa pe mei he ‘Eiki. ‘E ‘ikai hoko ha me’a ‘e taha ‘o ‘ata’ata meiate Ia (Sione 1:3).
2.   Ngaohi ‘a e kakai kotoa pe ko e kau ako: Ko e finangalo ia ‘o Sisu Kalaisi ke tala ‘a e kosipeli (ngaue faka’evangelio) ki he kakai kotoa pe. Pea “ngaohi” kinautolu (Ako Tisaipale) ke hoko ko ‘Ene kau ako ko e kau muimui. Ke hange pe ko Sisu Kalaisi ‘i he loto, ngaue mo e mo’ui.
3.  Papitaiso kinautolu: Fakanofo kinautolu ki he ‘Otua ‘i he Huafa ‘o e Tamai mo e ‘Alo mo e Laumalie Ma’oni’oni. Ko e Huafa ko e Pesona pe ia mo natula pe “Kakano” ‘o e ‘Otua. ‘A e ‘Otua ko e Tamai na’a Ne ngaohi a e langi mo mamani fakataha mo e fa’ahinga ‘o e tangata. Pea mo e ‘Alo na’a Ne pekia ke huhu’i ‘a e talangata’a ‘a e tangata ka ne foki ki he ‘Otua ‘o fou ‘i Hono Ta’ata’a. Pea mo e Laumalie Ma’oni’oni ko e Taukapo mo e Faiako, ‘a ia ‘oku Ne taukapo’i ‘a e me’a kotoa pe ‘a Sisu Kalaisi ‘i hotau laumalie.
4.  Ke tau ‘Ako’i ‘Ene ngaahi tu’utu’uni kotoa pe: Pea ko e tu’ukimu’a ‘o ‘Ene ngaahi tu’utu’uni: pea ke ta fe’ofa’aki (Sione 15:12). ‘Oku ou ‘iate kimoutolu ‘e au ‘i he ngaahi ‘aho kotoa pe ‘o a’u ki he ngata’anga ‘o mamani. Pea ko e fakafiefia lahi taha ‘o e fekau mei he ‘Eiki Toetu’u ko ‘Ene tala’ofa ke ne ‘iate kimoutolu ma’u pe. Ko ‘ene ‘iate kitautolu te tau lava ai ke fai ‘a e me’a kotoa pe kuo ne tu’utu’uni mai pea ‘oku mo’oni pe ‘a ‘Ene Folofola ka mavae mo Au, ‘e ‘ikai ke tau fa’a fai ha me’a (Sione 15:5). Pea ko ‘Ene ‘iate kitautolu ko e fakafiefia taha ia ‘o e fononga he te tau ma’u ‘a e mafai leva ke ikuna’i ‘a e me’a kotoa pe (Filipai 4:13). ‘Ofa ke langilangi’ia kakato ‘a Sisu Kalaisi ‘i he ngaahi me’a kotoa pe ‘oku tau fai ‘i Hono Huafa.

Tefito’i Fakakaukau: Ke tau talangofua kakato ki hotau fekau kuo ‘omi ‘e he ‘Eiki ‘i he ‘aho ni.