Ako 81: Ko e Misiteli 'o e tupu

PAL. 29:13; MA’AKE 4:26-29; MT.13:24-30; 1 KOL. 15:36-38; 3:6;

1 PITA 1:23-25; FKH. 14:15; SIONE 4:35-38

KO E MISITELI ‘O E TUPU

‘Oku ‘i ai ha ngaahi me’a ‘oku mahu’inga ke fakatokanga’i ‘i heni:

1.      Neongo ‘oku tau ‘ilo ki he tafa’aki kitu’a ‘o e ngaue ke “tupu” ha fo’i “mo’ui” ‘oku ‘ikai pe ke tau ‘ilo ‘e kitautolu (‘oku ‘ikai ke tau ‘i he Laumalie) ‘a e anga ‘o ‘Ene tupu. Ka neongo ‘a ‘etau ta’e’ilo ki ai ‘e ‘ikai pe ke ta’ofi ai ‘a ‘ene tupu ‘a’ana. ‘Io, ‘oku pehe tofu pe ‘a e mo’ui fakalaumalie. ‘E ‘ikai “tupu” ki he ‘ilo pe mahino ‘a e tangata. ‘Oku tupu pe ia! Tupu ‘i he Tui.

2.      ‘Oku ‘ikai kau ha taha ‘i he fakatupu. Mo’oni pe ‘a Paula. ‘Oku to ‘e ia kae fakaviviku ‘e ‘Apolosi, ka ko e ‘Otua pe ‘a e Fakatupu (1 Kol. 3:6). ‘Oku ‘ikai te tau kau kitautolu ha me’a. ‘Oku tau tu’unoa pe !

3.      Kuopau ke tau fa’a tatali ‘i he “po mo e ‘aho” ki he tupu ‘a e fo’i mo’ui. ‘Oua leva te tau ‘amanaki ki ai ‘apongipongi ka ke tau fa’a tatali mu’a mo fa’a kataki. Tuai mai pe vave mai ka kuopau pe ke “Mo’ui” (1 Pita 1:23-25)

4.      Ko e kelekele ko ia ‘a e laumalie ‘o e tangata. Pea ko e tenga ko ia ‘a e fo’i Mo’ui ‘oku mo’ui ‘iate ia pe. ‘A ia ko e Laumalie Ma’oni’oni ia. Ko e ‘Otua pe ‘oku mo’oni ‘iate ia pe. Pea ko e me’a ia ‘oku fai ‘e he Laumalie Ma’oni’oni ‘i he Laumalie takitaha ko e feinga ke fakatupu ‘a e Mo’ui ‘a e ‘Eiki ko Sisu Kalaisi. ‘Oku ‘ikai lava ‘e ha me’a ke fakatupu ‘a e me’a ko ia. ‘Ikai ha ivi pe tangata, pe ha fa’ahinga mafai ka ko e Laumalie pe ‘o e ‘Otua (Sakal. 4:6).

5.      ‘Oku ‘ikai ha faka’amu ‘a e Tauhi Ngoue ke ‘i ai ha’ane fu’u ‘akau kai ke fua fakamatamatalelei pe. ‘Oku matamatalelei pe ‘a e fua pea sai. Ka ‘oku fai ‘a e faka’amu ki he fua ke Motu’a kae Toli. ‘Oku ‘i ai ‘a e lave ‘a Sisu ‘o pehe ‘oku mahu’inga ke tau fua ka ‘oku totonu ke “tu’uma’u” hotau fua (Sione 15:16). Ko e “Tu’uma’u” ‘oku tatau pe ia mo e fakakaukau ‘o e “motu’a”. ‘E ‘ikai ke tau lava ke ma’u tokoni mei ha fo’i Mo’ui kae’oua ke tu’uma’u pe “kakano’aki” ‘a e fo’i mo’ui ko ia pea ‘e toki malava ke tafoki ha taha kehe. He ko e “utu” ko e tafe ‘o mahua atu ki ha taha kehe. Pea ko e fakana’una’u ia ‘a e Tamai ke fai mo tau “motu’a” kae utu. ‘Io, ke fai mo “tu’uma’u” kae tafe atu.

Tefito’i Fakakaukau: Ko e finangalo ‘o e ‘Eiki ke tupu ‘etau mo’ui pea ke tau tu’uma’u ‘iate ia.