SEN.28:18-22; 35:14; Lev.8:10-12; Fkm.1:23; Hos.4:15; Teut.26:17; Sen.35:7; Lev.27:30.
KO E FAKATAPU'I
'Uluaki 'o e me'a mahu'inga 'o e 'aho ni kuo tu'u 'a Sekope 'o to'o 'a e maka na'a ne 'olunga ai 'o fokotu'u ia ko e pou pea ne lilingi ai ha lolo. Na'e 'ikai ko e me'a mahu'inga ko e fu'u maka na'e 'olunga ai 'a Sekope. 'Oku toki mahu'inga 'a e maka 'i he me'a na'e hoko ai. Na'e lolotonga 'ene 'olunga 'i he maka kuo ne misi 'o sio ai ki he fu'u tu'unga 'a e 'Otua. Pea 'oku to'o 'a e maka ko e taipe pe ke fakahaa'i ai ki tu'a 'a e "kakano" 'o 'ene misi. 'Ikai ko ia pe, ka 'i he potu ko ia na'e ha ai 'a e 'Otua kiate ia. Na'a ne to'o leva 'a e maka na'a ne 'olunga ai 'o fokotu'u ia ko e pou, he ko e 'Otua na'a ne misi ki ai, mei heni 'o fai atu te ne hoko ia ko e pou tuliki ke tu'u ai 'a 'ene mo'ui, kae'uma'a foki 'a e toenga 'o 'ene fononga.
Ko e maka foki ko ia, 'oku ne fakafofonga'i 'a Peteli, ko e falelotu, pe fale 'o e 'Otua. Pea ne to'o leva mo ha lolo 'o lilingi ai - ko e huufi fale! 'Isa, ko e fu'u maka ko ia ko Sekope ia kuo fokotu'u kae lilingi ki ai 'e he 'Otua 'a Hono Laumalie, pea kuo ne hoko ko e faletapu. Kuo fakatapu'i 'a 'ene mo'ui ma'a e 'Eiki. 'Ilonga ha ui kuo fai 'e he 'Otua ki he'ete mo'ui, ko e ui pe ke fakatapu'i. Neongo ai pe pe ko e ui ke tapuaki'i, hange ko 'eni kuo fai 'e he 'Otua kia Sekope, ka 'oku fa'o mai 'i loto 'i he fo'i tapuaki 'a e ui ke fakatapu'i. 'Oku 'ikai ke pehe ia kuo tu'utu'uni fakahangatonu mai ke fai ha fakatapu'i, ka ko e ongo'i pe ia 'a e tangata kuo ui 'e he 'Otua. 'Osi pe ha lave mai 'a e 'Otua ia ki he'ene mo'ui kuo ne ongo'i faikehe ia. Hange pe ko e kau maki na'a nau fononga kia Sisuu, nau foki pe mei ai kuo nau foki kinautolu ki honau 'api "'i ha hala kehe" (Mt.2:12).
Ko kitaua ko e fu'u maka tatau pe. Na'e li fainoa pe 'i he vao. Hoko mai pe 'a e 'Eiki, kuo angakehe leva 'a 'eta mo'ui. Kuo tu'utu'uni ia ke fakatapu'i he kuo lilingi ai Hono Laumalie pea ko 'etau fononga holo 'oku fata ai pe 'a e 'Imisi 'o 'Ene 'afio, pea ko e makatu'unga ia 'o 'etau tapuhaa, koe'uhi ko Ia 'oku 'afio 'i hoto fale kelekele. Pea ko 'ete mo'ui na'e ngalemulemu mo vaivai kimu'a kuo hoko ia ko e fu'u pou. Pea 'oku tu'u ai 'a e ngaue 'a e 'Eiki. 'Io, 'o faitatau tofu pe mo Pita. Na'e kei makateka holo pe ia kimu'a pea ta'eta'epau ka 'i he hoko mai pe 'o e 'Aho Penitekosi, kuo lilingi hifo 'a e Laumalie Ma'oni'oni, pea fokifa pe 'a e hoko 'a Pita ko e makatu'u, 'o fakamakatu'unga ki ai 'a e siasi 'i Selusalema. 'O 'ikai ko Pita na'e tu'u ai ka ko e Laumalie 'o e 'Otua na'e 'iate ia, ko ia 'a e "pou". Pea 'e liliu leva hoto hingoa 'ota meia "Lusa" kia "Peteli". 'I he fai pe ko ee 'a e fakatapu'i, pea hoko leva mo e fai fuakava 'a Sekope. Ko 'ene tuku mo'ui makatu'unga 'i he palomesi 'a e 'Otua te Ne 'iate ia ma'u pe 'i he 'aho kotoa 'o 'ene fononga 'io 'o a'u ki he fakafoki ia ki honau 'api.
Ko e taha 'o e me'a mahu'inga ki he tuku mo'ui 'a Sekope, 'uluaki, ko e 'Otua na'e 'uluaki ha'u pea ko Sekope na'e toki 'alu atu. Pea 'oku pehe ma'u pe 'a e 'Eiki ia. 'E 'uluaki ha'u ma'u pe ia (Loma 5:8). Ua, 'e 'ikai lava ha tuku mo'ui 'o ka 'oku 'ikai ke 'iate kita 'a e 'Otua. Ka toki ha'u 'a e 'Otua 'o 'afio 'iate kita pea 'e toki lava ke toki fai ha'ate pole. Ko 'ete pole 'i he ivi 'o Sisu kuo te ma'u. He ka 'ikai na'e fai 'a e tuku mo'ui 'ia Sekope. Ko e tuku mo'ui pe 'a e 'Otua ki he 'Otua. He ko e 'Otua pe te Ne lava ke tauhi 'a e 'Otua.
Ko e foaki 'o e vahe hongofulu ko e taipe pe kitu'a 'o 'ete foaki 'a 'ete mo'ui ki he 'Otua. Ko e fakaha 'anga 'a 'ete hounga'ia 'i He'ene 'ofa. 'O 'ikai ko e 'uhinga ke totongi. Pea ko e vahe hongofulu 'a Sekope mahalo ko 'ene manatu ki he fai 'e 'Epalahame 'a e vahe hongofulu (Sen. 14:20). Foaki pe 'eni ia kimu'a pea toki tu'utu'uni 'e he lao 'a Mosese. 'Aia ko e vahe hongofulu 'a 'Epalahame mo Sekope ko e pole pe. 'Ikai ke tu'utu'unia. 'Oku pehe pe 'a e fakatapu'i. 'Oku 'ikai tu'utu'unia, ka ko e ha pe 'a 'ete fakamahu'inga ki he Laumalie kuo Ne nofo'i kita pea 'e fakatatau pe ki ai. Kapau ko e Laumalie mo'oni 'o e 'Otua pea 'oku 'ikai ha toe veiveiua, ka ko e luva kotoa ke Ne ngaue fa'iteliha 'i he'ete me'a kotoa pe.
Ko e foaki 'o e vahe hongofulu ko e taipe pe kitu'a 'o 'ete foaki 'a 'ete mo'ui ki he 'Otua. Ko e fakaha 'anga 'a 'ete hounga'ia 'i He'ene 'ofa. 'O 'ikai ko e 'uhinga ke totongi. Pea ko e vahe hongofulu 'a Sekope mahalo ko 'ene manatu ki he fai 'e 'Epalahame 'a e vahe hongofulu (Sen. 14:20). Foaki pe 'eni ia kimu'a pea toki tu'utu'uni 'e he lao 'a Mosese. 'Aia ko e vahe hongofulu 'a 'Epalahame mo Sekope ko e pole pe. 'Ikai ke tu'utu'unia. 'Oku pehe pe 'a e fakatapu'i. 'Oku 'ikai tu'utu'unia, ka ko e ha pe 'a 'ete fakamahu'inga ki he Laumalie kuo Ne nofo'i kita pea 'e fakatatau pe ki ai. Kapau ko e Laumalie mo'oni 'o e 'Otua pea 'oku 'ikai ha toe veiveiua, ka ko e luva kotoa ke Ne ngaue fa'iteliha 'i he'ete me'a kotoa pe.
No comments:
Post a Comment