Senesi 26:6&7; 12:13; 20:2,12,13; I Kolinito 10:13; Saame 27:1.
'EFIHIA HE TAUHELE TATAU PE
'I he ta'u 'e teau kuo hili ange, 'i he feitu'u tatau pe, 'i Kela, na'e fai ai 'e 'Epalahame 'a e fo'i angahala ko e loi koe'uhi ko e hoihoifua 'a hono uaifi. Pea ko 'eni ko 'Aisake 'eni mo Lepeka, kuo toe hoko pe 'a e me'a tatau. Ko Lepeka na'e ta'u onongofulu ka 'oku mahino na'e fu'u kei hoihoifua pe. Pea 'oku faingata'a foki ke tau fakakaukau'i atu ki ha taha 'o hange ko 'Aisake, kuo ne 'osi a'usia ha ngaahi tapuaki mei he 'Otua pea ne 'ilo'i mo'oni 'a e 'Otua, 'e fasi 'a 'ene tui 'o matahoa ai 'a e mo'ui faka-'Otua 'i he kakai 'o tua'a.
Ko e me'a pe 'eni 'oku tau 'ilo. Ko e tefito'i natula 'o e angahala ko 'eni ko e manavahe, ko e manavasi'i na'a mole 'a e mo'ui. Pe manavasi'i na'a mole 'a hoto tu'unga pe ko hoto ongoongo. He 'oku 'ikai ke toe faikehekehe 'a e me'a ko 'eni mo ia pe na'e fai 'e Pita 'i he po 'o e lavaki. 'I he 'ilo'i atu 'e he kakai na'a nau "mumu 'i he afi" na'a nau ofongi leva, 'oku kau 'a Pita 'i he mo'ui ma'a Sisuu. Tuaiekemo kuo faka'ikai'i faka'aufuli mai 'e Pita, ia, 'o pehe 'oku te'eki ke ne 'ilo 'e ia 'a e tokotaha ko ia. Kuo ne loi!
'Uluaki 'a e me'a ke tau tokanga'i na'e 'ikai ke mei hoko 'a e angahala ni ka ko e 'alu ke mumu 'i he afi. Hange pe ko 'Aisake, na'e to pe 'a e honge kuo 'alu leva ia ki Kela he ko e me'a maheni hono fai. Na'e te'eki ke ne fehu'i ki he 'Otua pe ko e ha 'e fai? Na'e toki ha pe 'a e 'Otua ia kuo ne 'osi nofo ia 'i Kela. Na'a ne 'alu ta'e fakaongoongo. Kapau te tau vakai'i 'a e natula 'o e ngaahi fo'i palopalema ni te tau tokanga'i 'oku nau fu'u fekau'aki lahi. Sio kia 'Epalahame 'i he vahe 12, na'a ne to ki 'Isipite koe'uhi na'e honge 'a Kenani pea ne loi ai 'ia Selai. Pea tau toe tokanga'i pe ia 'i he vahe 20 kuo to ki Kela, 'i he honge ai pe, pea ne toe loi kia Tu'i 'Epimeleki. Pea ko 'Aisake 'eni kuo nofo 'i Kela, 'i he honge ai pe, pea ne loi 'ia Lepeka ki he kau tamaio'eiki (mahino ko e 'Epimeleki pe 'eni ia 'e taha, kehe ia mei he Tu'i na'e fetakai mo 'Epalahame).
Kuo lava leva 'eni ke tau mahino'i 'a e tu'unga 'a e 'Otua ke 'oua na'a hifo ki 'Isipite, he te ne toe fai pe 'e ia 'a e me'a tatau hange tofu ko 'Epalahame 'e toe loi pe ia! 'Ai pe a ke loi 'e ua 'a 'Epalahame, kae taha ai leva 'a 'Aisake!
Ka e tokanga'i ko e kamata mei he "honge". Ko e honge 'i he Tohitapu ko e taipe 'a e fakamamahi'i 'o e kakano, 'a ia ko e fakatanga'i 'o e mo'ui. Honge fiemalie, pea 'oku fai leva 'a e kumi hufanga. Kumi hufanga ki 'Isipite, pea toe kumi hufanga ki Kela. Pea koe'uhi kuo te kumi hufanga ki ai, kuopau pe te te lalo'aoa mo fakalai ki ai. Te te mate he fie tala 'a e totonu ka na'a 'ikai te ne 'omi ha'ate me'a, pe 'ikai ke toe 'omi hoto faingamalie. Pea a'u 'o te te'epato ki ai telia na'a mole 'a 'ete mo'ui.
'Ikai mu'a ke fakakaukau 'a 'Epalahame mo 'Aisake ka honge leva pea 'alu a ki he 'Otua. Tuku 'a e fakafalala tangata mo falala fonua. 'Oku malava pe 'e Sihova ia ke fafanga'i 'a Hono kakai. 'Oku 'ikai ke tau ako meia 'Ilaisia, na'e nofo 'ana ia 'i he taimi lahi pea tu'utu'uni 'e he 'Otua ki he manupuna ke fai hono fafanga! Ka ko hono 'atunga pe e 'o e 'alu ta'efakaongoongo, 'oku 'ikai te te 'ilo 'a e faingata'a 'oku tali mei mu'a. Pea 'oku 'ikai foki ke te 'ilo'i kita pe 'oku te fefeka fe'unga ke te lava'i 'a e ta'eloi 'i ha'ate to ki he tofi'a 'o e kakai kehe. He te te hange pe ko Pita, te te fielahi mo 'u'ua holo pe 'i hotau siakale mo fai 'a e ngaahi pole kehekehe, ko e tuai pe 'a e a'u atu ki he fonua kehe kuo kamata leva ia ke tete.
Pea kapau pe a na'e manatu'i 'e 'Aisake 'a e folofola 'a e 'Otua 'aneafi, "ko au te u kau mo koe", mahalo pe na'a tokoni. He ka te tu'u mo e 'Otua ko hai tu ia te te manavahe ki ai. Kaikehe, 'oku 'omi pe 'e he 'Otua 'a e lesoni ko 'eni mo'otautolu 'i he 'aho ni ke toe fakatokanga 'aki 'a e anga 'o e pau 'o 'etau falala kiate Ia. 'Oku kei fu'u mahu'inga 'aupito 'a e mo'ui fakaongoongo, koe'uhi 'oku te mate kita kae mo'ui 'a Sisu 'iate kita, pea ko Sisu 'oku 'ikai ke manavahe 'i ha taha (Loma 8:38-39). 'Oku Ne Mo'oni pe 'o ta'engata.
No comments:
Post a Comment