Ako 68: Tui falala kakato ki he ‘Otua Mafimafi.

PALOVEPI 29:2; HEPELU 6:16-18; SEN. 22:17-18; NOMIPA 6:24-26; 23:19

KO E FUAKAVA ‘A E ‘OTUA'

‘I he ngaahi aleapau kotoa pe kuopau pe ke fai ‘a e Tohi. Ko e tohi ia ke fakamo’oni hingoa ki ai ‘a e ongo fa’ahinga ko ‘ena fuakava ia'. ‘I he lesoni ‘o e ‘aho ni ‘oku fakamatala ki ha aleapau ‘a e ‘Otua' mo e tangata (‘Epalahame). Pea fai ‘e he ‘Otua' ‘a e Fuakava (pe lea tuki). Pea ko e anga ‘o e lea tuki pe fuakava kuopau ke fai’aki ia ha hingoa ‘oku toe ma’olunga ange. Pea ki he ‘Otua ‘oku ‘ikai ha taha ‘e toe ma’olunga ange ‘iate ia ko ia te Ne lea tuki mo fuakava pe ‘iate Ia. ‘Ai ‘Ene Folofola ‘a’ana ‘oku mo’oni. ‘Oku ‘ikai te Ne loi. ‘Oku ‘ikai toe liliu ‘a ‘Ene Folofola'. ‘Oku tu’uma’u ia ‘o ta’engata.

‘Oku mahu’inga ke tau tokanga’i ‘eni:

1.      Ko e me’a ‘oku fiema’u lahi ‘e he ‘Otua' meiate kitautolu ko e me’a ko ia ko e Tui Falala. Ko e langilangi lahi ia ‘o e ‘Otua' kapau te tau falala kakato ki ai.

2.      ‘Oku ‘i ai ‘a e ongome’a mamafa ‘e ua ‘oku fai ‘e he ‘Otua' heni (veesi 18). Ko e folofola mo Fuakava (lea tuki). ‘Oku ‘osi fe’unga pe ‘a e Folofola ia ‘a e ‘Otua' ke tau tui ki ai ‘e ‘ikai pe ke loi ia. Ko e ha pe ha me’a ‘e folofola ki ai ko e mo’oni ia. Kae lolotonga pe ‘oku kei mo’oni pe ‘a ‘Ene Folofola' pea ‘oku fe’unga pe ia, kuo toe ‘ai ‘e he ‘Otua ia ke Ne toe fai pe ha fuakava (lea tuki). Kainga faka’uta ki he loto ma’ulalo ‘a e ‘Otua'. Ka ko ‘Ene ‘ai pe ke ma’u kakato ‘a ‘etau falala !

3.      Pea ko e falala ange ki he‘ene Tala’ofa ‘e hoko ia. Ko ‘Ene tapuaki’i kitautolu mo fakalotolahi’i kitautolu hange ko ‘Ene palomesi kia ‘Epahalame', Tui kainga ki he tapuaki ‘a e ‘Otua' he kuo Ne ‘osi folofola ki ai.

Tefito’i Fakakaukau: Tui falala kakato ki he ‘Otua Mafimafi.